Yɛnŋɛlɛ na yawa pi ni fuun fɔ
147
1 Yaa Yawe Yɛnŋɛlɛ li sɔnni!Katugu ki yɛn ma yɔn waa yuuro koo waa we Yɛnŋɛlɛ li gbogo,
ki yɛn ma yɔn waa li sɔnni, konaa ma yala!
2 Yawe Yɛnŋɛlɛ li yɛn na Zheruzalɛmu ca ki kanni naa fɔnŋgɔ;
Izirayɛli* woolo mbele pàa koli ma kari pe ni tara ta yɛgɛ ni, li yaa pe gbogolo.
3 Mbele pe nawa pì tanga pe na, li ma pe kotogo ki sogo pe na,
ma pe wɛlɛgɛsara ti fɔfɔ pe na.
4 Lì wɔnŋgɔlɔ ke yɔn ki jɛn,
lì mɛgɛ taga ke ni fuun nuŋgba nuŋgba ke na.
5 We Fɔ wi yɛn ma gbɔgɔ, wi fanŋga ki yɛn ma gbɔgɔ,
wi tijinliwɛ pi yɛn kɔnlɔ fu.
6 Yawe Yɛnŋɛlɛ li ma mbele pe yɛn tege na pe tɔgɔ;
ɛɛn fɔ li ma lepeele pe go sogo fɔ wa tara.
7 Ye yuuro kɔ Yawe Yɛnŋɛlɛ li kan yeli sɔn,
ye yuuro kɔ ŋgɔni ni, ye we Yɛnŋɛlɛ li sɔn!
8 Li ma kambaara ti yirige ma naayeri wi tɔn,
li ma tisaga ki gbɛgɛlɛ, ki ma pan tara ti na,
li ma ti yan ki ma fi yanwira ti na.
9 Li maa yaakara kaan yaayoro ti yeri;
na kaankaanye pire ti kaa gbele fuŋgo ki kɛɛ sanga ŋa ni, li ma ti yaakara ti kan ti yeri†.
10 Yɛnŋɛlɛ lii jori malaga gbɔnshɔn fanŋga na,
sɛnwee fanŋga ki woro yaraga li yɛgɛ na.
11 Ɛɛn fɔ mbele pe maa fyɛ Yawe Yɛnŋɛlɛ li yɛgɛ, poro kala lo li yɛn mali ndanla,
poro mbele pè pe jigi wi taga li kagbaraga ki na we.
12 Yoro Zheruzalɛmu ca woolo, yaa Yawe Yɛnŋɛlɛ li gbogo,
yoro Siyɔn* ca woolo, yaa ye Yɛnŋɛlɛ li sɔnni!
13 Katugu li ma mbogo ŋga kì ca ki maga ki yeyɔnrɔ kɔɔrɔ ti sɔgɔyaara ti kan fanŋga ni,
lì duwaw ye piile pe na wa ki ni.
14 Li ma yɛyinŋge le wa tara ti ni,
li ma yarilire ti ni fuun tiyɔnrɔ ti kan ye yeri, fɔ ye ma ka ma tin.
15 Li ma li yɔn sɛnrɛ ti torogo laga tara ti ni,
li sɛnrɛ ti ma kari lagapyew ki ni fyɛlɛgɛ na.
16 Li ma nɛzhi* wi tirige wi ma filige paa simbasire yɛn,
li ma ti fɔɔngɔ ki ma wo ma simbi lagapyew, ma cɛn paa cɔnrɔ yɛn.
17 Li ma ti sinndɛɛrɛ tisaga ki ma pan;
ambɔ wi mbe ya yere mbeli were ti sige?
18 Ɛɛn fɔ na li ka para, ki yaara ti ma yan,
li ma li tifɛlɛgɛ ki pye ki maa gbɔɔn, tɔnmɔ pi mɛɛ nɛɛ fuun.
19 Làa li sɛnrɛ ti yo Zhakɔbu setirige piile pe kan,
ma li kondɛgɛŋgɛlɛ naa li kakɔnndɛgɛŋgɛlɛ ke naga poro Izirayɛli* woolo pe na.
20 Li sigi wogo ka pye cɛngɛlɛ sanŋgala la kpɛ kan,
ke sili kakɔnndɛgɛŋgɛlɛ ke jɛn.
Yaa Yawe Yɛnŋɛlɛ li sɔnni!