Yɛnŋɛlɛ li yɛn na yɛyinŋge
85
1 Yurukɔɔlɔ to wi sɛwɛ yurugo. Kore pinambiile pe Yɛnŋɛlɛ gbɔgɔyurugo.2 Yawe Yɛnŋɛlɛ, mà kajɛŋgɛ pye ma tara woolo pe kan,
Zhakɔbu setirige piile mbele pàa yigi kasopiile, mà sɔngɔrɔ ma pan pe ni.
3 Mɔ̀ɔ woolo pe kajɔgɔrɔ ti laga pe go na,
mà pe kapere ti ni fuun ti kala yaga pe na.
4 Mɔ̀ɔ naŋgbanwa gbɔɔ pi ni fuun pi sogo we ni,
mɔ̀ɔ kɔnrɔ tandorogo ki kɔ we ni.
5 We shɔfɔ Yɛnŋɛlɛ, sɔngɔrɔ ma we lɛ naa,
mɔɔ naŋgbanwa pi kɔ we kanŋgɔlɔ!
6 Naga yɛn ma, ma yaa koro mbe nawa ŋgban we ni suyi wi le?
Naga yɛn ma, ma yaa koro mbɔɔn naŋgbanwa pi tɛgɛ we ni sanga pyew fɔ tetete wi le?
7 Naga yɛn ma, mboro ma ma yaa sɔngɔrɔ mbe pan mbe fanŋga fɔnŋgɔ le we ni,
jaŋgo woro mbele ma woolo, waa yɔgɔri ma ni wi le?
8 Yawe Yɛnŋɛlɛ, ma kagbaraga ki pye we kan,
ma we shɔ!
9 Yɛnŋɛlɛ li yɛn na ŋga yuun, Yawe Yɛnŋɛlɛ li yɛn na ŋga yuun, mi yaa ki logo;
li yɛn na yɛyinŋge sɛnrɛ yuun li woolo pe ni, poro mbele pè pe yɛɛ kan li yeri pe ni;
jaŋgo paga ka sɔngɔrɔ naa wa pe tijinliwɛ fu kapyere ti ni.
10 Kaselege ko na, mbele pe maa fyɛ Yɛnŋɛlɛ li yɛgɛ, li shɔwɔ pi yɛn ma yɔngɔ pe ni,
jaŋgo sanni jɛnri, li gbɔgɔwɔ yanwa pi pan pi koro laga we tara ti ni.
11 Kagbaraga konaa kaselege ki ni, tìri yɛɛ fili,
kasinŋge konaa yɛyinŋge ki ni tìri yɛɛ yigi.
12 Kaselege ki ma yiri laga tara ti ni paa yɛgɛ ŋga na yariluguro ma fi;
kasinŋge ko ma yiri wa naayeri ma tigi laga tara na.
13 Yawe Yɛnŋɛlɛ lo jate li yaa fɛrɛwɛ kan we yeri,
kona tara ti yarilire ti yaa la yɔngɔ.
14 Kasinŋge ki yaa pye wa we Fɔ* wi yɛgɛ,
mbaa wi konɔ li gbɛgɛlɛ wi kan.