Sɛnwee wi ka ku,
49
1 Yurukɔɔlɔ to wi sɛwɛ yurugo. Kore pinambiile pe Yɛnŋɛlɛ gbɔgɔyurugo.2 Yoro tara woolo ye ni fuun yege wogo ŋga ki logo,
dunruya woolo ye ni fuun ye nuŋgbolo jan ye logo,
3 yoro lepigile naa legbɔɔlɔ pe ni,
penjagbɔrɔ fɛnnɛ naa fyɔnwɔ fɛnnɛ pe ni.
4 Mi yaa kajɛnmɛ sɛnrɛ yo wa na yɔn,
katugu tijinliwɛ sɛnrɛ ti yɛn wa na kotogo na.
5 Mi ma nuŋgbolo jan na kajɛnmbɛlɛ pe yomiyɛgɛlɛ ke nuru;
mi yaa la ke kɔrɔ wi yuun ŋgɔni gbɔngɔ ni.
6 Ali na tipege ka gbɔn na na,
na na winfɛnnɛ paga na maga pe kambasinnde ti ni sanga ŋa ni,
yiŋgi na mbe sila fyɛ pe yɛgɛ?
7 Pe jigi wi yɛn pe yarijɛndɛ to na,
pe maa pe yɛɛ gbogo pe penjagbɔrɔ lɛgɛrɛ to kala na.
8 Ma si yala, lere wa kpɛ se ya mboo lewee yɛnlɛ wa go shɔ,
nakoma mboo yɛɛra go shɔgɔ sara wi kan Yɛnŋɛlɛ li yeri.
9 Pe go shɔgɔ sara wi sɔnŋgɔ kì ŋgban ma toro,
lere se ya mbege sara fyew.
10 Pe yɛn naga yaan ndɛɛ pe yaa koro yinwege na suyi,
pe se ka ye wa fanga ki ni wi le?
11 We yɛn naga yaan fɔ kajɛnŋɛ wi ma ku,
lembige ko naa tijinliwɛ fu fɔ wi ni pe ma ku,
pe ma kari ma pe yarijɛndɛ ti yaga pele yɛgɛ kan.
12 Pe maa ki sɔnri pe yinrɛ ti yaa koro wa sanga pyew,
pe cɛnsara ti yaa koro wa sanga pyew fɔ tetete,
fɔ pe mɛrɛ ti yaa tagataga pe tara lara ti na.
13 Ɛɛn fɔ sɛnwee mboo ta wa wi fɛrɛwɛ pi ni, wila ki jɛn mbe yo fɔ wi se mɔ,
wi yɛn paa yaayoro yɛn, nda ti ma ku.
14 Mbele pe ma pe jigi wi taga pe yɛɛ na, pa pe kɔwɔ pi yaa ka pye ma,
mbele pe maa jaa mbaa para paa nuru pe yeri, pa pe kɔwɔ pi yaa ka pye ma. Wɔnmatigiwɛn laga.
15 Pe maa pe kɔnri paa simbaŋgbelege yɛn na kee pe ni wa kuulo tara*,
kunwɔ po pi yɛn pe kɔnrifɔ we.
Pinliwɛ yɛgɛ ni, lesinmbele pe yaa cɛn pe go na,
pe tiyɔnwɔ pi yaa ka kɔ saw,
kuulo tara to ti yɛn pe cɛnsaga ye.
16 Ɛɛn fɔ Yɛnŋɛlɛ li yaa na go shɔ, mbanla wɔ wa kuulo tara ti ni,
ee, li yaa na shɔ. Wɔnmatigiwɛn laga.
17 Na lere wa ka pye penjagbɔrɔ fɔ, kiga ka ma jatere wi piri ma na,
na wi go woolo pe yarijɛndɛ ti kaa lege la kee yɛgɛ, kiga ka ma jatere wi piri ma na;
18 katugu na wiga ka ku, wi se ka kari yaraga ka kpɛ ni,
wi yarijɛndɛ ti se taga wi na wa fanga ki ni.
19 Mboo ta yinwege na sanga ŋa ni, wi mbe ya mbe yo fɔ wi yɛn fɛrɛwɛ na,
katugu na dunruya wi ka tanla ma na, leele pe maa ma sɔnni.
20 Konaa ki ni fuun ni, wi yaa ka ku mbe taga wa wi tɛlɛye pe na wa pe karisaga,
poro mbele pe se ka sɔngɔrɔ mbe pan mbe yanwa pi yan naa fyew.
21 Ɛɛn fɔ sɛnwee mboo ta wa wi fɛrɛwɛ pi ni, wila ki jɛn mbe filige ki na,
fɔ wi yɛn paa yaayoro yɛn, nda ti ma ku.