Shɔfɔ ŋa Yawe Yɛnŋɛlɛ lì torogo
41
1 Yoro lɔgɔ furo* tara woolo, ye pyeri ye logo na yeri!Cɛngɛlɛ woolo, ye fanŋga le ye yɛɛ ni;
ye fulo laga na tanla ye para,
ye pan we pinlɛ we sa we kiti kɔnkala li yɛgɛ wɔ.
2 Ambɔ wìgi cew tafɔ ŋa wi yeri ma yiri wa yɔnlɔ yirisaga kɛɛ yeri,
wo ŋa wì kasinŋge ki lɛ naga piin lagapyew?
Ambɔ wi cɛngɛlɛ ke le wi kɛɛ,
ma wunlumbolo pe go sogo wi nɔgɔ?
Wi tokobi wi yaa ka pe tɔngɔ, mbe pe tɛgɛ paa taambugɔ yɛn,
wi wangala ke yaa ka pe gbɔn mbe pe jaraga, paa yɛgɛ ŋga na tifɛlɛgɛ ma kaa yan waga jaraga we†.
3 Wi ma taga pe na ma pe purɔ, ma toro na kee, yaraga naa ta,
wa konɔ na wi fa yɔnlɔ kan wa li ni faa.
4 Ambɔ wigi kagala ŋgele ke pye ma ke yɔn fili?
Ŋa wì wagati wi ni fuun woolo pe yeri maga lɛ wa fafafa, wowi.
Mi ŋa Yawe Yɛnŋɛlɛ, mi ŋa mi yɛn koŋgbanŋa konaa mi ŋa mi yɛn puŋgofɔ, muwi.
5 Lɔgɔ furo tara woolo pàa ki wogo ki yan ma fyɛ fɔ jɛŋgɛ;
mbele pe yɛn wa tara ti kɔsaga ki na, pe yɛn na seri fyɛrɛ ti kala na,
pe yɛn na fulo na paan.
6 Pe yɛn na pe yɛɛ sari,
pe ni fuun nuŋgba nuŋgba pe yɛn naga yuun pe yɛɛ kan fɔ: «Ye kotogo le ye yɛɛ ni.»
7 Kapyɔ jɛnfɔ wi maa kotogo nii tɛ gbɔnfɔ wi ni,
ŋa wi ma tugurɔn ti wɔlɔgɔ marito wi ni, wi maa kotogo nii ŋa wi maa tunŋgo piin fɛɛnlɛ sinndɛlɛgɛ na wi ni;
wi ma yo fɔ: «Tugurɔn ti maralɔmɔ pì yɔn!»
Pe ma yarisunŋgo ki gbegele, mbege kan pɔndiile ni, mbege yerege, jaŋgo ki ka kaa yɛgɛyɛgɛ.
Yaga kaa fyɛ koni
8 Ɛɛn fɔ yoro Izirayɛli* woolo, yoro mbele na tunmbyeele,
yoro Zhakɔbu setirige piile, yoro mbele mì wɔ,
yoro Abirahamu setirige piile mbele na wɛnnɛ,
9 yoro mbele mì saa yigi kɛɛ na ma yiri ye ni fɔ wa tara ti kɔsaga ki na,
mì saa ye yeri ma yiri fɔ wa tara ti lologoŋgolo ke ni.
Mìgi yo ye kan, ma yo fɔ yoro ye yɛn na tunmbyeele wele,
mì ye wɔ, mi se je ye na.
10 Yaga kaa fyɛ, katugu mi yɛn ye ni,
ye jatere wiga ka piri ye na, katugu muwi mi yɛn ye Yɛnŋɛlɛ le.
Mi yaa fanŋga le ye ni mbe ye saga,
mi yaa la ye tɔgɔlɔ na yawa gbɔɔ mba pi ma cew ta pi ni.
11 Ye wele, mbele fuun pàa nawa ŋgban ye ni,
pe yaa ka fɛrɛ shɔ mbe go sogo;
mbele pe yɛn na wiin ye ni,
pe yaa ka tɔngɔ mbe wɔ wa pew.
12 Mbele pè yiri ye kɔrɔgɔ,
ye yaa ka pe lagaja, ɛɛn fɔ ye se ka pe yan naa;
mbele pe yɛn na malaga gbɔɔn ye ni,
pe yaa ka kɔ mbe wɔ wa.
13 Katugu muwi mi yɛn Yawe Yɛnŋɛlɛ, ye Yɛnŋɛlɛ le;
muwi mì ye yigi kɛɛ na, mɛɛ ye pye ma yo fɔ:
«Yaga ka fyɛ, mi yaa ye saga.»
14 Yaga ka fyɛ, yoro Zhakɔbu setirige piile wele, fanŋga fu fɛnnɛ paa fyɛngɛ yɛn,
yoro Izirayɛli woolo mbele fanŋgɔgɔ fɛnnɛ,
mi jate mi yaa ye saga.
Yawe Yɛnŋɛlɛ, ye go shɔfɔ we, Izirayɛli woolo Yɛnŋɛlɛ kpoyi* le, lo lì yo ma.
15 Ye wele, mi yɛn na ye piin paa yarilire sunkanŋgaga yɛn, ŋga ki maa yarilire ti suun nari pire ti woo,
ŋga ki yɛn fɔnŋgɔ, ma pye ŋgangala ni, ŋgele ke yɔnrɔ ti yɛn ma tanla.
Ye yaa ka yanwira ti walagi mberi yaari,
mbe tinndiye pe jaraga mbe pe pye paa yan waga yɛn†.
16 Ye yaa kari fɛ paa yarilire yɛn, tifɛlɛgɛ ki yaa kari lɛ mbe kari ti ni,
tisaga tifɛlɛgɛ ki yaa kari jaraga.
Ɛɛn fɔ yoro wo na, ye yaa ka yɔgɔrimɔ ta Yawe Yɛnŋɛlɛ li yeri,
ye yaa kaa ye yɛɛ gbogo Izirayɛli woolo Yɛnŋɛlɛ kpoyi li fanŋga na.
Yɛnŋɛlɛ li yaa ka gbinri
17 Fyɔnwɔ fɛnnɛ poro naa fanŋgɔgɔ fɛnnɛ pe yɛn na tɔnmɔ lagajaa,
ɛɛn fɔ pe woro na tɔnmɔ taa,
pe yagbogolo kè waga pe na wɔgɔ ki kala na.
Mi ŋa Yawe Yɛnŋɛlɛ, mi yaa ka pe yɔn sogo,
mi ŋa Izirayɛli woolo Yɛnŋɛlɛ le, mi se je pe na.
18 Yanwira nda tire woro wa ti go na, mi yaa ti gbaanla mbe janri mbe yiri wa ti go na mbaa fuun,
mbe ti puluyo yila fuun wa yanwira gbunlundɛrɛ ti ni;
mi yaa gbinri* wi kanŋga mboo pye lambaaga,
mbe tara nda tì waga ti pye tɔnmɔ mbaa fuun wa ti ni.
19 Mi yaa ti sɛdiri* tire mbe fi wa gbinri wi ni, naa akasiya tire ni, naa miriti tire ni konaa oliviye* tire ni,
mi yaa ti sipirɛsi* tire mbe fi wa tara nda tì waga ti ni, naa pɛn tire ni konaa buyisi tire ni, ti ni fuun ti yaa fi wa ja;
20 jaŋgo leele pege yan pege jɛn,
pe jatere pye ki na, pege kɔrɔ jɛn,
fɔ Yawe Yɛnŋɛlɛ li kɛɛ ko kìgi kagala ŋgele ke pye,
fɔ Izirayɛli* woolo Yɛnŋɛlɛ kpoyi lo lìri da.
Yarisunndo ti se ya yaraga ka yɔn
21 Yawe Yɛnŋɛlɛ lo lì yo ma fɔ: «Yoro yarisunndo re, ye pan ye ye yɛɛ go sɛnrɛ ti yo!»
Zhakɔbu setirige piile pe wunlunaŋa wo wì yo ma fɔ: «Ŋga ki yɛn ye yeri, yege yo!»
22 Kala na li yɛn na paan wa yɛgɛ, ye pan yeli yɛgɛ yo we kan.
Kagala ŋgele kè pye ma toro faa, ye ke naga we na;
pa kona we yaa jatere pye ke na, mbe ŋga ki yaa pye puŋgo na ki jɛn,
nakosima kagala ŋgele ke yɛn na paan goto, ye ke yo we kan.
23 Kagala ŋgele ke yɛn na paan wa puŋgo na, ye ke yari we kan,
pa kona we yaa ki jɛn mbe yo fɔ kaselege ko na, ye yɛn yɛngɛŋgɛlɛ kele.
Ye kajɛŋgɛ nakoma kapege ka pye,
jaŋgo wege yan, ki ta ki to we yɔn na.
24 Ye wele, ye woro yaraga ka.
Ye kapyegele ke yɛn wagafe!
Ki yɛn katijaanga lere wa mbe ye wɔ paa wi yɛnŋɛlɛ yɛn.
25 Mì lere wa yirige wa yɔnlɔparawa kamɛŋgɛ kɛɛ yeri,
wì pan ma yiri wa yɔnlɔ yirisaga kɛɛ yeri;
na mɛgɛ ko wi yɛn na yinri.
Wi yɛn na tara teele pe tangala tɔɔrɔ ni paa joro yɛn,
paa yɛgɛ ŋga na cɔrɔ fanrifɔ wi maa joro ti tangala we.
26 Ambɔ wigi kagala ke yan ma ke yo maga lɛ wa faa, jaŋgo we ke jɛn?
Ambɔ wìla keli ma ke sɛnrɛ yo we kan, jaŋgo we yo fɔ kaselege yi?
Lere kpɛ sila ki wogo ki yo, lere kpɛ sila ki yari,
lere kpɛ sila yaraga ka logo ye yeri ki wogo na.
27 Ɛɛn fɔ muwi mì pye koŋgbanŋa maga yo Siyɔn* ca ki kan fɔ:
«Wele, pe mbele paa paan!»
Mì sɛntanra yofɔ wa torogo wa Zheruzalɛmu.
28 Ma si yala, na mi ka wele, mila lere kpɛ yan;
yɛrifɔ kpɛ woro wa ki yarisunndo ti sɔgɔwɔ.
Na mi ka yewe, ka woro wa mbe ya mbanla yɔn sogo.
29 Ye wele, ti ti ni fuun ti woro yaraga ka,
ti kapyegele ke yɛn wagafe.
Pe tugurɔn yarisunndo ti yɛn tifɛlɛgɛ ma pye yarijagara.