SƐWƐ KAŊGURUGO WOO
107--150
Waa Yɛnŋɛlɛ li shari li kajɛŋgɛ
107
1 Yaa Yawe Yɛnŋɛlɛ li shari katugu li yɛn jɛnnɛ,katugu li kagbaraga ki yɛn kɔsaga fu†.
2 Leele mbele Yawe Yɛnŋɛlɛ lì pe go shɔ paa ki wogo ki yuun,
poro mbele lì shɔ pe winfɛnnɛ pe kɛɛ we;
3 poro mbele lì pe gbogolo ma yiri tara pyew ti ni,
ma yiri wa yɔnlɔ yirisaga naa yɔnlɔ tosaga kɛɛ yeri,
naa yɔnlɔparawa kamɛŋgɛ kɛɛ naa yɔnlɔparawa kalige kɛɛ ki yeri.
4 Pèle la puŋgo na yanri na toro wa gbinri* wi ni,
pe sila konɔ ta mbe kari ca ka kpɛ ni, ŋga pe mbaa ya sa cɛn wa ki ni.
5 Fuŋgo naa wɔgɔ ki ni tìla pe yigi,
pe fanŋga kìla pye na koo.
6 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
a lì si pe shɔ ma pe wɔ wa pe kaŋgbanga ki ni.
7 Làa pe yɛgɛ sin wa kozinnɛ li ni,
mbe ta mbe kari ca ka ni, ŋga pe mbaa ya cɛn wa ki ni.
8 Ki daga leele paa Yawe Yɛnŋɛlɛ li shari paa li sɔnni li kagbaraga ki kala na,
konaa kafɔnŋgɔlɔ ŋgele lì pye sɛnweele pe kan ke kala na!
9 Katugu wɔgɔ la pye mbele na, làa pe wɔgɔ ki kɔ,
fuŋgo la pye mbele na, làa pe kan yarijɛndɛ ni ma pe yɛnlɛ tin.
10 Pèle la pye ma cɛn wa kunwɔ pi diwi wɔlɔ li ni,
pàa pye wa kaso na jɔlɔ, a pè pe pɔ yɔngɔwɔ ni,
11 katugu pàa yiri ma je Yɛnŋɛlɛ li sɛnyoro ti na,
ma lo na li yɛn yaara ti ni fuun ti go na li tifaga.
12 Ko kala na làa tege wa pe na ma pe go sogo,
pàa kurugo ma to, lere kpɛ sila ta mbe pe saga.
13 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
a lì si pe shɔ ma pe wɔ wa pe kaŋgbanga ki ni.
14 Làa pe yirige ma pe wɔ wa kunwɔ pi diwi wɔlɔ li ni,
ma manda nda tìla pye ma pe pɔ ti kɔɔnlɔ pe na.
15 Ki daga leele paa Yawe Yɛnŋɛlɛ li shari paa sɔnni li kagbaraga ki kala na,
konaa kafɔnŋgɔlɔ ŋgele lì pye sɛnweele pe kan ke kala na!
16 Katugu lì tuguyɛnrɛ kɔɔrɔ ti kaari,
ma ti sɔgɔyaara nda ti yɛn tugurɔn woro ti kaari mbeli woolo pe shɔ†.
17 Tijinliwɛ fu fɛnnɛ pèle la pye na kapere piin,
fɔ a pe kajɔgɔrɔ tì tege wa pe na ma pe jɔgɔ.
18 Yaakara cɛnlɛ pyew ti la kìla kɔ pe na,
pàa pye ma yɔngɔ kunwɔ pi ni tɔɔn.
19 Ma pe ta wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
a lì si pe shɔ ma pe wɔ wa pe kaŋgbanga ki ni.
20 Naa làa kaa para, a li sɛnrɛ tì si pe sagala,
a lì si pe shɔ kunwɔ pi kɛɛ.
21 Ki daga leele paa Yawe Yɛnŋɛlɛ li shari paa sɔnni li kagbaraga ki kala na,
konaa kafɔnŋgɔlɔ ŋgele lì pye sɛnweele pe kan ke kala na!
22 Pe daga mbe nayinmɛ saara* wɔ Yɛnŋɛlɛ li yeri mbeli shari,
mbaa jɔrɔgi nayinmɛ ni mbaa li kapyegele ke yɛgɛ yuun.
23 Pèle la pye na tangala piin wa kɔgɔje wi na, ma ye tɔnmɔkɔɔrɔ tugbɔɔrɔ ni,
pàa pye na safari waa wa tɔnmɔ pi go na.
24 Ki woolo pàa Yawe Yɛnŋɛlɛ li kapyegele ke yan,
ma li kagbɔgɔlɔ ŋgele lì pye wa latijuguwo pi ni ke yan.
25 Làa para, ma ti a tifɛliŋgbɔgɔ kà yiri na gbɔɔn,
kìla ti, a kɔgɔje tɔnmɔ pi yɛn na yinrigi na tuun.
26 Pe tɔnmɔkɔɔrɔ tugbɔɔrɔ tìla pye na yinrigi wa naayeri, na sɔngɔrɔ na tinri wa tɔnmɔ pi ni,
pe sunndo wìla kɔn pe na fɔ ma pe jatere wi piri pe na.
27 Yɛkanŋguwa la pye pe na, a paa tanri na gbali ndɛɛ sinwɔɔlɔ wɛlɛ;
pe kajɛnmɛ pyew pìla kɔ pe yeri.
28 Wa pe jɔlɔgɔ ki ni, a pè si gbele ma Yawe Yɛnŋɛlɛ li yeri li pe saga,
a lì si pe wɔ wa pe kaŋgbanga ki ni.
29 Làa tifɛliŋgbɔgɔ ki yerege,
ma ti tɔnmɔ mba pi yɛn na yinrigi na tuun, a pì sinlɛ.
30 Naa laga kìla kaa yere ma pyeri dinw, a kì si yɔgɔrimɔ kan pe yeri,
làa pe yɛgɛ sin fɔ ma saa gbɔn wa pe yeresaga.
31 Ki daga leele paa Yawe Yɛnŋɛlɛ li shari paa li sɔnni li kagbaraga ki kala na,
konaa kafɔnŋgɔlɔ ŋgele lì pye sɛnweele pe kan ke kala na!
32 Ki daga paa li gbogo wa li gbogolomɔ woolo pe sɔgɔwɔ,
paa li sɔnni wa lelɛɛlɛ* pe finliwɛ pyesaga ki ni!
33 Yawe Yɛnŋɛlɛ lo li ma gbaanla pe waga mbe pe kanŋga gbinri,
mbe puluyo yi kanŋga mbeyi pye tawara.
34 Li ma tara nda tì tanla ti kanŋga mberi pye gbanŋga tara,
mbele pe yɛn ma cɛn wa tara ti ni pe tipewe pi kala na.
35 Li ma gbinri wi kanŋga fun mboo pye lambaaga,
mbe tawara laga ki kanŋga mbege pye puluyo laga.
36 Li ma ti fuŋgo yɛn mbele na pe ma cɛn wa,
mbe ti pe ma ca kan mbe cɛn wa ki ni.
37 Li ma ti pe ma kɛɛrɛ kɔn ma yariluguro lugu,
mbe ɛrɛzɛn* tiire sanri, nda ti maa pire lɛgɛrɛ sɛni.
38 Li ma duwaw pe na, pe ma se ma lɛgɛ fɔ jɛŋgɛ,
ka na kɔn wa pe yaayoro lɛgɛwɛ pi na.
39 Ɛɛn fɔ pele yɔn la pye na kologi na kee, fɔ a pe go kì sogo pe na,
tege naa jɔlɔgɔ ŋga pàa taga pe na ki kala na.
40 Yɛnŋɛlɛ lì ti, a fanŋga fɛnnɛ pè tifagawa ta,
ma ti a paa yanri na toro faa wa gbinri wi ni yirisaga fu.
41 Li ma fyɔnwɔ fɔ wi shɔ mboo wɔ wa jɔlɔgɔ ki ni,
mbe pe seye woolo pe pye pe ma se ma lɛgɛ paa yaayoro ŋgbeleye yɛn.
42 Lesinmbele pe ma ki kagala ke yan ma ke kɔrɔ jɛn, nɛɛ yɔgɔri,
ɛɛn fɔ lepeele pe ni fuun pe yɔn ki ma tɔn pe na.
43 Lere ŋa wi yɛn kajɛnŋɛ wila ki kagala ŋgele ke kɔrɔsi,
pa wi yaa Yawe Yɛnŋɛlɛ li kagbaraga ki jɛn.