Yurugo mbe Yɛnŋɛlɛ li kagbaraga
40
1 Yurukɔɔlɔ to wi sɛwɛ yurugo, Davidi Yɛnŋɛlɛ gbɔgɔyurugo.2 Mìla na jigi wi ni fuun wi taga Yawe Yɛnŋɛlɛ li na,
a lì nuŋgbolo jan, mala yerege ki logo.
3 Lìlan tile mala wɔ wa jɔgɔwɔ wegbɔgɔ ki ni,
mala wɔ wa fɛnrɛgɛ ki ni, wa wetijugo ki ni;
lìlan yerege na tɔɔrɔ ti na wa walaga ki na, mala jegele ke yeregelɔmɔ pi yɔn.
4 Lì yurugo fɔnŋgɔ le wa na yɔn, a mìgi kɔ,
a kì pye sɔnmɔ yurugo, mbege kɔ we Yɛnŋɛlɛ li mɛgɛ ni.
Lelɛgɛrɛ yaa ki wogo ki yan mbaa fyɛ li yɛgɛ,
mbe pe jigi wi taga Yawe Yɛnŋɛlɛ li na.
5 Lere ŋa kaa jigi wi taga Yawe Yɛnŋɛlɛ li na, fɛrɛwɛ yɛn wi woo!
Wila yɛnlɛ mbe yɛgɛ wa mbele pe maa pe yɛɛ gbogo pe yeri konaa yagbogolo yofɛnnɛ pe yeri.
6 E, Yawe Yɛnŋɛlɛ, na Yɛnŋɛlɛ,
kagbɔgɔlɔ ŋgele mà pye we kan, konaa kajɛŋgɛ ŋga fuun mà kɔn ma tɛgɛ mbe pye we kan, kè lɛgɛ;
yaraga ko ka kpɛ woro wa ma yala ma ni.
Na mi ka yo fɔ mi yaa ke ni fuun ke yo, mbe ke yari,
mi se ya mbege pye, katugu kè lɛgɛ ma toro.
7 Saara* to naa yarikanra to ma ti yɛn mɔɔ ndanla,
mà ko sɛnrɛ to yo mari filige na kan jɛŋgɛ.
Ma woro na saara sogoworo* naa kapere kala yagawa jasaara jaa na yeri.
8 Kona, a mì sho fɔ: «Mi ŋa mi yɛn na paan ma kɔrɔgɔ,
mi na kala li yɛn ma yɔnlɔgɔ wa sɛlɛgɛ sɛwɛ ŋa pe ma migi wi ni†.»
9 Na Yɛnŋɛlɛ, mila jaa mbaa ma nandanwa kala li piin;
ma lasiri* sɛnrɛ mìri tɛgɛ wa na nawa.
10 Ma yɛn sinŋɛ yɛgɛ ŋga na mi yɛn naga sɛntanra ti yari wa ma janwa gbɔlɔ woolo pe sɔgɔwɔ.
Wele, mii na yɔn ki tɔn ki wogo ki na;
Yawe Yɛnŋɛlɛ, mboro jate maga jɛn.
11 Mi woro nɔɔ kasinŋge ki lara wa na kotogo na;
ma yɛn sɛnrɛ nuŋgba yofɔ yɛgɛ ŋga na konaa ma shɔwɔ pi ni, mi yɛn naga wogo ki yari;
mi woro nɔɔ kagbaraga konaa ma kaselege ki lara wa ma janwa gbɔlɔ woolo pe sɔgɔwɔ.
12 Mboro wo na Yawe Yɛnŋɛlɛ, ma se je mbanla yinriwɛ ta;
ma kagbaraga konaa ma yɛn sɛnrɛ nuŋgba yofɔ yɛgɛ ŋga na, ki yaa lanla go singi sanga pyew.
13 Jɔlɔgɔ lɛgɛrɛ to na na mala maga,
yɔn woro ki jɔlɔgɔ ki na.
Na kambasinnde ti go kala lì to na na,
mi se ya mbege kun na yɛɛ ni mbaa ti yaan.
Tì lɛgɛ ma wɛ na yinzire ti na,
na jigi wì kɔn na na pew.
14 Yawe Yɛnŋɛlɛ, ki yaga mala shɔ,
Yawe Yɛnŋɛlɛ, fyɛɛlɛ ma pan mala saga!
15 Mbele fuun paa ki jaa mbanla gbo, fɛrɛ mbe pe ta, pe go sogo!
Mbele paa ki jaa jɔlɔgɔ mbe to na na, poro mbe gbɔgɔwɔ la fɔ mbaa sɔngɔrɔ puŋgo na!
16 Mbele pe yɛn na tɛgɛ na na kiyakiya kiyakiya,
fɛrɛ gbɔrɔ mbe pe yigi fɔ mbe pe yɔn ki tɔn pe na!
17 Ɛɛn fɔ mbele fuun pe yɛn nɔɔ lagajaa,
poro mbaa nayinmɛ nii paa yɔgɔri ma kala na!
Mboro ŋa ma yɛn shɔfɔ, ma yɛn ma mbele ndanla,
poro mbaa ki yuun suyi fɔ: «Yawe Yɛnŋɛlɛ lì gbɔgɔ!»
18 Mi wo na, mi yɛn tege na ma pye fyɔnwɔ fɔ,
ɛɛn fɔ we Fɔ wi yɛn na jatere piin na na.
Mboro ma yɛn na sagafɔ konaa na shɔfɔ;
na Yɛnŋɛlɛ, maga ka mɔ na sagawa pi ni!