Yɛnŋɛlɛ lo li yɛn dunruya wi go na
98
1 Yɛnŋɛlɛ gbɔgɔyurugo.Ye yurufɔnŋgɔ kɔ ye Yawe Yɛnŋɛlɛ li sɔn,
katugu lì kagbɔgɔlɔ pye!
Lì cew ta li fanŋga kɛɛ ko naa li yawa kpoyi* pi fanŋga na.
2 Yawe Yɛnŋɛlɛ lìgi naga dunruya woolo pe na fɔ lo li yɛn shɔfɔ we,
li yɛn ma sin yɛgɛ ŋga na, lìgi naga cɛngɛlɛ ke na.
3 Li jatere wi yɛn li kagbaraga ki na konaa li yɛn sɛnrɛ nuŋgba yofɔ yɛgɛ ŋga na ki na Izirayɛli* woolo pe kanŋgɔlɔ;
dunruya wi kɛɛ ki ni fuun ki na, leele pège yan fɔ we Yɛnŋɛlɛ lo li yɛn shɔfɔ we.
4 Dunruya woolo ye ni fuun yaa jɔrɔgi yɔgɔrimɔ ni yaa Yawe Yɛnŋɛlɛ li sɔnni,
yaa jɔrɔgi nayinmɛ ni, yaa yuuro koo yaa li sɔnni!
5 Yaa yuuro koo ŋgɔni ni yaa Yawe Yɛnŋɛlɛ li gbogo,
yaa li sɔnni ŋgɔni magala naa yuuro shɔgɔ ni!
6 Yaa li sɔnni mbaanra winmɛ konaa simbapɛnɛ yɛɛnrɛ mbaanra winmɛ ni,
yaa jɔrɔgi yɔgɔrimɔ ni wunlunaŋa wi yɛgɛ sɔgɔwɔ, Yawe Yɛnŋɛlɛ le!
7 Kɔgɔje wo naa wi nawa yaara ti ni fuun, tila tinmɛ gbɔɔ yinrigi,
tara to naa ti nawa yaara ti ni fuun, tila tinmɛ gbɔɔ yinrigi!
8 Ŋgbaanla tɔnmɔ pila kɛndagala gbɔɔn,
yanwira ti pinlɛ pi ni tila jɔrɔgi nayinmɛ ni!
9 Tila ki piin Yawe Yɛnŋɛlɛ li yɛgɛ sɔgɔwɔ, katugu li yɛn na paan mbe kiti kɔn dunruya woolo pe na!
Li yaa kiti kɔn dunruya woolo pe na mbe yala kasinŋge ki ni,
li yaa kiti kɔn cɛngɛlɛ ke na mbe yala kaselege ki ni.