Wunlunaŋa ŋa wi yɛn ma sin wi kala
32
1 Ye wele, wunlunaŋa wa yaa ka cɛn mbaa wi wunluwɔ pi piin kasinŋge ni†;wi tara teele pe yaa kaa tara ti yɛgɛ sinni kaselege ni.
2 Pe ni fuun nuŋgba nuŋgba pe yaa ka pye paa larasaga yɛn, mbaa lere go singi tifɛlɛgɛ ki na,
mbe pye paa go yɛn, ŋga ki ma lere go tɔn tisaga tifɛlɛgɛ ki na,
mbe pye paa lafogo yɛn, ŋga ki yɛn na fuun wa lawaga ki ni,
paa waliŋguŋgo gbeŋge ka yɛn, ŋga ki yɛn na yinmɛ waa lawaga tara ta na.
3 Leele mbele pe yɛn na yaan, pe yɛngɛlɛ ke se ka wɔ pe na;
mbele pe yɛn na nuru, pe yaa ka nuŋgbolo jan jɛŋgɛ.
4 Leele mbele jatere woro pe ni, pe yaa ka tijinliwɛ ta mbaa kagala kɔrɔ jɛnni;
mbele pe yɛn dagbara fɛnnɛ, pe yaa kaa para pe sɛnrɛ ti laga.
5 Pe se ka lembige ki tɛgɛ mɛgbɔgɔ na,
nakoma mbe nambara fɔ wi pye legbɔɔ.
6 Lembige ki maa lembigewe sɛnrɛ yuun,
kapege ko wi maa sɔnri wa wi kotogo na mbe pye;
wi maa Yawe Yɛnŋɛlɛ li tifaga,
na para nali mɛgɛ jogo.
Wi ma lere ŋa fuŋgo yɛn wi na, wi yaga lawara ni,
mbe lere ŋa wɔgɔ yɛn wi na, wi kun tɔnmɔ pi ni.
7 Nambara fɔ wi kapyere ti ma pye ma tisaw;
wi ma kapege ki gbɛgɛlɛ wa wi nawa,
jaŋgo mbaa mbele pe yɛn tege na pe jɔlɔ wi yagbogowo sɛnrɛ ti ni,
ali mbege ta fyɔnwɔ fɔ wi yɛn wi tanga na wa ŋga wila yuun ki ni.
8 Ɛɛn fɔ lejɛnŋɛ we, kajɛŋgɛ ko wi maa sɔnri,
wi ma koro na kajɛŋgɛ piin.
Yɛrɛwɛ mba pìla kan
9 Yoro jɛɛlɛ mbele ye yɛn na ye yinwege ki piin yɛyinŋge na,
ye yiri ye logo na yeri!
Yoro sumbonɔ mbele ye yɛn ma taga ye yɛɛ na,
ye nuŋgbolo jan yanla sɛnrɛ ti logo!
10 Na yɛlɛ nuŋgba naa piliye jɛnri ka toro mbe kɔ,
yoro mbele ye yɛn ma taga ye yɛɛ na, ye yaa kaa seri;
katugu ɛrɛzɛn* pire se ka ta mbe cɔ,
yarilire kɔngɔ se ka pye wa naa.
11 Yoro jɛɛlɛ mbele ye yɛn na ye yinwege ki piin yɛyinŋge na, ye sunndo wi yaa kaa kɔɔn ye na!
Yoro mbele ye yɛn ma taga ye yɛɛ na, yaa seri fyɛrɛ ti kala na!
Ye ye yaripɔrɔ ti wɔ ye yɛɛ na, ye koro waga,
ye jatere piriwɛn yaripɔrɔ le ye yɛɛ na.
12 Yaa ye kotoro ti gbɔɔn kayaŋga ki kala na,
yaa gbele ye kɛɛrɛ tiyɔnrɔ ti kala na,
konaa ye ɛrɛzɛn kɛɛrɛ nda ti maa sɛni jɛŋgɛ ti jɔgɔwɔ pi kala na.
13 Yaa gbele na woolo pe tara ti kala na,
to nda wuuro naa yantiire wuuro yiri wa ti ni mari tɔn,
ali ma yiri fun wa pe yinrɛ ti ni fuun ti ni, to nda nayinmɛ la pye wa ti ni
konaa ma yiri wa ki ca ŋga kìla pye ma yin yɔgɔrimɔ ni ki ni.
14 Katugu wunluwɔ go kì koro waga,
ca ŋga kìla pye na tinmɛ gbɔɔ yinrigi pège yaga waga.
Ofɛli laga tinndi wo naa malaga sigesanŋgazo titɔnlɔwɔ wi ni, ti yaa ka pye kataga fɔ sanga pyew;
ti yaa ka pye yan sofilele pe yanrisaga konaa mbe pye yaayoro ti kasaga.
Kasinŋge ki tɔnli
15 Ki yaa pye ma fɔ sa gbɔn pilige ŋga ni Yɛnŋɛlɛ li yinnɛ li yaa ka yiri wa naayeri mbe tigi we na;
kona gbinri* wi yaa ka kanŋga mbe pye tire kɛrɛ,
mbe tire kɛrɛ ti kanŋga mberi pye kɔlɔgɔ.
16 Ko sanga wo ni, pe yaa kaa tanri kasinŋge na wa gbinri wi ni,
kasinŋge yaa ka pye wa tire kɛrɛ ti yɛn tara nda ni ti ni.
17 Kasinŋge ki tɔnli wi yaa ka pye yɛyinŋge,
kasinŋge ki puŋgo kala li yaa ka pye mbe koro ma yɛɛ kan
konaa mbe pye yɛyinŋge na pɔw fɔ sanga pyew.
18 Na woolo pe yaa ka pye mbe cɛn yɛyinŋge laga na,
wa yinrɛ nda kaŋgbanga se ya gbɔn pe na we,
wa wogosara nda ti yɛn pɔw.
19 Sinndɛɛrɛ tisaga ki yaa ka kɔlɔgɔ tire ti tɔngɔ,
mbe ca ki ya pew.
20 Ɛɛn fɔ yoro wo na, fɛrɛwɛ yɛn ye woo,
yoro mbele ye maa yariluguro nuru lɔrɔ yɔnrɔ ti lagapyew ki na,
mbe ye nɛrɛ naa ye sofilele pe sanga mbe pe wa paa yanri pe yɛ.