Yɛnŋɛlɛ yɔn sɛnrɛ nda tìla yo
19
1 Sɛnŋgbanra nda tìla yo Ezhipiti tara ti wogo na.Ye wele, Yawe Yɛnŋɛlɛ lì lugu kambaaga ŋga kì wege ka na,
li yɛn na paan wa Ezhipiti tara.
Ezhipiti tara fɛnnɛ pe yarisunndo ti yɛn na seri li yɛgɛ sɔgɔwɔ fyɛrɛ ti kala na.
Ezhipiti tara fɛnnɛ pe sunndo wi yɛn na kɔɔn pe na.
2 We Fɔ* wì yo fɔ:
«Mi yaa Ezhipiti tara fɛnnɛ pe sun mbe pe wa pe yɛɛ na.
Nɔsepiile nambala pe yaa ka wiin pe yɛɛ ni,
wɛnnɛ pe yaa kaa wiin pe yɛɛ ni,
cara ti yaa kaa wiin ti yɛɛ ni, wunluwɔ tara ti yaa kaa wiin ti yɛɛ ni.
3 Ezhipiti tara fɛnnɛ pe yaa ka kotogo la,
kagala ŋgele pè kɔn ma tɛgɛ mbe pye mi yaa ka ke jɔgɔ.
Pa kona pe yaa ka saa jɛlɛ pe yarisunndo fɛnnɛ pe yeri, naa kajɛnmɛ pyefɛnnɛ pe yeri
naa kuulo yewefɛnnɛ konaa jɛlɛfɛnnɛ pe yeri.
4 Mi yaa Ezhipiti tara fɛnnɛ pe le tafɔ wɛlɛwɛ wa kɛɛ,
wunlunaŋa tipee wɛlɛwɛ wa wi yaa ka cɛn pe go na.
We Fɔ, Yawe Yɛnŋɛlɛ na yawa pi ni fuun fɔ lo lì yo ma.»
5 Kɔgɔje tɔnmɔ pi yaa ka waga,
Nili gbaan tɔnmɔ pi yaa ka kɔ.
6 Gbaanla tɔnmɔ pi yaa ka jɔgɔ,
Ezhipiti tara Nili gbaan njere tɔnmɔ pi yaa ka tigi mbe waga;
gbagara wo naa yan ki ni, ti yaa ka waga.
7 Yan ŋga fuun ki yɛn Nili gbaan wi yɔn ki na ma kari, konaa wa gbaan wi yesaga wa kɔgɔje wi ni,
yaraga o yaraga pe ma lugu Nili gbaan wi yɔn na, ki ni fuun ki yaa ka waga,
tifɛlɛgɛ ki yaa kaga lɛ mbe kari ki ni, mbege kɔ pew.
8 Ŋgbanra wɔfɛnnɛ pe yɛn na jɛɛn,
mbele pe maa njegeŋgele ke waa wa Nili gbaan wi ni, pe yaa kaa kunwɔ gbelege gbele,
mbele pe yɛn na mɛrɛ ti waa wa Nili gbaan wi ni, pe jigi wi yaa ka kɔn pe na.
9 Mbele pe maa lɛn jese tiyɔɔn wi tunŋgo piin, pe jatere wi yaa piri pe na;
jɛɛlɛ mbele pe maa jese wi cɔnri konaa nambala mbele pe maa parisanyɛɛrɛ fire fire ti tiin, pe yaa ka fɛrɛ shɔ.
10 Pe gbɛrɛ tifɛnɛ pe jigi wi yaa ka kɔn pe na,
mbele pe yɛn na tunŋgo piin sara na, pe jatere wi yaa ka piri pe na.
11 Zowan† ca teele pe yɛn lembire,
Farawɔn* wi kajɛnmbɛlɛ mbele pe yɛn wi yɛrifɛnnɛ, pe yɛn tijinliwɛ fu fɛnnɛ.
Ye mbe ya saga yo Farawɔn wi kan mɛlɛ mbe yo fɔ:
«We yɛn kajɛnmbɛlɛ piile,
we yɛn wunlumbolo lɛɛlɛ piile?»
12 Ye kajɛnmbɛlɛ pe yɛn se san?
Yawe Yɛnŋɛlɛ na yawa pi ni fuun fɔ lì kagala ŋgele kɔn ma tɛgɛ Ezhipiti tara ti wogo na,
ye ti pe ke yo ye kan ye ke jɛn yiŋgɔ ye!
13 Zowan ca teele pe jatere wì jɔgɔ pe na,
Mɛfisi† ca teele pe yɛn na pe yɛɛ fanla;
Ezhipiti tara cɛngɛlɛ teele paa Ezhipiti tara fɛnnɛ pe fanla na pe punŋgu.
14 Yawe Yɛnŋɛlɛ lì yɛkanŋguwa yama wa pe na,
ma ti Ezhipiti tara fɛnnɛ pe yɛn na punŋgu wa pe kapyere ti ni fuun ti ni,
paa yɛgɛ ŋga na sinwɔɔ ma kaa gbali ma to wa wi yɛɛra tuguro ti ni we.
15 Lere kpɛ se ka ta wa Ezhipiti tara mbe kala la yɔn tara ti kan naa;
yɛkelewe se ka ya, puŋgofɔ se ka ya,
legbɔɔ se ka ya, lepile se ka ya†.
16 Ko pilige ko ni, Ezhipiti tara fɛnnɛ pe yaa ka pye paa jɛɛlɛ yɛn. Yawe Yɛnŋɛlɛ na yawa pi ni fuun fɔ, na liga kali kɛɛ ki yirige pe na mbege fige pe go na, pe yaa kaa seri fyɛrɛ ti kala na. 17 Zhuda tara ti yaa ka pye sunndo kɔngɔ yaraga Ezhipiti tara fɛnnɛ pe yeri. Na lere wa ka ka Zhuda tara mɛgɛ ki yeri pe yɛgɛ na sanga o sanga, pe yaa la fyɛ kagala ŋgele Yawe Yɛnŋɛlɛ na yawa pi ni fuun fɔ lì kɔn ma tɛgɛ mbe pye pe na ke kala na.
18 Ko pilige ko ni, cara kaŋgurugo yaa ka ta wa Ezhipiti tara, nda ti woolo pe yaa kaa Eburuye sɛnrɛ ti yuun. Pe yaa kaa wungu Yawe Yɛnŋɛlɛ na yawa pi ni fuun fɔ li mɛgɛ ki na. Wa ki cara ti ni, pe yaa kaa nuŋgba yinri Yɔnlɔ ca†.
19 Ko pilige ko ni, saraga wɔsaga* ka yaa ka pye wa Ezhipiti tara ti nandogomɔ Yawe Yɛnŋɛlɛ li mɛgɛ ni; pe yaa ka sinndɛlɛgɛ titɔnlɔgɔ ka yerege wa tara ti kɔnlɔ li na Yawe Yɛnŋɛlɛ li mɛgɛ ni, mbege pye nandowo yaraga. 20 Ki yaa ka pye kacɛn naa sɛrɛya yaraga Yawe Yɛnŋɛlɛ na yawa pi ni fuun fɔ li wogo na, mbege naga fɔ li yɛn wa Ezhipiti tara ti ni; na paga kaa gbele mbaa Yawe Yɛnŋɛlɛ li yinri pe jɔlɔfɛnnɛ pe kɛɛ sanga ŋa ni, pa li yaa ka shɔfɔ torogo pe kan, ŋa wi yaa ka yere pe go kala li ni, mbe pe shɔ pe juguye pe kɛɛ. 21 Yawe Yɛnŋɛlɛ li yaa ka li yɛɛ naga Ezhipiti tara fɛnnɛ pe na; Ezhipiti tara fɛnnɛ pe yaa ka Yawe Yɛnŋɛlɛ li jɛn pe Yɛnŋɛlɛ ko pilige ko ni. Pe yaa kaa li gbogo saara wɔgɔ naa yarikanra ni. Pe yaa ka yɔn fɔgɔlɔ* kɔn Yawe Yɛnŋɛlɛ li yeri, mbe ke yɔn fili. 22 Yawe Yɛnŋɛlɛ li yaa ka Ezhipiti tara fɛnnɛ pe jɔlɔ; li yaa ka pe jɔlɔ, ɛɛn fɔ li yaa ka pe sagala. Poro jate pe yaa ka sɔnrɔgɔ mbe pan Yawe Yɛnŋɛlɛ li kɔrɔgɔ. Li yaa ka yɛnlɛ pe yɛnrɛwɛ pi na, mbe pe sagala.
23 Ko pilige ko ni, koŋgbɔgɔ ka yaa ka yiri wa Ezhipiti tara mbe kari wa Asiri tara. Asiri tara fɛnnɛ pe yaa kaa kee wa Ezhipiti tara, Ezhipiti tara fɛnnɛ paa paan wa Asiri tara. Ezhipiti tara fɛnnɛ poro naa Asiri tara fɛnnɛ pe ni, pe yaa ka pinlɛ mbaa tunŋgo piin Yawe Yɛnŋɛlɛ li kan.
24 Ko pilige ko ni, Izirayɛli* tara to ti yaa ka pye tara taanri woro mbe taga Ezhipiti tara naa Asiri tara ti na; ki tara taanri ti kala na, Yawe Yɛnŋɛlɛ li yaa ka duwaw dunruya woolo pe na. 25 Yawe Yɛnŋɛlɛ na yawa pi ni fuun fɔ li yaa ka duwaw pe na, mbe yo fɔ: «Fɛrɛwɛ yɛn Ezhipiti tara fɛnnɛ pe woo, poro mbele pe yɛn na woolo; fɛrɛwɛ yɛn Asiri tara fɛnnɛ pe woo, poro mbele mì da na kɛɛ ki ni we; fɛrɛwɛ yɛn Izirayɛli woolo pe woo, poro mbele pe yɛn na kɔrɔgɔ ye.»