WUNLUNAŊA SALOMƆ WI YOMIYƐGƐLƐ
10--29
Wunlunaŋa Salomɔ
10
1 Wunlunaŋa Salomɔ wi yomiyɛgɛlɛ.Pinambyɔ kajɛnŋɛ wi maa to wi nawa pi yinŋgi,
ɛɛn fɔ pinambyɔ ŋa wi yɛn lembige wi maa nɔ wi nawa pi tanga wi na.
2 Yarijɛndɛ nda tì ta nambara ni tila tɔnli kan lere yeri;
ɛɛn fɔ mbe pye sinŋɛ ki ma lere shɔ kunwɔ pi yeri.
3 Yawe Yɛnŋɛlɛ laa lesinŋɛ wi yaga fuŋgo mbe to wi na;
ɛɛn fɔ ŋga lepeele pe maa tilele na jaa, li maga laga lali pe ni.
4 Tiyanra ti maa paan fyɔnwɔ ni;
ɛɛn fɔ kɛyɛn yan yi maa tunŋgo piin jɛŋgɛ, yi ma lere pye yarijɛndɛ lɛgɛrɛ tafɔ.
5 Lere ŋa wi maa yarilire ti kɔn yarilire kɔnsanga ni mari gbogolo, wo yɛn tijinliwɛ fɔ;
ɛɛn fɔ ŋa wi ma sinlɛ na wɔnlɔ yarilire kɔnsanga ni, wo maa fɛrɛ waa lere na.
6 Duwaw ma tigi lesinŋɛ wi na;
ɛɛn fɔ lewɛlɛwɛ kapyere to ti ma pye ma lara wa lepee wi yɔn sɛnrɛ ti ni.
7 Mbe nawa to lesinŋɛ wi kala li na, ki ma pye duwaw ni leele pe yeri,
ɛɛn fɔ pe ma fɛgɛ lepee wo mɛgɛ ko na pew.
8 Lere ŋa wi yɛn kajɛnŋɛ wa wi kotogo na, wi ma yɛnlɛ ŋgasegele ke na;
ɛɛn fɔ lere ŋa wi maa para faa, wi ma wi yɛɛ jɔgɔ.
9 Lere ŋa wi maa tanri konɔ sinnɛ li na, wi maa tanri yɛyinŋge na pɔw;
ɛɛn fɔ lere ŋa wi maa tanri koŋgolo ŋgele kè koolo ke na, wi kala li yaa ka yiri funwa na.
10 Lere ŋa wi maa yɛngɛlɛ ke gbɔnŋgbɔn mbe kaselege ki lara, wi ma jɔlɔgɔ wa sanmbala pe na;
ɛɛn fɔ lere ŋa wi maa para faa, wi ma wi yɛɛ jɔgɔ.
11 Lesinŋɛ wi yɔn sɛnrɛ ti yɛn paa pulugo tɔnmɔ yɛn, mba pi maa yinwege kaan;
ɛɛn fɔ lewɛlɛwɛ kapyere to ti ma pye ma lara wa lepee wi yɔn sɛnrɛ ti ni.
12 Lepanraga ki maa paan maara ni;
ɛɛn fɔ ndanlawa pi maa kajɔgɔrɔ ti ni fuun ti kala yari†.
13 Kajɛnmɛ maa taa wa tijinliwɛ fɔ wi yɔn sɛnrɛ ti ni;
ɛɛn fɔ lere ŋa tijinliwɛ woro wi ni, sanwiga ki ma pye wi pɔgɔlɔ ke na mboo koro.
14 Kajɛnmbɛlɛ pe maa jɛnmɛ pi taa na kee yɛgɛ;
ɛɛn fɔ tijinliwɛ fu fɔ wi yɔn ko ki ma kaa wi jan fyaw.
15 Penjagbɔrɔ fɔ wi yarijɛndɛ ti maa wi go singi paa malaga sigembogo yɛn;
ɛɛn fɔ fyɔnwɔ fɛnnɛ pe fyɔnwɔ po pi ma kaa pe jan.
16 Lesinŋɛ wi tunŋgo sara wi maa kan yinwege ni;
ɛɛn fɔ lepee wi tunŋgo tɔnli wi maa kan wi maa kapege piin.
17 Lere ŋa wi maa nagawa sɛnrɛ ti nuru, wi ma pye wa yinwege konɔ li ni,
ɛɛn fɔ lere ŋa wi ma je yɛrɛwɛ sɛnrɛ ti na, wi maa yɛɛ puŋgo.
18 Lere ŋa wi maa lewee yɛnlɛ wi panra larawa, wi maa yagbogolo finlɛlɛ,
lere ŋa wi maa leele mɛgɛ jogo na toro, wi yɛn lembige.
19 Lere ŋa kaa para mbe sa toro, wi ma puŋgo fyaw;
ɛɛn fɔ lere ŋa wi maa yɔn ki yingiwɛ jɛn wo yɛn tijinliwɛ fɔ.
20 Lesinŋɛ wi yɔn sɛnrɛ ti yɛn paa warifuwe piiri yɛn;
ɛɛn fɔ lepee wi jatere wi woro kagbɔgɔ yɔn.
21 Lesinŋɛ wi yɔn sɛnrɛ ti ma lelɛgɛrɛ kala yɔn;
ɛɛn fɔ tijinliwɛ fu fɛnnɛ pe yaa ku pe tijinliwɛ lawa pi kala na.
22 Yawe Yɛnŋɛlɛ li duwaw wo wi ma lere pye yarijɛndɛ tafɔ,
lewee wi yɛɛra fanŋga ko se ya yaraga ka kpɛ taga wa.
23 Mbaa kapege ki piin ki yɛn paa jiire pyewe yɛn lembige ki yeri;
ɛɛn fɔ tijinliwɛ fɔ wi kandanlaga ko yɛn mbe yin kajɛnmɛ ni.
24 Ŋga lepee wi maa fyɛ, ko ki maa ta;
ŋga lesinŋɛ wi maa jaa, ko ki ma pye wi kan.
25 Na kaŋgbanga ka pan sanga ŋa ni, lepee wi ma tɔngɔ ma wɔ wa;
ɛɛn fɔ lesinŋɛ wo ma koro wa wi yɔnlɔ li ni sanga pyew.
26 Tɔnndangara ti ma ŋgangala ke tanga yɛgɛ ŋga na,
wirige ki maa yaa wa yɛngɛlɛ ke ni yɛgɛ ŋga na,
ki pyelɔmɔ nuŋgba pi na, pa tiyanŋa wi maa wi tafɔ wi jɔlɔ ma fun.
27 Mbaa fyɛ Yawe Yɛnŋɛlɛ li yɛgɛ, ki ma yinwetɔnlɔgɔ kan lere yeri,
ɛɛn fɔ Yɛnŋɛlɛ li ma lepee wi yinwege ki were.
28 Lesinmbele pe jigi tagasaga ki ma pe kan yɔgɔrimɔ ni;
ɛɛn fɔ lepeele pe jigi wi ma kɔn pe na.
29 Mbaa tanri Yawe Yɛnŋɛlɛ li konɔ li na, ki yɛn paa malaga sigeca yɛn lere ŋa wi nawa pi yɛn ma filige wi kan;
ɛɛn fɔ li ma mbele pe maa tipege piin pe tɔngɔ.
30 Lesinŋɛ wo na fige mbe wɔ wa wi yɔnlɔ fyew;
ɛɛn fɔ lepeele pe se koro mbe mɔ laga tara ti na.
31 Lesinŋɛ wi yɔn sɛnrɛ ti maa kajɛnmɛ kaan,
ɛɛn fɔ yɔn ŋga ki maa finlɛlɛ, ki ŋgayinnɛ li daga mbe kɔn.
32 Lesinŋɛ wi yɔn ki ma sɛnyoro jɛn;
ɛɛn fɔ lepeele wele, lefanlaga sɛnrɛ pe maa yuun.