Babilɔni tara ti tolo kala
21
1 Sɛnŋgbanra nda tìla yo kɔgɔje yɔn tara gbinri* wi wogo na, fɔ:Yɛgɛ ŋga na tifɛliŋgbɔgɔ ma yiri ma pan ma Negɛvu* tara ti pari ma toro,
pa juguye pe yɛn na paan ma, ma yiri wa gbinri wi ni,
ma yiri wa tara nda ti yɛn fyɛrɛ ni ti ni.
2 Kaŋgbanga kayi kì naga na na yariyanga ni.
Leele javafɔ wi yɛn na java wi piin,
jɔgɔwɔ pyefɔ wi yɛn na jɔgɔwɔ pi piin.
Elamu tara maliŋgbɔɔnlɔ, ye yiri ye sa to malaga ki na!
Medi tara† maliŋgbɔɔnlɔ ye sa maliŋgbɔɔnlɔ cɛnsaga kan ye ca ki yɔn tɔn!
We Fɔ* wì yo fɔ: «Leele pe yɛn na jɛngɛ ŋga jɛɛn, mi yaa ki ni fuun ki kɔ.»
3 Ki kala na, na sɛnnɛ li yɛn nala yaa jɛŋgɛ,
lara ti yɛn nala yaa paa yɛgɛ ŋga na jɛlɛ selara ma kaa yiri wi ni.
Na jigi wì kɔn na na fɔ mi woro na nuru naa,
sunndo kɔngɔ ki kala na, mi woro na yaan naa.
4 Na jatere wì piri na na,
fyɛrɛ gbɔrɔ na yigi.
Mìla pye na yembinɛ li singi, mbe ta mbe tifɛnɛ tanla ta,
ɛɛn fɔ lì kanŋga ma pye fyɛrɛ ni na yeri.
5 Pe yɛn na lisaga ki gbɛgɛlɛ, na paara ti jaan,
pe yɛn na nii, pe yɛn na woo.
Ɛɛn fɔ pe yaa ka fo mbege logo fɔ:
«Yoro maliŋgbɔɔnlɔ teele, ye yiri!
Ye sinmɛ fa ye tugurɔn sigeyaara* ti na!»
6 Katugu we Fɔ wìgi yo na kan fɔ:
«Kari ma sa kɔrɔsiri pyefɔ wa tɛgɛ wila laga ki kɔrɔsi,
fɔ na wi ka yaraga ŋga yan wigi yo.»
7 Na wi ka malaga gbɔnwotoro yan shɔnye shyɛn na tilele,
na wi ka leele pele yan pè lugu sofilele na,
mbe pele yan pè lugu yɔngɔmɛye na,
wila kɔrɔsiri piin jɛŋgɛ,
wila kɔrɔsiri piin jɛŋgɛ tiyɔngɔ.
8 A kɔrɔsiri pyefɔ wì si kaa gbele ŋgbanga paa jara yɛn, ma yo fɔ:
«Na tafɔ, sanŋgazo ŋa pe maa kɔrɔsiri piin wi na mì yere wa wi go na, na kɔrɔsiri piin pilige lomboŋgo ki ni;
mì koro ma yere wa na yeresaga na wele yembinɛ li ni fuun li ni.
9 Ye wele, naŋa wa yɛn na paan wa, malaga gbɔnwotoro na,
ŋa shɔnye shyɛn na tilele.
Wì sɛnrɛ ti lɛ na yuun fɔ:
‹Kì to, Babilɔni ca kì to!
Pe yarisunndo yanlɛrɛ tì toori tara, ma yaari.› »
10 E, na woolo, yoro mbele pè ye sun paa yarilire yɛn, wa na yarilire sunsaga ki ni,
ŋga mì logo Yawe Yɛnŋɛlɛ na yawa pi ni fuun fɔ, Izirayɛli* woolo Yɛnŋɛlɛ li yeri,
koyi ŋga mì yo ye kan we.
Yɛnŋɛlɛ yɔn sɛnrɛ nda tìla yo
11 Sɛnŋgbanra nda tìla yo Duma† tara ti wogo na.
Lere wa koro wa Seyiri† tara ma gbele ŋgbanga mala yeri, ma yo fɔ:
«Kɔrɔsiri pyefɔ, yembinɛ li yɛn mɛlɛ?
Kɔrɔsiri pyefɔ, yembinɛ li yɛn mɛlɛ?»
12 A kɔrɔsiri pyefɔ wì suu yɔn sogo ma yo fɔ:
«Lalaaga ki ma pan, yembinɛ fun li ma wɔ.
Na kaa pye ye yɛn na jaa mbe yewe, ye yewe;
ko puŋgo na, ye sɔngɔrɔ ye pan naa fɔnŋgɔ.»
Yɛnŋɛlɛ yɔn sɛnrɛ nda tìla yo
13 Sɛnŋgbanra nda tìla yo Larabu tara ti wogo na.
Yoro Dedan ca yɔngɔmɛ fɛnnɛ mbele tangafɛnnɛ,
ye yaa sa wɔnlɔ wa Larabu tara yan nawa pi ni.
14 Yoro Tema tara fɛnnɛ,
ye sa mbele wɔgɔ yɛn pe na pe fili, ye tɔnmɔ kan pe yeri.
Ye sa yaakara kan mbele paa fee mbe shɔ pe yeri.
15 Katugu pe yɛn na fee tokobi wi yɛgɛ,
tokobi ŋa pè kɔw wa wi wofogo ki ni, pe yɛn na fee wi yɛgɛ,
naa sandiga ŋga pe yɛn na tile pe na ki yɛgɛ,
naa malaga ki jɔlɔgɔ ki yɛgɛ.
16 Katugu pa we Fɔ wìgi yo na kan yɛɛn fɔ: «Sanni yɛlɛ nuŋgba, mbe yala tunmbyee ŋa pe maa sara wi tunŋgo pyeyɛlɛ li ni, mi yaa Kedari tara ti gbɔgɔwɔ pi kɔ pew. 17 Kedari tara maliŋgbɔɔnlɔ mbele pe yɛn sandira wɔnfɛnnɛ jɛmbɛlɛ, pe yaa ka koro jɛgɛlɛ. Katugu Yawe Yɛnŋɛlɛ, Izirayɛli woolo Yɛnŋɛlɛ lo lì yo ma.»