Na Yɛnŋɛlɛ, yiŋgi na,
22
1 Yurukɔɔlɔ to wi sɛwɛ yurugo. Pe maa ki koo yurugo ŋga kɔlɔmɔ na, pe maa ki yinri: «Pinliwɛ yɔn safuwe». Davidi Yɛnŋɛlɛ gbɔgɔyurugo.2 Na Yɛnŋɛlɛ, na Yɛnŋɛlɛ, yiŋgi na, a ma si je na na?
Yiŋgi na, a ma sɔɔn yɛɛ laga lali na ni?
Ma yɛn nala yuŋgbɔgɔrɔ gbelege ki nuru, ma si woro nala shoo†.
3 Na Yɛnŋɛlɛ, yɔnlɔ na mi ma gbele mbɔɔn yeri mala saga,
ɛɛn fɔ maa na yɔn sogo;
yembinɛ fun, mila wogosaga ta.
4 Ma si yala mboro ŋa ma yɛn Yɛnŋɛlɛ kpoyi*, ma yɛn ma cɛn wa ma wunluwɔ jɔngɔ ki na;
a Izirayɛli* woolo paa ma sɔnni yuuro ni suyi.
5 We tɛlɛye pa pàa pe jigi wi taga mboro na;
pàa pe jigi wi taga ma na, a mà pe shɔ.
6 Pàa gbele mɔɔ yeri ma pe saga, a mà pe shɔ;
pàa pe jigi wi taga ma na, pe sila fɛrɛ shɔ.
7 Mi wo na, mi yɛn paa fyɛngɛ yɛn,
mi si sɛnwee wo wa bɔ naa yɛrɛ.
Leele paa na tegele,
tara woolo paa na tifaga.
8 Mbele fuun paa na yaan, pe yɛn na tɛgɛ na na;
pe maa ki yɔgɔri na na, na go yangara na na†.
9 Pe maa yuun fɔ: «Wùu jigi wi taga Yawe Yɛnŋɛlɛ li na,
ɛɛn, luu shɔ ye!
Wi yɛn ma Yawe Yɛnŋɛlɛ li ndanla,
ɛɛn luu shɔ ye wege yan†!»
10 Ee, Yawe Yɛnŋɛlɛ, mboro mala yirige wa na nɔ wi lara,
màa jigi kan na yeri mala ta na nɔ wìlan lɛ wa wi kotogo ki na.
11 Maga lɛ pànla se, a pè silan karafa ma na;
mala ta wa na nɔ wi lara, màa pye na Yɛnŋɛlɛ.
12 Jɔlɔgɔ ki kaa yɔngɔ na ni sanga ŋa ni, maga kɔɔn yɛɛ laga lali na ni,
sagafɔ wa yɛgɛ woro na na naa!
13 Na winfɛnnɛ pe yɛn mala maga paa napɛnɛ lɛgɛmbɛlɛ yɛn,
pè perege kɔn mala maga paa Bazan tara napɛnɛ ŋgbaanla pe yɛn.
14 Pe yɛn paa jaraye yɛn, mbele pe yɛn na kuunru,
mbele pè pe yɔnrɔ ti yɛngɛ mbe nɔɔri mbe kɔɔnlɔ.
15 Na fanŋga ki yɛn na koo na kee paa yɛgɛ ŋga na tɔnmɔ ma kaa na fuun,
mi se ya yere na tɔɔrɔ ti na.
Kotogo ŋga ki yɛn na ni, ki yɛn paa sɛnriŋguro yɛn na yanni wa na lara.
16 Na fanŋga ki kɔ na ni mala waga paa fɛnrɛgɛ yɛn,
na ŋgayinnɛ lì mara wa na yɔn ki naayeri.
Mà ti kunwɔ pi wirige ki yɛn na tɔnni na na.
17 Kapege pyefɛnnɛ ŋgbelege na maga mala fili,
ki pyɔɔnlɔ wele, pee yirisaga yaga na kan;
pànla kɛyɛn yo naa na tɔɔrɔ ti pɔ†.
18 Mì cɔgɔ fɔ na kajeere tì yiri funwa na, mbe ya mberi jiri.
Na winfɛnnɛ pè pe yɛngɛlɛ ke kan na na nala wele.
19 Pànla yaripɔrɔ ti yɛɛlɛ pe yɛɛ na,
pè pɛtɛ gbɔn na derigbɔgɔ ki wogo na†.
20 Mboro wo na, Yawe Yɛnŋɛlɛ, maga ka lali na ni!
Mboro ŋa ma yɛn na fanŋga ye, fyɛɛlɛ ma pan mala saga!
21 Na shɔ tokobi kunwɔ pi kɛɛ!
Na shɔ ki pyɔɔnlɔ tipeele pe ŋgangala ke kɛɛ!
22 Na shɔ jaraye pe yɔn nɔŋgɔ ki kɛɛ,
mala shɔ yannɔ wi yɛnŋgɛlɛ ke kɛɛ!
Ee, màla yɔn sogo.
23 Mi yaa kaa ma sɛnrɛ yuun na sefɛnnɛ pe kan,
mi yaa kaa ma sɔnni wa janwa wi sɔgɔwɔ†.
24 Yoro mbele ye maa fyɛ Yawe Yɛnŋɛlɛ li yɛgɛ, yaa li sɔnni!
Yoro Zhakɔbu setirige piile ye ni fuun yaa li gbogo!
Yoro Izirayɛli woolo, yaa seri fyɛrɛ ti na li yɛgɛ sɔgɔwɔ!
25 Katugu ŋa wi yɛn na jɔlɔ, li soo tifaga, li se je wi na jɔlɔgɔ sanga ni.
Lii puŋgo wa wi yeri;
ɛɛn fɔ, na wi ka gbele mbeli yeri luu saga sanga ŋa ni, li ma logo wi yeri.
26 Yawe Yɛnŋɛlɛ, ma fanŋga na, mi yaa lɔɔn sɔnni wa janwa gbɔlɔ li sɔgɔwɔ;
yɔn fɔgɔlɔ* ŋgele mì kɔn ma yeri, mi yaa ka ke tɔn mbe ke yɔn fili mbele pe maa fyɛ ma yɛgɛ pe yɛgɛ sɔgɔwɔ.
27 Fyɔnwɔ fɛnnɛ pe yaa kaa kaa mbaa tinni.
Mbele pe yɛn na Yawe Yɛnŋɛlɛ li lagajaa, paa li sɔnni!
Yɛnŋɛlɛ sa ti pe yinwetɔnlɔgɔ ta!
28 Mbele fuun pe yɛn wa tara ti kɔsaga kɛɛ ki na, pe yaa ka nawa to Yawe Yɛnŋɛlɛ li na, mbe sɔngɔrɔ mbe pan li kɔrɔgɔ;
cɛngɛlɛ ke seye woolo pe ni fuun pe yaa kaa fɔli mbaa pe yɛrɛ ti jiile wa tara li yɛgɛ sɔgɔwɔ.
29 Katugu wunluwɔ pi yɛn Yawe Yɛnŋɛlɛ lo woo,
li yɛn ma cɛn cɛngɛlɛ ke go na.
30 Fanŋga fɛnnɛ mbele fuun laga tara na, paa nii paa fɔli li yɛgɛ sɔgɔwɔ fun, paa li gbogo!
Mbele fuun pe yɛn kufɛnnɛ mbe sɔngɔrɔ wa taambugɔ ki ni, pe yaa kanŋguuro kan li yɛgɛ sɔgɔwɔ,
poro mbele pe se ya koro yinwege na we.
31 Pe setirige piile pe yaa kaa tunŋgo piin Yawe Yɛnŋɛlɛ li kan,
pe yaa kaa li sɛnrɛ yuun mbele pe yaa ka yiri poro puŋgo na pe kan.
32 Pe yaa kaa li kasinŋge wogo ki yuun mbele pe yaa ka se puŋgo na pe kan,
mbaa ŋga lì pye mali woolo pe shɔ ki yari.