Kajɛnmɛ pi fanŋga
10
1 Tishɔnrɔ ti ka ku wa sinmɛ nuwɔ taan pi ni, ti maa jɔgɔ mboo nuwɔ pi ŋgban yɛgɛ ŋga na,ki pyelɔmɔ nuŋgba pi na, lembigewe jɛnri pi ma kajɛnmɛ pi jɔgɔ mbe sɛnwee wi gbɔgɔwɔ pi laga wi na.
2 Kajɛnŋɛ wi jatere wi maa kee wi ni kalige na,
ɛɛn fɔ lembige ki jatere wo maa kee ki ni kamɛŋgɛ na.
3 Ali na lembige ki kaa tanri la kee wa konɔ, tijinliwɛ na pye ki ni,
ki maa ki nari lere pyew wi na ma yo ki yɛn lembige†.
4 Na kundigi wi ka nawa ŋgban ma ni, ma koro le ma cɛnsaga,
katugu mbe pyeri yɛw, ki ma kajɔgɔrɔ lɛgɛrɛ kɔ.
5 Mì kapege ka yan laga tara ti na,
ko ki yɛn tara teele pe punŋguwɔ we.
6 Lembige ka ma kaa cɛnsagbɔgɔ ta,
ma si yala, mɛgbɔgɔ fɛnnɛ† poro yɛn ma cɛn wa nɔgɔna.
7 Mì kulolo pele yan pè lugu shɔnye na,
ma si yala, wunluwɔ piile pele yɛn na tanri tara paa kulolo yɛn.
8 Lere ŋa wi yɛn na titɛgɛ woo, ki fɔ wi mbe ya to wa ki ni;
lere ŋa wi yɛn na mbogo jaanri, ki fɔ wɔɔgɔ mbe ya mboo nɔ.
9 Lere ŋa wi yɛn na sinndɛɛrɛ woo, ki fɔ sinndɛlɛgɛ mbe ya mboo wɛlɛgɛ;
lere ŋa wi yɛn na kanŋgirɛ walagi, ki fɔ kaŋgbanga mbe ya mboo ta.
10 Na gbɔnlɔgɔ ki yɔn kiga pɛn, na lere sigi yɔn ki yɔ,
kona tunmbyee ŋa wila kɔɔn ki ni, wo wi daga mbe ka taga wi fanŋga ki na;
ɛɛn fɔ kajɛnmɛ pi maga kan tunŋgo ki ma pye ma yɔn.
11 Sanni wɔɔrɔ yigifɔ wi saa jɛnmɛ pi pye, na wɔɔgɔ ka lere wa nɔ,
kona go woro ki na wɔɔrɔ yigifɔ wuu jɛnmɛ pi pye naa.
Maga kaa para mbe sa toro
12 Kajɛnŋɛ wi yɔn sɛnrɛ ti ma ti leele pe ma yɛnlɛ wi na;
ɛɛn fɔ lembige ki yɔn ki maga jɔgɔ.
13 Ki ma ki sɛnrɛ ti lɛ lembigewe sɛnrɛ ni, mbe sari kɔ yara tijangara sɛnrɛ ni.
14 Lembige ki maa sɛnrɛ ti lege na kee.
Sɛnwee se ya mbe kala na laa paan wa yɛgɛ li jɛn.
Ŋga ki yaa ka pye wi punŋgo na, ambɔ wi mbe ya mbege yo wi kan?
15 Lembige ki tunŋgo ki maga te jaga,
ali yɛrɛ ki ca konɔ kila li jɛn mbeli lɛ.
16 Tara nda ti wunlunaŋa wi yɛn pyɔ jɛɛ,
to nda ti teele pe maga lɛ pinliwɛ ni na liwɛn gbɔɔ nii,
jɔlɔgɔ yɛn ki tara ti wogo!
17 Ɛɛn fɔ tara nda ti wunlunaŋa wi sege ki yɛn mɛgbɔgɔ fɛnnɛ wogo,
to nda ti legbɔɔlɔ pe maa nii na yala wagati ŋa wì yala wi ni, jaŋgo mbe ta mbe fanŋga ta,
paa si sinmɛ wɔ mbe tin,
fɛrɛwɛ yɛn ki tara ti wogo!
18 Tiyanra to ti ma ti sɛnwee wi go ki naayeri wi ma kɔn ma to;
na lere ŋa woro na tunŋgo piin, tisaga ki maa yiin wa wi go.
19 Leele pe ma sɔgɔlɔ gbɔlɔ li sɔgɔ mbe nayinmɛ li,
duvɛn wi ma yɔgɔrimɔ kan pe yeri,
penjara ti ma kala pyew li yɛgɛ wɔ.
20 Maga ka sɛnpere yo wunlunaŋa wi na, ali yɛrɛ wa ma kotogo na;
maga ka sɛnpere yo penjagbɔrɔ fɔ wa na, ali yɛrɛ wa ma yumbyɔ ŋa ma maa wɔnlɔ wi ni;
katugu sannjɛlɛ la mbe ya mbɔɔn sɛnyoro ti lɛ mbe kari ti ni;
kanwira fɔ wa mbe ya mbe kari saga sɛnrɛ ti yari lagapyew.