8
1 E, ndɛɛ ki pye ma yɛn na nɔsepyɔ lenaŋa,ŋa mi naa wo, wè nɔ yinnɛ nuŋgba li wɔnri ma we yɛɛ kan,
mi jɛn na yiri mbɔɔn fili wa funwa na, mbe kɛyɛn wa ma yɔlɔgɔ,
lere kpɛ se jɛn naa na tifaga.
2 Mi jɛn na kari ma ni, mbe sa ye ma ni wa na nɔ wi go,
ma jɛn nala naga ndanlawa kala li ni.
Mi jɛn na duvɛn taan kan ma yeri maa wɔ,
mbanla girenadi tige pire tɔnmɔ pa kan ma yeri.
3 Wi kamɛŋgɛ ko mbanla go ki tɔgɔ,
wi kalige ko mbaa na talitali.
4 Zheruzalɛmu ca sumbonɔ, mi yɛn na ye yɛnri ŋgbanga,
yaga kanla ndanlafɔ wi yirige,
yaga kaa yɛn mboo yirige
mbege ta wi faa ki jaa gbɛn.
(Sumbonɔ pe sɛnyoro)
5 Ambɔ wi yɛn ki jɛlɛ ŋa wi yɛn na yinrigi wa gbinri* wi ni na paan,
ma tɛlɛgɛ wi ndanlafɔ wi na?
Ndanlawa pi yɛn fanŋga ni
(Sumboro wi sɛnyoro)
Mɔ̀ɔ yɛn mɔɔ yirige wa pɔmu tige ki nɔgɔ,
wa laga ŋga ma nɔ wìla ma kugbɔ ki lɛ,
wa laga ŋga wìla ma se we.
6 Na kala li tɛgɛ wa ma kotogo ki na paa tɛgɛrɛ yɛn,
na tɛgɛ ma yɛɛ tanla paa tɛgɛrɛ tɛgɛyaraga yɛn wa ma kɛɛ ki na;
katugu ndanlawa pi yɛn fanŋga ni paa kunwɔ pi yɛn,
yenjaga kì pe paa kuulo tara* ti yɛn.
Ndanlawa pi kasɔn ki yɛn paa kasɔn ŋgbanli yɛn,
paa yɛnŋɛlɛ gbanlaga kasɔn gbɔgɔ yɛn ma yiri wa Yawe Yɛnŋɛlɛ li yeri.
7 Tɔnŋgbɔɔ pi ni fuun pi se ya mbe ndanlawa pi kasɔn ki figi,
gbaanla tɔnmɔ pi se ya mbe ndanlawa pi tɔn.
Ali na lere wa ka wi go yarijɛndɛ ti ni fuun ti kan mbe yo wi yaa ndanlawa pi lɔ,
wi se yaraga ko ka ta, kaawɔ tifagawa.
(Sumboro wi nɔsepiile nambala
8 We jɔnlɔ sumboro wa yɛn wa,
wi fa yinŋgele yiri gbɛn.
Yiŋgi we yaa ka pye mbe we jɔnlɔ sumboro wi saga,
na paga kaa ki jaa mboo pɔri pilige ŋga ni we?
9 Ndɛɛ ki pye we jɔnlɔ wi yɛn paa malaga sigembogo* yɛn,
we jɛn na warifuwe sanŋgazo kan wa wi go na mbaa wi go singi.
Ndɛɛ ki pye wi yɛn paa yeyɔngɔ yɛn,
we jɛn naga tɔn mbege fere sɛdiri* tire papara papara fanŋga woro ni.
(Sumboro wi sɛnyoro)
10 Mi yɛn paa malaga sigembogo yɛn,
ɛɛn fɔ koni na yinŋgele ke yɛn paa sanŋgazoye yɛn.
Kì pye ma, mi wo na, mi yɛn na ndanlafɔ wi yeri paa yɛyinŋge ki kanfɔ yɛn wi yeri.
(Lefɔnŋɔ wi sɛnyoro)
11 Ɛrɛzɛn* kɛɛrɛ la pye Salomɔ wi yeri wa Baali Hamɔ laga ki na,
a wì siri telege kɛrɛ welefɛnnɛ pele na paa ti wele.
Pe ni fuun nuŋgba nuŋgba paa daga mbaa wi kaan warifuwe pyɔ waga kele ŋgele (1 000) ni wi tige pire ti sɔnŋgɔ.
12 Mi na ɛrɛzɛn kɛrɛ to yɛn laga na yɛgɛ sɔgɔwɔ.
Salomɔ, mboro mbaa kee ma warifuwe pyɔ waga kele (1 000) wi ni,
warifuwe pyɔ cɛnmɛ shyɛnzhyɛn (200) wo mbe pye kɛrɛ welefɛnnɛ poro woo.
13 Mboro sumboro ŋa ma yɛn ma cɛn wa naŋgɔ kɔlɔgɔ ki ni,
na pinlɛyɛɛnlɛ pèle nuŋgbogolo jan naga jaa mbɔɔn magala li logo.
Ki yaga mbɔɔn magala li logo san!
(Sumboro wi sɛnyoro)
14 Ta fee maa paan, na ndanlafɔ,
paa lufaa yɛn, nakoma paa safuwe pyɔ yɛn,
ŋa wi yɛn na yeni na kanni wa yanwira nda nuwɔ taan tipire ti yɛn wa ti go na.