Lesinŋɛ ŋa wì Yɛnŋɛlɛ li yeri
17
1 Davidi wi Yɛnŋɛlɛ yɛnrɛwɛ.Yawe Yɛnŋɛlɛ, na yɛnrɛwɛ sinmbe pi logo!
Nuŋgbolo jan gbelege ŋga mila gbele nɔɔ yɛnri ki yeri!
Nuŋgbolo jan yɛnrɛwɛ mba mila yɛnri nawa jɛmbɛ ni maa logo!
2 Kiti kɔn na na, mala tanga ki yo!
Ki yaga ma ŋga ki yɛn ma sin ki yan!
3 Ma mala nawa pi cancan,
mala wa ma wele yembinɛ.
Màla wa ma wele, ɛɛn fɔ mɛɛ jɛrɛgisaga kpɛ yan na na.
Na jatere wo naa na yɔn sɛnrɛ ti ni, ti yɛn nuŋgba.
4 Na mi ka sɛnweele pe kapyere ti wele,
ma sɛnrɛ ti mala kan mi mala yɛɛ yigi lewɛlimbɛlɛ pe koŋgolo ke ni.
5 Mì yeresaga ta wa ma konɔ li ni,
mii kɛ mbe wɔ wa li ni.
6 E, Yɛnŋɛlɛ, mi yɛn nɔɔ yinri, katugu ma mala yɔn sogo;
nuŋgbolo jan na yeri mala sɛnrɛ ti logo!
7 Ma kagbaraga kafɔnnɔ wogo ki naga na na!
Mbele pe ma pe yɛɛ karafa ma na,
mboro ma ma pe shɔ pe juguye pe kɛɛ.
8 Tanla go singi, paa yɛgɛ ŋga na lere maa wi yɛnmbyɔ wi go singi!
Na lara wa ma kanwira ti nɔgɔ,
9 mala shɔ lepeele mbele pe yɛn nala jɔlɔ pe yeri,
konaa na juguye tipeele mbele pè yiri mala maga pe yeri!
10 Paa lere yinriwɛ ta fyew,
yɛɛ gbɔgɔwɔ sɛnrɛ to pe maa yuun wa pe yɔn.
11 Pe yɛn nala tuuro tɔnri, pè yɛrɛ wa mala maga makɔ;
pe yɛn na pɛɛlɛ naga jaa mbanla jan.
12 Pe yɛn paa jara yɛn, ŋa wila jaa mbe kara ka,
paa cɛngɛ yɛn, ŋga kì lara na singi.
13 Yiri Yawe Yɛnŋɛlɛ,
ma to na juguye pe na, ma pe go sogo;
mala shɔ lepeele pe yeri ma tokobi wi ni!
14 Yawe Yɛnŋɛlɛ, na shɔ ki leele mbele pe yeri ma yawa pi ni,
mala shɔ ki fɔnmɔ woolo pe yeri!
Ki dunruya yinwege ŋga ko mbe pye pe tasaga ye!
Pe kan pe ka ŋgbanga ŋgbanga, pe tin ŋga mà tɛgɛ pe kan ki ni,
pe piile pe ka pe tin pe sanŋga yaga pe pishyɛnwoolo pe kan!
15 Mi wo na, naa mi yɛn ma sin ki kala na, mi yaa kɔɔn yan gbɔgɔyi.
Na mi ka ka yɛn mbe yiri, mbaa ma wele, ko yaa na bɔ.