We Fɔ wi yɛn na kagala fɔnŋgɔlɔ
48
1 Yaa nuru, yoro Zhakɔbu setirige piile wele,yoro mbele Izirayɛli* mɛgɛ ki yɛn ye na we,
yoro mbele yè yiri wa Zhuda sege ki ni we,
yoro mbele ye maa wungu Yawe Yɛnŋɛlɛ li mɛgɛ ki na we,
yoro mbele ye maa Izirayɛli woolo Yɛnŋɛlɛ li yɛnri;
ɛɛn fɔ ye woro naga piin kaselege naa kasinŋge ni.
2 Ma sigi ta ye maa ye yɛɛ gbogo na ye yɛɛ yinri ca kpoyi* ki woolo,
ma ye kɛɛ ki kan Izirayɛli woolo Yɛnŋɛlɛ lo na,
lo na pe maa yinri Yawe Yɛnŋɛlɛ na yawa pi ni fuun fɔ.
3 Kagala ŋgele kè pye ma toro,
mìla ke sɛnrɛ yo ma ke naga, maga lɛ wa wagati titɔnlɔwɔ ni.
Ki sɛnrɛ tìla yiri wa na yɔn, a mìri yo ye kan.
A mì si kaa ki pye le ki yɔngɔlɔ nuŋgba ke ni,
a kì pye ma ki yɛɛ yɔn fili.
4 Katugu mìgi jɛn ma yo yoro Izirayɛli woolo, ye yɛn nuŋgboŋgbangala fɛnnɛ,
ye yɔlɔgɔ kì sheli ye na paa tugurɔn yɛn,
ye go kì liri ye na paa tugurɔn yɛn.
5 Mìla ki kagala ke yo ye kan maga lɛ wa faa,
mìla ke sɛnrɛ yo ye kan sanni ke sa gbɔn ye na,
jaŋgo yaga kaa ki yuun mbe yo fɔ ye yarisunndo to tigi kagala ke pye,
fɔ ye yaara yanlɛrɛ tire woro nakoma tuguyɛnrɛ woro to tìgi kagala ke kɔn ma ke tɛgɛ.
6 Nda mì yo yeri logo, yoro jate yège yan fɔ ti ni fuun tìri yɛɛ yɔn fili,
naga yɛn ma, ye se ki wogo ki yari fun wi le?
Koni mi yaa ti ye kagala fɔnŋgɔlɔ sɛnrɛ logo,
kagala ŋgele ke yɛn ma lara,
ŋgele ye sila ke jɛn faa.
7 Yiŋgɔ ko ke yaa pye, ke woro kagala ŋgele kè toro wa faa;
fɔ ma pan ma gbɔn yiŋgɔ, ye fa ke sɛnrɛ logo gbɛn;
jaŋgo yaga kaa ki yuun mbe yo fɔ yàa ke jɛn faa!
8 Ye sila ki kagala ke sɛnrɛ logo, ye sila kala la jɛn ke wogo na,
maga lɛ wa wagati titɔnlɔwɔ ni, ye sila yɛnlɛ mbe logo.
Mìgi jɛn ma yo ye yɛn leele fanlafɛnnɛ ko cɛ,
maga lɛ wa ye sesanga wi na, pe maa ye yinri leele mbele pè yiri ma je.
9 Ɛɛn fɔ na mɛgɛ ki kala na, mìla naŋgbanwa gbɔɔ pi sogo,
na gbɔgɔwɔ pi kala na, mìlan yɛɛ yigi
jaŋgo mi ka ka ye tɔngɔ.
10 Ye wele, mì ye wa ma wele, ma ye pye fyɔngɔ fu,
ɛɛn fɔ kii pye paa yɛgɛ ŋga na pe ma warifuwe wi wa maa wele kasɔn ni;
mì ye wa ma wele wa jɔlɔgɔ ki kasɔn ki ni.
11 Mi yaa ko pye ma, na mɛgɛ ko kala na, na yɛɛra mɛgɛ ko kala na,
katugu mi se yere ki na panla mɛgɛ ki jɔgɔ.
Mi sanla gbɔgɔwɔ pi kan lere wa yɛgɛ yeri.
Yɛnŋɛlɛ làa tunŋgo kan
12 Yoro Zhakɔbu setirige piile, ye logo na yeri,
yoro Izirayɛli woolo, yoro mbele mì yeri, ye logo na yeri!
Muwi mi yɛn koŋgbanŋa, muwi mi yɛn puŋgofɔ†.
13 Na yɛɛra kɛɛ ko kì tara ti nɔgɔ ki teŋge,
na kalige kɛɛ ko kì naayeri wi jaraga ma kari lagapyew;
na mi kari yeri, ti ma pinlɛ ma pan.
14 Ye ni fuun ye pan ye gbogolo, ye logo na yeri!
Ye ni ambɔ wi keli ma ki kagala ke yo?
Lere ŋa wi yɛn ma Yawe Yɛnŋɛlɛ li ndanla, wi yaa li nandanwa kala li pye Babilɔni tara ti na,
wi yaa wi kɛɛ ki yirige poro Kalide tara fɛnnɛ pe na.
15 Mi kpaw, muwi mì para, muwi mùu yeri;
muwi mùu pye wì pan, wi kagala ke yaa si yɔn.
16 Ye fulo laga na tanla, yege sɛnrɛ nda ti logo!
Maga lɛ wa ki lɛsaga ki na, mii para larawa.
Maga lɛ wa ki kagala ke lɛsaga ki na, mìla pye wa.
Koni we Fɔ*, Yawe Yɛnŋɛlɛ lìlan tun mali yinnɛ li tirige na na.
17 Yawe Yɛnŋɛlɛ na li yɛn ye go shɔfɔ, Izirayɛli woolo Yɛnŋɛlɛ kpoyi* le, pa lì yo yɛɛn fɔ:
«Muwi mi yɛn Yawe Yɛnŋɛlɛ, ye Yɛnŋɛlɛ le,
na li yɛn na ye nari ye tɔnli wo kala na,
na ye yɛgɛ sinni wa konɔ na ye daga mbaa tanri li ni.
18 Ndɛɛ kì pye yaa yɛnlɛ ma ye jatere wi tɛgɛ na ŋgasegele ke na,
ye mbe ja yɛyinŋge ta ki pye paa gbaan yɛn mbaa fuun,
kasinŋge ki jɛn na lɛgɛ ye sɔgɔwɔ paa kɔgɔje tɔnmɔ mba pi maa yinrigi na tuun pi yɛn.
19 Ye setirige piile pe jɛn na lɛgɛ paa taambugɔ ki yɛn,
ye piile pe jɛn na lɛgɛ paa taayɛngɛ ki yɛn.
Pe mɛgɛ ki se jɛn na kɔ nakoma mbe tɔngɔ mbe kɔ mbe wɔ wa na yɛgɛ sɔgɔwɔ.»
Yɛnŋɛlɛ li woolo pe yaa ka yiri
20 Ye yiri wa Babilɔni ca ki ni, ye fe ye yiri wa poro Kalide tara fɛnnɛ pe sɔgɔwɔ.
Yaa yɔgɔrimɔ kɔŋgɔlɔ waa, yaa ki wogo ŋga ki yari, mbe ti lere pyew wigi logo;
yege sɛnrɛ ti jaraga fɔ wa dunruya wi kɔsaga ki na,
yege yo fɔ Yawe Yɛnŋɛlɛ lì li tunmbyeele Zhakɔbu setirige piile pe go shɔ.
21 Lì pe yɛgɛ sin wa gbinri* ŋa wì waga wi ni, wɔgɔ si pe yigi;
lì ti tɔnmɔ janri ma yiri wa walaga ki ni,
lì walaga ki jɛnw, a tɔnmɔ janri ma yiri wa ki ni†.
22 Ɛɛn fɔ lepeele pe se yɛyinŋge ta fyew.
Yawe Yɛnŋɛlɛ lo lì yo ma.