Yɛnŋɛlɛ li ma li kajɛŋgɛ ki pye
55
1 Yoro mbele fuun wɔgɔ yɛn ye na,ye pan tɔnmɔ pi kɔrɔgɔ ye wɔ!
Ali yoro mbele penjara woro ye yeri,
ye pan ye lɔ ye ka.
Ye pan ye duvɛn naa nɔnɔ lɔ penjara fu, penjara wɔmɔ woro wa.
2 «Yaraga ŋga ki se ya mbe ye baro, yiŋgi na, a ye nɛɛ ye penjara ti nii wa ko ni?
Yaraga ŋga ki se ya lere tin, yiŋgi na, a ye nɛɛ ye yɛɛ tege ko kala na?
Yaa nuru na yeri jɛŋgɛ, pa kona ye yaa la yaakara jɛndɛ kaa,
ye yaa la yaakara tanra kaa.
3 Ye nuŋgbolo jan na yeri, ye pan na kɔrɔgɔ!
Yaa nuru na yeri, pa ye yaa yinwege ta.
Mi yaa yɔn finliwɛ* mbakɔɔ le ye ni.
Kajɛŋgɛ ŋga mìla ki yɔn fɔlɔ* lɛ mbe pye Davidi wi kan, mi yaa ki pye ye kan kasinŋge ni†.
4 Wele, mìla wi pye na kapyegele ke sɛrɛfɔ wa cɛngɛlɛ ke sɔgɔwɔ,
maa pye cɛngɛlɛ ke yɛgɛ sinfɔ konaa ke fanŋga fɔ.
5 Wele, cɛnlɛ na yee jɛn, ye yaa ka ki cɛnlɛ woolo pe yeri pe pan ye kɔrɔgɔ;
cɛnlɛ na lii ye jɛn, ki cɛnlɛ woolo pe yaa ka fe mbe pan ye kɔrɔgɔ,
Yawe Yɛnŋɛlɛ, ye Yɛnŋɛlɛ li kala na, Izirayɛli* woolo Yɛnŋɛlɛ kpoyi* li kala na,
lo na lì gbɔgɔwɔ kan ye yeri we.»
Yɛnŋɛlɛ li ka yɔn fɔlɔ na lɛ,
6 «Yaa Yawe Yɛnŋɛlɛ li lagajaa, sanga ŋa ni ye mbe ya mbeli yan we,
yaa li yinri, sanga ŋa ni li yɛn ma yɔngɔ ye ni we.
7 Lepee wi wɔ wa wi kombele li ni,
kapege pyefɔ wuu jatere pere ti yaga;
wi sɔngɔrɔ wi pan Yawe Yɛnŋɛlɛ, we Yɛnŋɛlɛ li kɔrɔgɔ,
pa li yaa wi yinriwɛ ta;
katugu li maa kapere ti kala yari lɛgɛrɛ lɛgɛrɛ.
8 «Katugu na jatere wi woro paa ye woo wi yɛn,
na koŋgolo ke woro paa ye wogolo ke yɛn.
Yawe Yɛnŋɛlɛ lo lì yo ma.
9 Naayeri wi yɛn ma lali tara ti ni yɛgɛ ŋga na,
pa na koŋgolo ke yɛn ma lali ye wogolo ke ni ma,
ki pyelɔmɔ nuŋgba pi na, pa na jatere wi yɛn ma lali ye woo wi ni ma.
10 «Yɛgɛ ŋga na tisaga konaa nɛzhi* wi ni ti ma yiri wa naayeri ma pan,
ɛɛn fɔ tila sɔngɔrɔ mbe kari, na tii tara ti yinŋgi mberi pe,
mbe ti yariluguro ti fi ti yiri,
mbe yariluguro kan kɛrɛ kɔnfɔ wi yeri,
konaa mbe ti ti fɛnnɛ pe ma pe yɔn suro ti ta,
11 ki pyelɔmɔ nuŋgba pi na, sɛnrɛ nda ti ma yiri wa na yɔn pa ti yɛn ma.
Tila sɔngɔrɔ mbe pan na kɔrɔgɔ wagafe,
na tii ŋga mila jaa ki pye mbege yɔn fili,
na tii ŋga mìla kɔn ma tɛgɛ ki pye.
12 «Ee, ye yaa ka yiri wa Babilɔni tara yɔgɔrimɔ ni mbe kari,
pe yaa ka keli ye yɛgɛ mbe kari ye ni yɛyinŋge na;
yanwira to naa tinndiye pe ni, ti yaa kaa yɔgɔrimɔ kɔŋgɔlɔ waa wa ye yɛgɛ,
yan nawa tire ti ni fuun ti yaa kaa kɛndagala gbɔɔn ye kan†.
13 Sipirɛsi* tire tiyɔnrɔ yaa ka fi wa wuuro yuguyugu wi yɔnlɔ,
miriti tire wɛtipiire woro yaa ka fi wa yanpege ki yɔnlɔ;
ki yaa ka gbɔgɔwɔ kan Yawe Yɛnŋɛlɛ li yeri,
mbe pye kacɛn ŋa wi yɛn kɔsaga fu, ŋa wi se wɔ wa wi yɔnlɔ.»