22
1 Mɛtanga kì mbɔnrɔ yarijɛndɛ lɛgɛrɛ tawa na,ma kala li ka leele pe ndanla ko mbɔnrɔ warifuwe naa tɛ na.
2 Penjagbɔrɔ fɔ wo naa fyɔnwɔ fɔ wi ni pe yɛn ja,
Yawe Yɛnŋɛlɛ lo lì pe ni fuun shyɛn pe da.
3 Lere ŋa wì jilige, wi ka tipege ki yan kila paan, wi ma lara;
ɛɛn fɔ kambajɛnŋɛ wo ma tipege ki yan, ma saa ye wa ki ni ma jɔlɔgɔ wa wi yɛɛ na.
4 Mbɔɔn yɛɛ go sogo, konaa mbaa fyɛ Yawe Yɛnŋɛlɛ li yɛgɛ,
ki tɔnli wo wi yɛn penjagbɔrɔ tawa, naa gbɔgɔwɔ konaa yinwetɔnlɔgɔ.
5 Wuuro naa pɛŋgɛlɛ ma pye wa lembasinŋɛ wi konɔ li ni,
ɛɛn fɔ lere ŋa wi maa wi yɛɛ yinwege ki jaa, wi maa yɛɛ laga lali li ni.
6 Konɔ jɛnnɛ na pyɔ wi daga mbaa tanri li na, wi naga li ni,
ali na wi ka ka yiri mbe lɛ, wi se wɔ wa li ni.
7 Penjagbɔrɔ fɔ wi ma cɛn fyɔnwɔ fɛnnɛ pe go na,
fɔgɔ kɔnfɔ wi ma pye fɔgɔ tagafɔ wi kulo.
8 Lere ŋa kaa kambasinŋge piin, tipege wi ma ta,
wi lewɛlɛwɛ kapyere wi maa ti piin fanŋga ŋga ni, ki yaa ka kɔ.
9 Lere ŋa wi maa kajɛŋgɛ piin wi yaa duwaw ta,
katugu wi maa wi yaakara ta kaan fyɔnwɔ fɛnnɛ pe yeri.
10 Lere ŋa wi maa tɛgɛ leele na, wi purɔ, pa malaga ki yaa kɔ;
kendige wɔgɔ konaa mbaa ye yɛɛ tifaga ki yaa kɔ fun.
11 Lere ŋa ki yɛn maa ndanla wi nawa pi filige wi na, a wila sɛnjɛndɛ yuun,
wi mbe ya pye wunlunaŋa wi wɔnlɔ.
12 Jɛnmɛ jɛmbɛ pi yɛn lere ŋa yeri, Yawe Yɛnŋɛlɛ li maa wele wi na;
ɛɛn fɔ li ma nambara fɔ wi sɛnrɛ to jɔgɔ.
13 Tiyanŋa wi ma yo fɔ: «Jara yɛn wa funwa na!
Na mi ka yiri, wi yaa na gbo wa konɔ!»
14 Jɛɛlɛ nandaala pe yɔn sɛnrɛ ti yɛn paa wetijugo yɛn,
Yawe Yɛnŋɛlɛ li ka nawa ŋgban naŋa ŋa ni, wo wi ma to wa ki ni.
15 Tijinliwɛ fu kapyere to ti ma pye wa pyɔ wi kotogo na,
mboo gbɔn sanwiga ni mboo koro, ko ki maa wɔ ti ni.
16 Lere ŋa wi ma fyɔnwɔ fɔ wi jɔlɔ mbe ta mbe ka taga wi yarijɛndɛ ti na,
nakoma lere ŋa wi ma yarikanra kan penjagbɔrɔ fɔ wi yeri, ki lerefɔ wi ma kaa pye fyɔnwɔ fɔ.
Yɛrɛwɛ sɛnrɛ kagala kele na
17 Nuŋgbolo jan ma kajɛnmbɛlɛ pe sɛnrɛ ti logo,
ma jatere wi tɛgɛ jɛnmɛ sɛnrɛ nda mila yuun ti na.
18 Katugu ki yaa nayinmɛ kan ma yeri, na ma kari tɛgɛ wa ma nawa we;
ma gbɛgɛlɛ maa ti yuun na sɛnrɛ ka pan.
19 Mila jaa mbɔɔn naga nala,
jaŋgo mɔɔ jigi wi taga Yawe Yɛnŋɛlɛ li na.
20 Mi yo mì yɛrɛwɛ sɛnrɛ nafa ma yiri kɛ yɔnlɔgɔ ma kan ma yeri,
mbaa ma yɛrɛgi konaa mbaa jɛnmɛ kaan ma yeri?
21 Jaŋgo mbe ŋga ki yɛn tagawa ni konaa kaselege ki ni, ti naga ma na;
ki ka pye ma, lere ŋa wɔ̀ɔn tun ma sa kaselege ki lagaja, ma ta ma yɔn sogomɔ jɛmbɛ kan wi yeri.
22 Maga ka fyɔnwɔ fɔ wi kɛɛ yaara ti shɔ wi yeri, katugu wi yɛn fyɔnwɔ fɔ;
lere ŋa wi yɛn tege na ma pye lere si yere wi ni, maga kaa jɔlɔ wa kiti kɔnsaga;
23 katugu Yawe Yɛnŋɛlɛ li yaa ka yere pe kala li ni,
pe kɛɛ yaara mbele pèri shɔ pe yeri, li yaa ka pe yinwege ki kɔ.
24 Maga ka wɛɛnrɛ le lere ŋa wi maa nawa ŋgbanni jaga jaga wi ni,
maga kaa pinlɛlɛ lewɛlɛwɛ ni.
25 Nakoma ma yaa kaa wi tangalɔmɔ pi fɔrɔgi,
mbe ka sa ma yɛɛ le pɛnɛ.
26 Maga ka yere ki yerewe mbe yere lere wa go fɔgɔ ni,
maga ka yɔn kan mbe pye lere wa fɔgɔ sɛrɛfɔ.
27 Na kaa pye yaraga woro ma yeri ma fɔgɔ ki tɔn,
yiŋgi na ma yaa si ti pe pan pɔɔn sinlɛyaraga ki wɔ wa ma nɔgɔ, mbege shɔ ma yeri?
28 Ma tɛlɛye pàa sinndɛɛrɛ nda yerege maga lɛ wa fafafa, ma kɛɛrɛ ti kɔngɔlɔ ke gbɔn,
maga ka ka wɔ wa ki yɔngɔlɔ nuŋgba ke ni.
29 Maga lere o lere yan wì yɛgɛ to naa tunŋgo ki piin jɛŋgɛ,
ki kɔsaga wi ma ka saa na tunŋgo piin wunlumbolo kan;
wi se koro mbaa tunŋgo piin leele mbele pee pe mɛgɛ jɛn poro kan.