Melkidhedek
7
1 Melkidhedek ë ye bɛnydït gen cɔl Thalam, ku yen aya ë ye raandït apɛi käk Nhialic Madhɔl. Naɣɔn akäl tök ke piŋ lɔn cï Abaram la dhuk tɔŋ yic ke cï tɔŋ bäny wuɔ̈t kaŋuan cop. 2 Go Abaram Melkidhedek juɛr töŋ thiäär käk cï ke la peec tɔŋ yic. Melkidhedek, wɛtde yic, <<Bɛny la cök.>> Ku ë ye bɛny dɔ̈ɔ̈r aya. Cïmën rin genden cɔl Thalam, wɛtde yic, ee <<Dɔ̈ɔ̈r.>> 3 Acïn wun ku man ku kuat. Ku tɛn jɔɔk piɛrde rot thïn ku le thök acïï ŋic. Arɛɛr ke ye raan käk Nhialic akölriëëc cïmën Wën Nhialic.4 Jalkë tïŋ tɛ dïït Melkidhedek thïn! Agut Abaram guɔ̈p, raandït wärkuan dït thɛɛr, acï töŋ thiäär käkken wäär cïk la peec tɔŋ yic, juɛr ye. 5 Alëu raan bï gam lɔn ye kë cï Abaram ajuër gäm Melkidhedek yic, tɛn ye Melkidhedek raan Lebï, kuat Abaram kek kɔc käk Nhialic ë kɔc Itharel wäär tök thiäär yic juaar tënë kacken cït löŋ Mothith. 6 Ku yen Melkidhedek acie raan kuat Lebï, ku aca ajuër bɛn lööm tënë Abaram ku cuët pïu. Ku Abaram acä athön Nhialic yök. 7 Ku aŋicku aya lɔn raan yen kɔc dɔɔc, awär raan bɛn tënë ye bï bɛn dɔɔc. 8 Ku dɛt aya, kɔc käk Nhialic wäär ajuër kuany, aake ye kɔc ë path, aacï bɛn thou cïmën bï ɣok thou, ku aye athör thɛɛr wël Nhialic lɛk ɣo lɔn Melkidhedek apïr. 9 Alëu buk lueel lɔn ye Melkidhedek raandït apɛi käk Nhialic tënë kɔc Lebï, kɔc käk Nhialic. Rin Abaram wundït kuat Lebï, yen acï töŋ thiäär käk wäär cïk la peec tɔŋ yic juɛr Melkidhedek. 10 Këya, alëu bï lueel lɔn kɔc Lebï aacï töŋ thiäär juɛr Melkidhedek aya, rin ye kek kɔc riɛm Abaram.
11 Na lëu kɔc Lebï, kɔc käk Nhialic bïk ɣo cɔl aala cök, ŋuɔ̈t acïn dɛt ben raan dɛt käk Nhialic cïmën Melkidhedek bɛn, raan cïï cït Aron, raandït käk Nhialic wäär ë kuat Lebï. Ku kɔc Lebï, kɔc käk Nhialic aake buɔth löŋ Mothith yic. 12 Ku aa këc ɣo bɛn cɔl aala cök. Ku këya, acie raan dɛt käk Nhialic yen wïcku ë rot, ɣok aa wïc löŋ dɛt yam aya. 13 Jethu Bänyda, raan jiɛɛm ɣok riɛnke ëmën, ee cie raan dhiënh Lebï. Ku acïn raan töŋ kuatde cï kaŋ a raan käk Nhialic, ee Nhialic door yïk nhom. 14 Aŋicku lɔn Bänyda Jethu ë raan dhiënh Juda. Ku akëc Mothith puɔ̈l bï kɔc dhiënh Juda ya kɔc käk Nhialic.
Raan dɛt käk Nhialic cït Melkidhedek
15 Acï jäl la gɛi apɛi ëmën, tɛ le raandït dɛt käk Nhialic cït Melkidhedek tuɔ̈l. 16 Raan këc aa raandït käk Nhialic cït löŋ ciɛɛŋ kɔc pinynhom, acï ya raandït käk Nhialic cïn kë bï riɛlden pïr akölriëëc ëbën kaŋ rac. 17 Rin aye athör thɛɛr wël Nhialic lueel ëlä ë riɛnke, <<Yïn abï ya raan käk Nhialic akölriëëc ëbën cïmën Melkidhedek.>> 18 Ku löŋ thɛɛr wäär acï puɔ̈l acïï ril. Acie kɔc ë kony. 19 Rin löŋ Mothith acie kɔc cɔl aala cök. Ke ëmën ɣok aala löŋ yam ɣo cɔl aŋɔ̈th lɔn bï ɣok thiɔ̈k kek Nhialic.
20 Ku dɛt, Nhialic ëcï kuëëŋ aya këde. Ku acïn kɔc kɔ̈k cï ya kɔc käk Nhialic cï yen kuëëŋ këden. 21 Ku Jethu acï ya raandït käk Nhialic apɛi rin cï Nhialic kuëëŋ wɛtde wäär lueel yen ye ëlä, <<Ɣɛn acï kuëëŋ ku acä bï waar yic. Yïn ë bɛny akölriëëc ëbën.>> 22 Rin ë kuëëŋ kënë yen acï ɣok ye ŋic lɔn löŋ dɔ̈ɔ̈r ë yam cï Nhialic looi ë Jethu, ya këpath.
23 Ku dɛt cïï kek thöŋ akïn. Kɔc käk Nhialic thɛɛr aake ye juëc, rin na cï raandït käk Nhialic thou, ke raan dɛt ala nyiɛnde. 24 Ku Jethu apïr akölriëëc ëbën, luɔiden ë yen raandït käk Nhialic acie rot ye waar. 25 Jethu ala riɛl dït bï kɔc buɔth dhɔ̈lde yic kony ëbën, kɔc wïc ye bïk la tënë Nhialic. Rin ë rëër ke läŋ Nhialic ë riɛnken.
26 Jethu yen ë raandït käk Nhialic cï käkkua lëu. Arɛɛr ke dhëëŋ Nhialic, acïn guɔ̈p adumuɔ̈ɔ̈m, ku yen acï Nhialic tɛk bei tënë kɔc kärɛc looi, ku tɛɛu käk cï cak nhïïm ëbën nhial. 27 Yen acïï thöŋ kek kɔcdït käk Nhialic wäär ɣɔ̈k nɔ̈k ruɔ̈ɔ̈n thok ëbën, rin bï adumuɔ̈ɔ̈mken ku adumuɔ̈ɔ̈m kacken päl piny. Jethu acïï thöŋ ke ke. Acï rot juaar arak tök wäär thou yen tim cï rïïu kɔ̈u rin adumuɔ̈ɔ̈m kɔc ëbën. 28 Këya, alëuku buk ŋic lɔn kɔc käk Nhialic wäär ë luui dhöl löŋ Mothith aake cïï la cök. Ku athön Nhialic cï yen kuëëŋ wäär löŋ Mothith ëbën cök, acï Wënde looi bï ya raan la cök akölriëëc ëbën.