Yɛnŋɛlɛ lì yɛnlɛ lere ŋa na,
5
1 Yurukɔɔlɔ to wi sɛwɛ yurugo, ŋga pe maa koo na wegele wiin. Davidi yurugo.2 Yawe Yɛnŋɛlɛ, nuŋgbolo jan mala sɛnyoro ti logo,
mi yɛn na jɛɛn yɛgɛ ŋga na maga logo!
3 Mboro ŋa na wunluwɔ naa na Yɛnŋɛlɛ,
gbelege ŋga mila gbele na sagawa jaa ki logo!
Katugu mboro mi yɛn na yɛnri ma yeri.
4 Yawe Yɛnŋɛlɛ, pinliwɛ ni, ma mala yɛnrɛwɛ magala li logo;
pinliwɛ ni, mi mala yɛɛ gbɛgɛlɛ mbe kari wa ma yɛgɛ sɔgɔwɔ, mbaa ma singi.
5 Katugu ma yɛn Yɛnŋɛlɛ na tipege ki woro mali ndanla;
lepee wi se ya cɛnsaga ta wa ma tanla.
6 Mbele pe maa pe yɛɛ gbogo, pe se ya yere ma yɛgɛ sɔgɔwɔ;
tipege pyefɛnnɛ pe kala li yɛn mɔɔ mbɛn.
7 Ma ma yagboyoolo pe tɔngɔ ma pe wɔ wa;
legboleele poro naa nambara pyefɛnnɛ pe kala li yɛn ma tijanga Yawe Yɛnŋɛlɛ ma yɛgɛ na.
8 Ɛɛn fɔ mi wo na, ma kagbaraga gbɔgɔ ki kala na, mbe ya ye wa ma go ki ni;
mi yaa fɔli mbɔɔn gbɔgɔ wa ma shɛrigo gbɔgɔ* kpoyi* ki yɛgɛ sɔgɔwɔ, mbaa fyɛ ma yɛgɛ.
9 Yawe Yɛnŋɛlɛ, mboro ŋa ma yɛn sinŋɛ, ki yaga maa na yɛgɛ sinni, mbele pe yɛn nala pɛɛlɛ pe kala na;
ma yɛn na jaa mbe konɔ na lɛ, li gbɛgɛlɛ na kan!
10 Katugu lere se ya taga pe yɔn sɛnrɛ ti na;
ŋga pe maa jate ko yɛn mbe jɔgɔwɔ pye,
sɛnrɛ nda ti maa yinrigi wa pe yagbotiire ti ni, ti yɛn ma tisaw paa fanga yɛn, ŋga ki yɛn ma yɛngɛ,
pe ma pe ŋgayinŋgele ke tɛgɛ na leele lɛlɛ†.
11 E, Yawe Yɛnŋɛlɛ, ki naga pe na fɔ pe yɛn kajɔɔgɔ pyefɛnnɛ!
Kagala ŋgele paa kɔɔn mbe pye, ki yaga ke sɔngɔrɔ pe na, ke pe jan!
Pe purɔ pe kapere lɛgɛrɛ ti kala na,
katugu pè yiri ma je ma na!
12 Ɛɛn fɔ, mbele fuun pe pe yɛɛ karafa ma na, pe yaa kaa yɔgɔri,
pe yaa kaa jɔrɔgi nayinmɛ ni sanga pyew,
katugu ma yɛn na pe go singi.
Ma mɛgɛ ki yɛn ma mbele ndanla, pe yaa kaa yɔgɔri ma kala na.
13 Katugu Yawe Yɛnŋɛlɛ, mboro ma ma duwaw lesinŋɛ wi na;
ma kagbaraga pyege ki ma tɔn wi na naa go singi, paa tugurɔn sigeyaraga* yɛn.