Yɛrɛwɛ sɛnrɛ nda tì kan
24
1 Maga kaa yɛgɛ yinrigi lepeele pe na,maga kaa ki jaa mbe pye pe pinlɛyɛɛnlɛ;
2 katugu lewɛlɛwɛ kapyere to pe maa jate mbaa piin,
tipege ŋga pe yaa pye ko sɛnrɛ pe maa yuun.
3 Kajɛnmɛ po fanŋga na lere ma ya ma go kan,
tijinliwɛ po fanŋga na ki ma yeresaga ta.
4 Jɛnmɛ pi fanŋga na, pe ma yumbiile pe yinyin
yarijɛndɛ sɔnŋgbanga woro ti cɛnlɛ pyew naa ti tiyɔnrɔ ta ni.
5 Sɛnwee kajɛnŋɛ wi ma pye fanŋga ni,
lere ŋa wì jɛnmɛ ta wi maa ka tari wi fanŋga ki na.
6 Kagala pyelɔmɔ jatere jɛnŋɛ wi ma ti ma ma ya ma malaga gbɔn;
na yɛrifɛnnɛ paga lɛgɛ, ma ma cew ta.
7 Kajɛnmɛ pi laga yɛn ma lali tijinliwɛ fu fɔ wi ni,
ki kala na wi se ya para wa kagala yɛgɛ wɔsaga, wa ca ki mbogo yeyɔngɔ ki na.
8 Lere ŋa wi maa ki sɔnri mbe kapege pye,
pe maa ko fɔ wo yinri jɔgɔfɔ.
9 Tijinliwɛ fu fɔ, kapege ko wi maa jate mbaa piin,
lere ŋa wi maa kala lakoo, wi kala li ma tijanga leele pe yɛgɛ.
10 Na maga kotogo la kaŋgbanga sanga ni,
kona ma fanŋga kì kologo fɔ jɛŋgɛ.
11 Pe yɛn na kee mbele ni sa pe gbo, pe shɔ,
pe yɛn na mbele tilele na kee pe gbosaga, pe shɔ.
12 Nakoma, na ma ka yo fɔ: «Mi sila ki jɛn!»
Kona ŋa wi maa sɛnwee wi nawa pi cancan na wele, wo sege yan wi le?
Ŋa wi yɛn nɔɔ yinwege ki kɔrɔsi, wo sege jɛn wi le?
Wi yaa ka sɛnwee nuŋgba nuŋgba pyew wi sara mbe yala wi kapyege ki ni.
13 Na pinambyɔ, sɛnrɛgɛ ki ka, katugu ki yɛn ma yɔn;
sɛnrɛgɛ sheshege ki ma tanla wa ma yɔn.
14 Ki pyelɔmɔ nuŋgba pi na, ki jɛn ma yo fɔ kajɛnmɛ pi yɛn ma yɔn fun wa ma kotogo na,
na ma kaa ta, pi yaa ma wogo ki yɔn goto;
ma jigi wi se kɔn ma na.
15 Maga ka pye lepee mbe sa lara mbe lesinŋɛ wi sige wa wi go yɔn ki na;
maga si kaa cɛnsaga ki jɔgɔ wi yeri;
16 katugu lesinŋɛ wi mbe ya to sa gbɔn tosaga kɔlɔshyɛn, ɛɛn fɔ wi yaa si yiri ki ni fuun ki na,
ɛɛn fɔ na jɔlɔgɔ ka to lepee wi na, wi ma kɔ wa ki ni.
17 Na ma jugu wi ka to, maga kaa yɔgɔri wi na;
na wi ka si kurugo, ki ka kɔɔn nawa pi yinŋgi ma na.
18 Nakoma Yawe Yɛnŋɛlɛ li kaga yan ma, ki yaa li mbɛn;
pa kona, naŋgbanwa mba pìla pye li ni ma jugu wi ni, li yaa pi kɔ.
19 Maga ka nawa ŋgban kapege pyefɔ wi kala na,
maga kaa yɛgɛ yinrigi lepeele pe na;
20 katugu lepee wi goto wi se yɔn,
lepee wi yinwege ki yɛn paa fitanla yɛn, ŋa wi yaa ka figi.
21 Na pinambyɔ, ta fyɛ Yawe Yɛnŋɛlɛ li yɛgɛ konaa wunlunaŋa wi yɛgɛ,
maga ka pinlɛ leele mbele pè yiri ma je pe ni;
22 katugu jɔgɔwɔ pi yaa fo mbe to pe na;
Yawe Yɛnŋɛlɛ lo naa wunlunaŋa wi ni pe yaa jɔlɔgɔ ŋga wa ma na, ambɔ wi mbe ya ko jɛn?
23 Sɛnrɛ ta yɛgɛ nda, ma yiri wa kajɛnmbɛlɛ pe yeri.
Mbe lere wa mbɔnrɔ wa na kiti kɔngɔ na,
ki woro ma yɔn.
24 Lere ŋa wi ma lepee wi pye fɔ: «Ma yɛn ma sin!»
Janwa wi yaa wi daŋga,
leele pe yaa wi mɛgɛ ki pɛn.
25 Ɛɛn fɔ lere ŋa wi ma kapege pyefɔ wi jɛrɛgi, ki fɔ wi wogo ki yaa yɔn,
wi yaa duwaw naa mɛtanga ta leele pe yeri.
26 Mbe yɔn sogomɔ kan lere yeri nawa jɛmbɛ ni,
ko ki maga naga ma yo ma yɛn wɛɛnrɛ jɛndɛ na ki fɔ wi ni.
27 Ma tunndo ti gbɛgɛlɛ mari yala wa funwa na,
mɔɔ kɛɛrɛ tunndo ti gbɛgɛlɛ mari yala,
ko puŋgo na, ma mbe ya mbɔɔn go ki kan.
28 Maga ka sɛrɛya pee yo mbe taga ma lewee yɛnlɛ wi na go fu,
maga ka lere fanla mboo puŋgo ma sɛnrɛ ti ni.
29 Maga ka yo fɔ: «Ŋga wì pye na na, ko yɔngɔ mi yaa pye wi na fun;
mi yaa ŋga wì pye na na ki fɔgɔ tɔn wi na.»
Ŋga tiyanra ti maa piin
30 Mìla toro tiyanŋa wa kɛrɛ tanla,
konaa tijinliwɛ fu fɔ wa ɛrɛzɛn* kɛrɛ tanla.
31 Mbe ka wele, a mì si wuuro yan tì fi kɛrɛ ti lagapyew ki ni,
yan pege la fi ma lagapyew ki tɔn;
sinndɛɛrɛ mbogo ŋga pàa kan mari maga, kìla toori.
32 Ŋga mìla yan, a mì si jatere pye ki na jɛŋgɛ,
a kì si nagawa kan na yeri.
33 Mbe wɔnlɔ jɛnri, mbe wɔnlɔ mbe tigi jɛnri,
mbe sinlɛ mbɔɔn kɛyɛn yi migi yi yɛɛ ni,
34 na maga koro ko na, fyɔnwɔ pi yaa ka to ma na mbɔɔn fo paa yoo yɛn,
jɔlɔgɔ ki yaa ka pan mbɔɔn fo paa beŋganri pyefɔ yɛn.