Ŋga kì yɔn sɛnwee wi kan
7
1 Mɛtanga tawa pì mbɔnrɔ sinmɛ nuwɔ taan sɔnŋgbanga woo na,sɛnwee wi kupilige kì mbɔnrɔ wi sepilige ki na.
2 Mbe kari kunwɔ go ni
kì mbɔnrɔ mbe kari liwɛn gbɔɔ lisaga ko na;
katugu kunwɔ po pi yɛn lere pyew wi kɔsaga ye.
Sɛnwee piile pe daga mbaa sɔnri ki wogo ki na jɛŋgɛ.
3 Yɛsanga kì mbɔnrɔ titɛgɛrɛ na,
katugu yɛsanga ki ma ti sɛnwee wi ma jatere jɛnŋɛ ta.
4 Kajɛnŋɛ wi maa jatere piin kunwɔ go wogo ki na,
ɛɛn fɔ lembige ko maa jatere piin katangala pyege go ko na.
5 Mbe kajɛnŋɛ wi yɛrɛwɛ sɛnŋgbanra ti logo,
ko mbɔnrɔ lembige ki yuuro logowo po na.
6 Wuuro ti maa fuunru wa kasɔn ki ni cɔgɔ ki nɔgɔ yɛgɛ ŋga na,
pa lembige ki titɛgɛrɛ ti ma pye ma fun.
Ko fun ki yɛn wagafe.
7 Mbe jɔlɔgɔ ki taga kajɛnŋɛ wi na, ki maa pye lembige,
yarikanra ti ma sɛnwee wi jatere jɛnŋɛ wi jɔgɔ wi na.
8 Kala li kɔsaga kì mbɔnrɔ li lɛsaga ki na,
mbaa kala kunni yɛɛ ni kì mbɔnrɔ yɛɛ gbɔgɔwɔ na.
9 Maga kaa kɔnrɔ taa jaga jaga,
katugu naŋgbanwa pi ma pye lembire to woo†.
10 Maga ka yewe mbe yo fɔ: «Yiŋgi na faa wagati wo la si tanla nala wo na?»
Katugu ki yewige ki woro kajɛnmɛ wogo.
11 Kajɛnmɛ pi yɛn ma yɔn paa kɔrɔgɔ yɛn,
mbele fuun pe yɛn yinwege na, pe maa tɔnli taa wa pi ni.
12 Kajɛnmɛ pi ma lere fɛrɛ tɔn paa yɛgɛ ŋga na penjara ti ma lere fɛrɛ tɔn we;
ɛɛn fɔ kajɛnmɛ pi kayɔngɔ ko yɛn fɔ mbele kaa ta, pi ma yinwege kan pe yeri.
Ki kala na, mboo jɛn ki yɛn tɔnli ni.
13 Yɛnŋɛlɛ li kapyegele ke wele!
Yaraga ŋga kì kuru, ambɔ wi mbe ya mbege sin?
14 Fɛrɛwɛ pilige ka pan, maa yɔgɔri!
Ɛɛn fɔ jɔlɔgɔ pilige ka pan, maa sɔnri!
Katugu Yɛnŋɛlɛ lo lìgi kagala shyɛn ke pye ma ke yala,
jaŋgo ŋga ki yaa ka pye sɛnwee wi puŋgo na, wiga kaga jɛn.
Sɛnwee wi daga
15 Na yinwege jɛnri ŋga mì pye ki ni, ko ŋga ki woro yaraga ka, mìgi kagala ŋgele ke ni fuun ke yan. Lesinŋɛ wa ma ku fyaw, ali mbege ta wi yɛn ma sin; ma si yala lepee wa ma yinwetɔnlɔgɔ ta wi tipewe po naa ki ni fuun ni. 16 Maga kɔɔn yɛɛ pye lesinŋɛ mbe sa toro, maga si kɔɔn yɛɛ pye kajɛnŋɛ mbe sa toro. Yiŋgi na mɛɛ ma yɛɛ jɔgɔ? 17 Maga ka pye lepee mbe sa toro, maga si ka pye lembige fun. Yiŋgi na ma yaa ti ma ku fyaw, na ma kusanga wi fa gbɔn gbɛn? 18 Ki yɛn ma yɔn, maga yɛrɛwɛ sɛnrɛ shyɛn nda ti yigi, maga ka ti ta mbe shɔ ma yeri ti shyɛn ti ni; katugu lere o lere wi maa fyɛ Yɛnŋɛlɛ li yɛgɛ, wi yaa yigilɔmɔ ta ki kagala shyɛn ŋgele ke na.
19 Kajɛnmɛ pi ma fanŋga kan kajɛnŋɛ wi yeri mbe wɛ ca ki fanŋga fɛnnɛ kɛ na. 20 Lere wo wa woro sinŋɛ laga dunruya wi ni, ŋa wi maa kajɛŋgɛ piin, wi fa wa mbe la mbe kapege pye.
21 Maga kaa sɛnrɛ nda fuun leele pe maa yuun ti nuru, nakoma ma yaa kaga logo fɔ ma tunmbyee wi yɛn na sɛnpere yuun ma kanŋgɔlɔ; 22 katugu mboro yɛrɛ jate màga jɛn ma yo wagati lɛgɛrɛ na mà sɛnpere yo pele yɛgɛ na.
23 Mìgi kagala ŋgele ke ni fuun ke cancan ma wele kajɛnmɛ pi fanŋga na, a mì silan yɛɛ pye fɔ: «Mila jaa mbe kajɛnmɛ ta.» Ɛɛn fɔ kajɛnmɛ pi laga la lali na ni. 24 Yaraga ŋga ki yɛn wa, ki yɛn ma lali, ki kɔrɔ wì jugo fɔ ma jugo. Ambɔ wi mbe ya mbege jɛn mbe wali ki na? 25 Kona, a mì silan yɛɛ kan na kotogo ki ni fuun ki ni, jaŋgo mbe kajɛnmɛ po naa kagala ke pyego ki ni ti sagaja, mberi cancan mbe wele, mberi kɔrɔ jɛn; a mì sigi wele maga yan fɔ mbe pye lepee ki yɛn lembigewe, fɔ kambajɛnmɛ pi yɛn yara kapyere.
26 Mì kala la yɛgɛ wele ma yan, na lì pe ma wɛ kunwɔ pi na. Lo yɛn fɔ jɛlɛ ŋa wi yɛn paa pɛnɛ yɛn mbe lere yigi, wi nawa pi yɛn paa mɛrɛ yɛn, wi kɛyɛn yi yɛn paa yɔngɔwɔ yɛn, mba pi ma lere pɔ. Lere ŋa wi kala li yɛn ma Yɛnŋɛlɛ li ndanla, wo ma shɔ wi yeri. Ɛɛn fɔ wi ma kapege pyefɔ wo yigi.
27 Yɛnŋɛlɛ sɛnrɛ yofɔ wì yo fɔ: «Mì kagala ke cancan nuŋgba nuŋgba mbe ke pyego ki jɛn, ŋga mì yan wa koyi ŋga. 28 Mi yɛn na yaraga nuŋgba ki lagajaa ali ma pan ma gbɔn yiŋgɔ, mi fa yɛgɛ ta ki na gbɛn. Mì naŋa nuŋgba ta wa nambala wagakele (1 000) sɔgɔwɔ; ŋa wi yɛn ki naŋa sinŋɛ we; ɛɛn fɔ wa jɛɛlɛ pe ni fuun pe sɔgɔwɔ, mii jɛlɛ nuŋgba yan wa, ŋa wi yɛn ki jɛlɛ. 29 Kala nuŋgba mì yan wa, loli na fɔ: ‹Yɛnŋɛlɛ lì sɛnwee wi da lesinŋɛ, ɛɛn fɔ sɛnwee wo wì kapyere ti lagaja mari ŋgban wi yɛɛ na.› »