Babilɔni tara yarisunndo kala
46
1 Yarisunŋgo Bɛli kì kanŋguuro kan, yarisunŋgo Nebo† ki fanŋga kì kɔ;pè ki yaara yanlɛrɛ ti pɔ mari taga yaayoro nda ti maa tuguro lee ta na.
Yàa pye na ki yarisunndo ti tungu faa na kee ti ni,
tì pye tuguro nda ti yɛn ma nugu wa yaayoro ti pɔgɔlɔ ke na, nari tege.
2 Ki yarisunndo ti fanŋga kì kɔ, tì kanŋguuro kan,
ti se ya mberi yɛɛ shɔ;
pè to jate ti yigi kasopiile na kee ti ni tara ta yɛgɛ ni.
3 Yoro Zhakɔbu setirige piile, ye logo na yeri,
yoro Izirayɛli* woolo sanmbala mbele fuun yè koro go na, ye logo na yeri.
Yoro mbele mì yere ye go kala li ni maga lɛ wa ye sesanga wi ni,
ma ye kala li lɛ maga lɛ wa ye sepilige ki na.
4 Mi yaa koro ma ye ni fɔ sa gbɔn ye lelɛwɛ sanga wi na;
mi yaa la ye sari fɔ ye yinzire ti ka sa filige.
Muwi mì yere ye ni, mi yaa si yere ye ni bere;
mi yaa ye go kala li lɛ mbe ye shɔ.
5 Ye yɛn na jaa mbanla taanla ambɔ ni,
mbe yo fɔ mi naa ki fɔ wi ni we yɛn ja?
Ye yɛn na jaa mbanla yala ambɔ ni,
mbe yo fɔ mi naa ki fɔ wi ni we yɛn nuŋgba?
6 Leele pele ma tɛ ŋa wa pe bɔtɛ pile li ni wi wɔ,
mbe pe warifuwe wi taanla taanlayaraga ni,
pe mɛɛ tɛ gbɔnfɔ wa sara mberi kan wi yeri, mbe yo wiri gbegele pe kan yarisunŋgo,
kona pe mɛɛ la fɔli ki yɛgɛ sɔgɔwɔ naga gbogo.
7 Pe maga lɛ pe pajogo ki na, mbe kari ki ni,
mbe saga tɛgɛ ki tɛgɛsaga, ki ma koro wa;
kila ya yiri wa ki yɔnlɔ li ni.
Ali na lere wa kaga yeri ŋgbanga, kila ya mbege shɔ;
kila ya mbe lere shɔ mboo wɔ wa jɔlɔgɔ ki ni.
8 Ye ye yɛɛ nawa to ki wogo ŋga ki na, ye pye lenambala!
Yoro mbele yè yiri ma je, ye jatere pye jɛŋgɛ!
9 Ye ye yɛɛ nawa to kagala ŋgele kè pye ma toro faa ke na,
katugu muwi mi yɛn Yɛnŋɛlɛ le, Yɛnŋɛlɛ la yɛgɛ woro wa mi puŋgo na;
muwi mi yɛn Yɛnŋɛlɛ le, la yɛgɛ woro wa paa mi yɛn.
10 Kala na li yaa ka pye, mi mali yo wa li lɛsaga
kagala ŋgele ke fa pye gbɛn, mì ke yo maga lɛ wa fafafa.
Mì yo fɔ: «Kagala ŋgele mì kɔn ma tɛgɛ mbe pye, ke yaa yeresaga ta,
mi yaa na nandanwa kala li ni fuun li pye mbeli yɔn fili.»
11 Mi yaa kara kasannjɛgɛ† ka yeri mbe yiri wa yɔnlɔ yirisaga kɛɛ yeri,
naŋa wa wi, ŋa mi yaa yeri mbe yiri fɔ taleere ta ni,
wi yaa kagala ŋgele mì kɔn ma tɛgɛ mbe pye ke yɔn fili;
ŋga mì yo, mi yaa ti ki pye,
ŋga mì kɔn ma tɛgɛ mbe pye, mi yaa ki pye mbege yɔn fili.
12 Yoro kotoŋgbanga fɛnnɛ, ye logo na yeri,
yoro mbele ye yɛn ma lali kasinŋge ki ni we.
13 Mi yɛn na paan na kasinŋge ki ni,
ki laga woro ma lali naa;
mi se mɔ ye shɔwɔ pi ni naa.
Mi yaa Siyɔn* ca ki shɔ,
mbanla gbɔgɔwɔ yanwa pi kan Izirayɛli woolo pe yeri.