Siyɔn ca ko ki yɛn cɛngɛlɛ
87
1 Kore pinambiile pe Yɛnŋɛlɛ gbɔgɔyurugo. Yurugo.Yɛnŋɛlɛ lì Zheruzalɛmu ca ki nɔgɔ le wa yanwira kpoyi* ti go na.
2 Siyɔn* ca ki yɛn ma Yawe Yɛnŋɛlɛ li ndanla ma wɛ Zhakɔbu setirige piile pe cara sannda ti ni fuun ti na.
3 E, mboro Yɛnŋɛlɛ ca ye,
ŋga ki yɛn na yuun ma wogo na, ki yɛn ma gbɔgɔwɔ kala. Wɔnmatigiwɛn laga.
4 Na jɛnfɛnnɛ pe ni, mi yɛn na Ezhipiti tara fɛnnɛ pe mɛgɛ yinri, naa Babilɔni tara fɛnnɛ,
ma pinlɛ Filisiti tara fɛnnɛ, naa Tiri ca fɛnnɛ konaa Etiyopi* tara fɛnnɛ pe ni;
ki woolo pa pè se wa ki tara ti ni.
5 Siyɔn ca ko na, ki daga paa ki yuun ki wogo na fɔ:
«Pa pe ni fuun nuŋgba nuŋgba pè se laga ki ni.
Yɛnŋɛlɛ na yaara ti ni fuun ti go na, lo lì ca ki kan yeresaga ni.»
6 Yawe Yɛnŋɛlɛ li yɛn na cɛngɛlɛ ke jinri na ke mɛrɛ ti yɔnlɔgi,
naga yuun ke ni fuun nuŋgba nuŋgba ke wogo na fɔ: «Pa cɛnlɛ na lì se laga Siyɔn ca ki ni.» Wɔnmatigiwɛn laga.
7 Yurukɔɔlɔ naa yɔfɛnnɛ pe yɛn naga yuun Siyɔn ca ki wogo na fɔ:
«Pa na fɛrɛwɛ pyew pì yiri laga ma ni.»