Bibulu wi nawa sɛnrɛ
Fafafa, Yɛnŋɛlɛ làa naayeri wo naa tara ti da. A lì si kaa li yɛɛ naga sɛnwee piile pe na, ma yɔn finliwɛ le pe ni. Mbele pàa li yɔn sɛnrɛ ti logo ma kagbɔgɔlɔ ŋgele làa pye pe kan ke yan, poro pège kagala ke ni fuun ke yɔnlɔgɔ we kan. Pàa sɛwɛɛlɛ lɛgɛrɛ yɔnlɔgɔ.
Naa wagati titɔnlɔwɔ wà la kaa toro, a leele pè sigi lɛ ma ki sɛwɛɛlɛ pe ni fuun pe wulowulo ma pe gbogolo pe yɛɛ na, ma pe pye sɛwɛ lomboŋɔ nuŋgba. Nala ki sɛwɛ wo pe maa yinri Bibulu we. Pe maa wi yinri fun Sɛnrɛ kpoyi nda ti yɛn ma yɔnlɔgɔ. Ki Yɛnŋɛlɛ sɛnrɛ sɛwɛ gbegbeŋɛ wi yɛn ma kɔn ma yiri kɔnsaga shyɛn. Sɛwɛɛlɛ nafa taanri ma yiri kɔgɔlɔni pe yɛn wa wi ni.
Yɔn fɔlɔ lɛlɛ sɛwɛɛlɛ
Bibulu wi kɔnsaga koŋgbanŋga pe maa ki yinri Yɔn fɔlɔ lɛlɛ sɛwɛ. Sɛwɛɛlɛ mbele pe yɛn wa wi ni, Moyisi wo naa Yɛnŋɛlɛ yɔn sɛnrɛ yofɛnnɛ pe ni, poro pàa pe yɔnlɔgɔ. Pàa pe yɔnlɔgɔ Eburuye sɛnrɛ ni. Sɛwɛɛlɛ nafa ma yiri kɛ ma yiri kɔlɔjɛrɛ pe yɛn wa wi ni. Ki sɛwɛɛlɛ pe yɛn ma gbogolo gbogolo yɛgɛ ŋga na ki ŋga:
1) Moyisi sɛwɛɛlɛ, poro yɛn kaŋgurugo, mbege lɛ Zhenɛsi na mbe sa gbɔn Deteronɔmu sɛwɛ wi na.
2) Sɛwɛɛlɛ mbele pe yɛn na para Izirayɛli tara kalɛgɛlɛ ke wogo na, poro yɛn kɛ ma yiri shyɛn, mbege lɛ Zhozuwe na mbe sa gbɔn Ɛsitɛri sɛwɛ wi na.
3) Yuuro sɛwɛɛlɛ, poro yɛn kaŋgurugo, mbege lɛ Zhɔbu na mbe sa gbɔn Yuuro ti Yurutanga sɛwɛ wi na.
4) Yɛnŋɛlɛ yɔn sɛnrɛ yofɛnnɛ sɛwɛɛlɛ, poro yɛn kɛ ma yiri kɔlɔshyɛn, mbege lɛ Ezayi na mbe sa gbɔn Malaki sɛwɛ wi na.
Yɔn fɔlɔ fɔnnɔ sɛwɛɛlɛ
Bibulu sɛwɛ wi kɔnsaga shyɛn wogo pe maa ki yinri Yɔn fɔlɔ fɔnnɔ sɛwɛ. Sɛwɛɛlɛ mbele pe yɛn wa wi ni, Zhezu wi pitunmbolo poro pele wɛlɛ pàa pe yɔnlɔgɔ. Pàa pe yɔnlɔgɔ Girɛkiye sɛnrɛ ni. Sɛwɛɛlɛ nafa ma yiri kɔlɔshyɛn pe yɛn wa wi ni. Ki sɛwɛɛlɛ pe yɛn ma gbogolo gbogolo yɛgɛ ŋga na ki ŋga:
1) Zhezu Sɛntanra sɛwɛɛlɛ, poro yɛn tijɛrɛ, mbege lɛ Matiye na mbe sa gbɔn Zhan na.
2) Zhezu pitunmbolo pe kapyegele sɛwɛ.
3) Pɔli naa pitunmbolo pele yɛgɛ sɛwɛɛlɛ, poro yɛn sɛwɛɛlɛ nafa ma yiri nuŋgba, mbege lɛ Ɔrɔmu sɛwɛ wi na mbe sa gbɔn Zhude sɛwɛ wi na.
4) Zhezu Kirisi kagala nagawa sɛwɛ, wo wi yɛn Yɔn fɔlɔ fɔnnɔ sɛwɛ puŋgo woo we.
Bibulu wi nawa kagala
Wa Yɔn fɔlɔ lɛlɛ sɛwɛ wi ni, Yɛnŋɛlɛ lì dunruya wi da yɛgɛ ŋga na wège yan wa. Sanga ŋa ni Yɛnŋɛlɛ làa leele koŋgbanmbala pe da, Adama naa Awa we, làa pe tɛgɛ lajɛŋgɛ tiyɔngɔ ka ni. Kunwɔ sila pye wa ki laga ŋga pàa pye ma cɛn ki ni. Ɛɛn fɔ, a Yɛnŋɛlɛ li mɛrɛgɛ wà si kaa yiri ma je Yɛnŋɛlɛ li na; ki mɛrɛgɛ pe maa wi yinri Sɔtanla. Wìla pan laga dunruya wi ni ma Adama naa Awa pe fanla ma pe puŋgo, ma ti pee logo Yɛnŋɛlɛ li yeri. Pe sɛnrɛ mbalogowo pi kala na, Yɛnŋɛlɛ làa pe purɔ ma pe yirige wa lajɛŋgɛ tiyɔngɔ ŋga pàa pye ma cɛn ki ni, a ki puŋgo kala lo pye fɔ pe daga mbe ku kaselege. Ɛɛn fɔ, a lì si pe yinriwɛ ta, mɛɛ yɔn fɔlɔ kɔn pe yeri mbe pe setirige pyɔ wa yirige, ŋa wi yaa sɛnwee pyɔ wi shɔ Sɔtanla wo naa kunwɔ pi kɛɛ.
Naa wagati titɔnlɔwɔ wà la kaa toro, a Yɛnŋɛlɛ lì si naŋa wa yeri ŋa pàa pye na yinri Abirahamu. Làa wi pye ma yo wi yiri wa wi tara, Kalide tara re, wi kari wi sa cɛn wa Kana tara. Abirahamu wo naa wi jɔ wi ni pyɔ sila pye pe yeri. Ɛɛn fɔ Yɛnŋɛlɛ làa yɔn finliwɛ le Abirahamu wi ni. Làa yɔn fɔlɔ kɔn pe yeri mbe setirige piile lɛgɛrɛ kan pe yeri konaa mbe Kana tara ti kan pe yeri. A Abirahamu wì si taga Yɛnŋɛlɛ li na. Naa wìla kaa lɛ ma pye lelɛŋgbaraga, a Yɛnŋɛlɛ lì si pinambyɔ kan wi yeri. Abirahamu wi yaa ka setirige piile lɛgɛrɛ ta mbele pe yaa kaa tunŋgo piin Yɛnŋɛlɛ li kan. Pe maa Abirahamu wi setirige piile pe yinri Eburuye, na pe yinri fun Izirayɛli woolo; katugu Izirayɛli wìla pye Abirahamu wi pishyɛnwoo. Izirayɛli, wo ŋa pàa pye na yinri Zhakɔbu, pinambiile kɛ ma yiri shyɛn wìla se, poro pàa pye Izirayɛli cɛngɛlɛ kɛ ma yiri shyɛn ke tɛlɛye wele.
Puŋgo na, Izirayɛli woolo pàa kaa pan ma pye kulolo wa Ezhipiti tara. A Yɛnŋɛlɛ lì si naŋa wa wɔ ŋa pàa pye na yinri Moyisi mbe pe shɔ mbe pe yirige wa Ezhipiti tara wo fanŋga na. Pe shɔŋgɔlɔ, a lì si kari pe ni naa wa Kana tara; katugu làa keli ma yɔn fɔlɔ kɔn ki tara ti wogo na ma yo fɔ puŋgo na, wa wagati titɔnlɔwɔ ŋa wila paan wa yɛgɛ wi ni, li yaa ki tara ti kan Abirahamu wo naa wi setirige piile pe yeri.
Naa Yɛnŋɛlɛ làa kaa li yɛɛ naga Moyisi wi na, làa li mɛgɛ jɛŋgɛ ki naga wi na, pa pège yɔnlɔgɔ yɛɛn YHWH; ko kɔrɔ wo yɛn fɔ «Ŋa wi yɛn», nakoma «Ŋa wi yɛn wa». Yɛlɛ cɛnmɛ shyɛn (200) toroŋgɔlɔ Zhezu Kirisi wi sege ki yɛgɛ, naa pàa kaa Bibulu wi kanŋga Girɛkiye sɛnrɛ ti ni, a Zhufuye pè sigi mɛgɛ ki kanŋga ma yo «we Fɔ» jaŋgo paga ka ta mbaa Yɛnŋɛlɛ li mɛgɛ ki yinri jaga jaga. Jinmiire ti ni wège mɛgɛ ki kanŋga ma yo «Yawe Yɛnŋɛlɛ». Yɛnŋɛlɛ li mɛgɛ jɛŋgɛ ki yerewe pi woro ma jɛn.
Naa Yɛnŋɛlɛ làa kaa Izirayɛli woolo pe yirige ma pe wɔ wa Ezhipiti tara ti ni, a lì si yɔn finliwɛ pa yɛgɛ le pe ni. Ɛɛn fɔ Izirayɛli woolo pe sila yɔn finliwɛ pi ŋgasegele ke yigi mbaa tanri ke na. Pàa ki lɛ na cɛngɛlɛ ŋgele ke yɛn ma pe maga ke yarisunndo ti gbogo paa ke yɛn. Sanni Yɛnŋɛlɛ lo mbe sa cɛn pe go na, pàa pye naga jaa wunlunaŋa wa mbe cɛn pe go na paa cɛngɛlɛ sanŋgala ke yɛn. Kì pye ma, a Yɛnŋɛlɛ lì si je pe na, ma pe le jɔlɔgɔ, mɛɛ ti cɛngɛlɛ ŋgele ke yɛn ma pe maga, a kè pan ma to pe na, ma pe tara ti tɔngɔ. Làa ti a pè pe koli malaga kasopiile ma kari pe ni. Ɛɛn fɔ Yɛnŋɛlɛ li sila fɛgɛ yɔn finliwɛ mba làa le pe ni pi na. Ki kala na, làa toro Yɛnŋɛlɛ yɔn sɛnrɛ yofɛnnɛ lɛgɛrɛ yeri, maga yo pe kan fɔ li yaa shɔfɔ torogo wa pe sɔgɔwɔ. Pa ki shɔfɔ wi yaa ka yiri wa pe wunlunaŋa gbɔɔ Davidi wi sege ki ni. Pa Davidi wìla yiri wa Zhuda cɛnlɛ li ni. Naa malaga kasopiile pàa kaa sɔngɔrɔ ma pan, pàa pye na pe yinri Zhufuye, katugu pàa cɛn wa Zhuda tara ti ni.
Wa Yɔn fɔlɔ fɔnnɔ sɛwɛ wi ni, wège yan paa yɛgɛ ŋga na Yɛnŋɛlɛ làa ki Shɔfɔ wi torogo. Pe maa wi yinri Zhezu; wo wi yɛn dunruya woolo pe ni fuun pe shɔfɔ we. Kì pye ma, mbele fuun pè pe jigi wi taga Zhezu wi na, wi yɔn finliwɛ fɔnmbɔ le pe ni. Zhezu wì pan laga dunruya wi ni ki yɛlɛ waga shyɛn (2 000) yɔn ko tin. Wi pansanga wi ni, kìla yala Ɔrɔmu tara wunlumbolo poro pàa pye ma cɛn dunruya wi ni fuun wi go na. Zhufuye pe jigi wìla pye ki na mbe wunlunaŋa wa ta shɔfɔ, wi pan wi pe shɔ Ɔrɔmu tara fɛnnɛ pe kɛɛ. Ɛɛn fɔ Zhezu wìla pan mbe poro naa sɛnwee piile pe ni fuun pe shɔ Sɔtanla wo naa kapege konaa kunwɔ pi kɛɛ.
Wa Yɔn fɔlɔ fɔnnɔ sɛwɛ wi ni, sɛwɛɛlɛ koŋgbanmbala tijɛrɛ pe yɛn na para Zhezu wi yinwege ko sɛnrɛ na. Ki sɛwɛɛlɛ tijɛrɛ pe maa pe nuŋgba nuŋgba pyew pe yinri Zhezu Sɛntanra sɛwɛ. Wa Sɛntanra sɛwɛɛlɛ pe ni, wège yan paa yɛgɛ ŋga na pàa Zhezu wi se, naa kafɔnŋgɔlɔ ŋgele wìla pye ke ni konaa nagawa sɛnrɛ nda wìla naga ti ni. Ko puŋgo na, a wège yan paa yɛgɛ ŋga na Zhufuye teele pàa je Zhezu wi na ma pye wi juguye. Pàa ti, a pè Zhezu wi kan tiparaga na maa gbo. Ɛɛn fɔ Zhezu wìla yɛn ma yiri wa kunwɔ pi ni, ma yiri ma kari wa yɛnŋɛlɛ na. Wi kunwɔ naa wi yɛnmɛ ma yiri wa kunwɔ pi ni ti fanŋga na, wì we kapere ti fɔgɔ ki tɔn, ma tanwa le woro naa Yɛnŋɛlɛ li sɔgɔwɔ, ma we go shɔ Sɔtanla wi kɛɛ; Sanni we sa puŋgo Yɛnŋɛlɛ li na fɔ sanga pyew, woro mbele wè taga Zhezu wi na, wì yinwege kan we yeri Yɛnŋɛlɛ li ni wa li wunluwɔ mbakɔɔ pi ni (Zhan 3.16).
Zhezu wìla leele pele wɔ ma pe tun paa sɛrɛfɛnnɛ yɛn, jaŋgo ŋga fuun wì pye ma we shɔ Sɔtanla wo naa kunwɔ pi kɛɛ, pe saa ki wogo ki yari.
Wa Kapyegele sɛwɛ wi ni, wège yan paa yɛgɛ ŋga na pitunmbolo pàa yiri wa Zheruzalɛmu ma saa na Sɛntanra ti yari dunruya wi lagapyew. Zhezu wi pitunmbolo pàa sɛwɛɛlɛ lɛgɛrɛ yɔnlɔgɔ ma pe torogo legiliziye mbele pàa tɛgɛtɛgɛ pe yeri konaa tagafɛnnɛ pele yeri legiliziye pele ni. Wa ki sɛwɛɛlɛ pe ni, pe yɛn na nagawa jɛmbɛ kaan Zhezu wi wogo na, konaa yɛgɛ ŋga na ma daga mbaa ma yinwege ki piin laga dunruya wi ni mbe si Yɛnŋɛlɛ li ndanla.
Wa Yɔn fɔlɔ fɔnnɔ sɛwɛ wi sɛwɛ puŋgo woo wi ni, wège kara maga yan yɛgɛ ŋga na Zhezu wi yaa ka yiri wa yɛnŋɛlɛ na mbe sɔngɔrɔ mbe pan. Ko yaa ka pye dunruya wi kɔwɔ konaa cew tawa Sɔtanla wi na.
Sɛnrɛ puŋgo woro
Mbaa Bibulu wi kara ki yɛn ma yɔn, ki tɔnli wi yɛn ma gbɔgɔ fɔ jɛŋgɛ; we daga mbege jɛn fɔ Bibulu wo wi yɛn Yɛnŋɛlɛ li sɛnrɛ jate re. Wi maa sɛnwee pyɔ wi yinwege kala li ni fuun li nari we na konaa shɔwɔ konɔ li ni. Bibulu wi yɛn sɛwɛ ŋa wi yɛn kpoyi. Wi sɛnrɛ ti ni fuun ti yɛn ma sin, ti ni fuun ti yɛn kaselege. Puŋgosaga woro wi sɛnrɛ ta kpɛ ni. Lere pyew wi daga mbaa Bibulu wi kara tijinliwɛ jɛmbɛ konaa kotogo jɛŋgɛ ni, katugu wi tɔnli wi yɛn ma gbɔgɔ. Lere ŋa wi woro na Bibulu sɛnrɛ ti jate, ki fɔ wi yaa wi yɛɛ le jɔlɔgɔ, katugu wii Yɛnŋɛlɛ li nandanwa kala li jɛn mbaa li piin. We daga mbe taga Bibulu kpoyi wi sɛnrɛ ti na, mà jɛn ti yɛn paa duwale yɛn ŋa wi maa we yɛn yɛgɛ ŋga na ki nari we na; ti yɛn paa lamba yɛn ŋa wi maa yanwa yinrigi we kan na we torokonɔ li nari we na; ti yɛn paa suro yɛn nda ti ma we nawa pi yinŋgi; ti si yɛn paa kasɔn yɛn ŋga ki ma we kotogo ki pye kpoyi.
Wè Bibulu sɛnrɛ ti kanŋga Jinmiire ni ma yala Eburuye naa Girɛkiye sɛnrɛ sɛwɛɛlɛ koŋgbanmbala jɛmbɛlɛ poro ni. Wège ŋgbanga jɛŋgɛ ma ti kɔrɔ sinŋɛ wi yo mari filige, a ti logowo pì tanla jinmiire ni, jaŋgo lelɛgɛrɛ mbe ya paa ti kara, paa ti kɔrɔ wi nuru, pe tɔnli gbɔɔ ta wa ti ni. Yɛnŋɛlɛ sa duwaw ye na. Ki sɛwɛ ŋa wi karawa pi na, Yɛnŋɛlɛ li fanŋga kan ye yeri ye ya yaa ti yuun leele pele yɛgɛ kan fun.
Sɛwɛ wi tɛgɛrɛ ta kɔrɔ yɛgɛ nagawa
Na maga ki tɛgɛrɛ nda (............) ti yan laga ka na laga ki sɛwɛ ŋa wi nawa, sɛnrɛ nda ti yɛn wa ti sɔgɔwɔ pi ni, ko yɛn naga nari ma yo Yɛnŋɛlɛ sɛnrɛ sɛwɛ wi yɔnlɔgɔfɔ wìla sɛnrɛ ta kɔrɔ yo mari filige le ki laga ki na, ti woro Girɛki sɛwɛ lɛɛlɛ pe ni fuun ni. Ki kala na, wèri yɔnlɔgɔ, jaŋgo tiga ka puŋgo mbe kɔ.
Na maga ki tɛgɛrɛ nda [............] ti yan laga ka na, sɛnrɛ nda ti yɛn ma yɔnlɔgɔ wa ti sɔgɔwɔ pi ni, ko yɛn naga nari ma yo ki sɛnrɛ ti woro wa sɛwɛ lɛɛlɛ mbele pè yɔnlɔgɔ faa pe ni.
Na maga ki tɛgɛrɛ nda «............» ti yan, ko yɛn naga nari ma yo sɛnrɛ nda ti yɛn wa ti sɔgɔwɔ pi ni, ti yɛn lere ŋa wila pye na para ki sanga wi ni, wo jate sɛnyoro, nakosima sɛnrɛ tari nda tì yo Bibulu wi laga ka ni naa.
Na maga ki tɛgɛrɛ nda ti yan sɛnpyɔ ŋa tanla *, ma wele wa sɛwɛ wi kɔsaga, wa laga ŋga ki yɛn ma yɔnlɔgɔ ma yo fɔ: Sɛnpiile pele kɔrɔ yowo. Pa ma yaa ki sɛnpyɔ wi kɔrɔ wi yan wa.
Na maga ki tɛgɛrɛ nda ti yan sɛnrɛ konɔ na kɔsaga na †, ti yɛn ma yɔnlɔgɔ sɛwɛ pyɔ ŋa na, ma wele wa wi nɔgɔ na, pa ma yaa ki sɛnrɛ ti kɔrɔ wi yan le, nakosima ma yaa vɛriseye pele yan yɔnlɔgɔsaga wa, mbele pe yaa ma saga mari kɔrɔ wi jɛn.