Lere ŋa wì shɔ kunwɔ pi kɛɛ
116
1 Yawe Yɛnŋɛlɛ li yɛn mala ndanla,katugu na mi ka gbele mbeli yeri, mbeli yɛnrɛwɛ gbɔɔ yɛnri, li ma logo na yeri.
2 Li ma nuŋgbolo jan ma logo na yeri,
mi yaa la li yɛnri na yinwege piliye yi ni fuun yi ni.
3 Kunwɔ pìla gbɔn na na, mala sere pi mana li ni,
kuulo tara* ti jatere pirindorogo kìla gbɔn na na,
jɔlɔgɔ naa lawɔrɔ ndorogo gbɔn na na.
4 Ɛɛn fɔ, a mì si Yawe Yɛnŋɛlɛ li mɛgɛ ki yeri, ma yo fɔ:
«E, Yawe Yɛnŋɛlɛ, na shɔ!»
5 Yawe Yɛnŋɛlɛ li maa yinmɛ kaan, li yɛn ma sin;
we Yɛnŋɛlɛ li yɛn yinriwɛ tafɔ.
6 Yawe Yɛnŋɛlɛ li maa wele mbele pè pe yɛɛ tirige pe na;
mìla pye tege na, a lìlan shɔ.
7 Na jatere, sɔngɔrɔ ma cɛn yɛw laga nuŋgba,
katugu Yawe Yɛnŋɛlɛ lì kajɛŋgɛ pye na kan!
8 Kaselege yi, màla shɔ kunwɔ pi kɛɛ,
ma yɛntunwɔ pi kɔ wa na yɛgɛ ki na,
màla shɔ mii kurugo mbe to.
9 Koni mi yaa la tanri Yawe Yɛnŋɛlɛ li yɛgɛ sɔgɔwɔ,
laga ki leweele tara nda ti ni.
10 Mìla taga Yɛnŋɛlɛ li na, ali sanga ŋa ni mìla pye na yuun fɔ:
«Mi yɛn tege na ma toro†.»
11 Na jatere pirindorogo ki kala na, mìla pye na yuun fɔ:
«Sɛnweele pe ni fuun pe yɛn yagboyoolo.»
12 Yiŋgi mbe ya kan Yawe Yɛnŋɛlɛ li yeri
kajɛŋgɛ ŋga fuun lì pye mala kan ki kala na?
13 Mi yaa wɔjɛnnɛ li yirige li pye na shɔwɔ pi kacɛn†,
mbe Yawe Yɛnŋɛlɛ li mɛgɛ ki yeri mbeli shari.
14 Mi yaa kanla yɔn fɔgɔlɔ* ke tɔn Yawe Yɛnŋɛlɛ li yeri,
li gbogolomɔ woolo pe ni fuun pe yɛgɛ na.
15 Mbele pè taga Yawe Yɛnŋɛlɛ li na,
pe kunwɔ wogo ki yɛn ma ŋgban li na.
16 E, Yawe Yɛnŋɛlɛ, mi yɛn ma tunmbyee,
kaselege yi, mi yɛn ma tunmbyee, mi yɛn ma tunmbyee jɛlɛ wo pinambyɔ.
Mboro màla pɔmanda ti sangala mala shɔ.
17 Ki kala na, mi yaa saraga* wɔ ma yeri mbɔɔn shari,
mi yaa mboro ŋa Yawe Yɛnŋɛlɛ ma mɛgɛ ki yeri mbɔɔn shari.
18 Mi yaa kanla yɔn fɔgɔlɔ ke tɔn Yawe Yɛnŋɛlɛ li yeri,
li gbogolomɔ woolo pe ni fuun pe yɛgɛ na.
19 Mi yaa ka ko pye wa Yawe Yɛnŋɛlɛ li londo nawa pi ni,
wa mboro Zheruzalɛmu ca nandogomɔ pi ni.
Yaa Yawe Yɛnŋɛlɛ li sɔnni!