Yaa yɛnri Zheruzalɛmu ca
122
1 Tangala yurugo mbe kari wa Zheruzalɛmu ca. Davidi Yɛnŋɛlɛ gbɔgɔyurugo.Na paga na pye mbe yo fɔ:
«Yaa shokari wa Yawe Yɛnŋɛlɛ li go ki ni,»
ki ma pye na yeri yɔgɔrimɔ ni!
2 Zheruzalɛmu ca, wè pan ma yere koni na ma yeyɔnrɔ ti na.
3 Zheruzalɛmu, ma yɛn ca ŋga ki yɛn ma kan ma yɔn,
malaga sigembogo yɛn ma kan mɔɔ maga.
4 Izirayɛli* cɛngɛlɛ woolo pa pe maa kee wa,
Yawe Yɛnŋɛlɛ li cɛngɛlɛ woolo wele,
jaŋgo mbe Yawe Yɛnŋɛlɛ li gbɔgɔ,
paa yɛgɛ ŋga na làa ki kondɛgɛlɛ li kan Izirayɛli woolo pe yeri paa ki piin we.
5 Davidi naa wi setirige piile pa pe wunluwɔ jɔngɔ ki yɛn wa,
pa pe maa cɛɛn wa mbaa leele pe kiti wi kɔɔn.
6 Yaa yɛnri Zheruzalɛmu ca ki yɛyinŋge ta.
Zheruzalɛmu, ma yɛn ma mbele ndanla, Yɛnŋɛlɛ sa ti pe cɛn pɔw!
7 Yɛyinŋge mbe pye wa ca ki ni,
tanwa mbe pye wa wunluwɔ yinrɛ ti ni!
8 Na sefɛnnɛ naa na wɛnnɛ pe kala na,
mi yɛn na jaa yɛyinŋge mbe pye wa ma ni!
9 Yawe Yɛnŋɛlɛ, we Yɛnŋɛlɛ le, li go ŋga ki yɛn mala ndanla ki kala na,
mi yɛn na jaa fɛrɛwɛ mbe pye ma woo!