Athör cï Paulo gät Tito
1
1 Athör Paulo aluaŋ Nhialic ku ye atuny Jethu Krïtho cï tuɔ̈c Tito. Ɣɛn ëcï kuany ku toc ɣa ba kɔc cï Nhialic kuany bɛɛi gam yic bïk pïr akölriëëc ëbën yök, ku ŋickë yic kɔc ɣäth tënë Nhialic, 2 yen tɔ̈ ŋɔ̈th ë pïïr akölriëëc thïn. Nhialic cïï lueth ye lueel, acï ɣo thɔ̈n ë pïïr kënë wäthɛɛr ke piny këc cak. 3 Löŋ ë pïr acï Nhialic nyooth ku tuuc ɣɛn ë riɛlde kek Aluäŋda Jethu ba bɛn lɛk we.4 Yïn agät athör Tito manhdiɛ Nhialic nhom, cuk gam ɣodhie. Bï dɔ̈ɔ̈r ku dhëëŋ Nhialic Wäda kek Wënde Jethu Krïtho Aluäŋda rëër kek yï.
Luɔi Tito pan Kret
5 Yïn aca nyiääŋ pan Kret, ba käk këc röt cök wäär lɔ̈k cök. Ku kuany kɔcdït bïk akuut kɔc cï gam wat nhïïm ë gɛɛth pan Kret yiic ëbën cït tɛ cï ɣɛn ye lɛk yï thïn. 6 Raandït wat akut nhom adhil a raan luɔi akut kɔc cï gam looi apath, ku acï thiëëk tiɛŋ tök. Ku miɛthke aadhil aa kɔc cï gam ku lek gup athɛɛk ku cïk nhïïm ril. 7 Këya, raan wat akut kɔc cï gam nhom yen ë raan luɔi käk ë Nhialic, adhil a raan path cïï nhom ril, cïï puɔ̈u lac dak ku cïï ye wiɛɛt ë määu ku cïn guɔ̈p akɔ̈ɔ̈k, ku cïï ye bath wëëu. 8 Adhil aa biökrual ku nhiɛɛr luɔi këpath, adhil a raan ë rot duut, la cök ë Nhialic nhom ku pɛth. 9 Ee raan dhil wɛt Nhialic muk piände ëbën cït tɛ cï ye piɔ̈ɔ̈c thïn. Këya, abï kɔc kɔ̈k riɛɛl puɔth wɛt Nhialic cie lueth yic, ku nyuth kɔc kuec ë wɛt kënë lɔn ye piɔ̈ɔ̈cde yic.
10 Rin kɔc juëc aake cï kuec, ku alanden kɔc Itharel cï gam bïk bɛn Jethu cök, aa kɔc bɛn liääp nhïïm ë lueth ye kek kɔc wëŋ nyïn. 11 Aŋuɛɛn bï ke yɔ̈ɔ̈k bïk kɔ̈ɔ̈c ë jam, rin liëëp kek kɔc nhïïm bɛɛi yiic piööcden rɛɛc kënë wɛt wïc kek wëëu ë path tënë kɔc yekë ke piɔ̈ɔ̈c. 12 Raan tök pan Kret ë kam kɔcken käk Nhialic tïŋ acï yic lueel ëlä, <<Kɔckuan pan Kret aa lueth, aa lääi, aa dak rööt cie luui, aa köör ë mïïth.>> 13 Rin wɛt kënë adhil wek ke aa miɛk nyïn thïn apɛi, bïk kepuɔ̈th waar bïk wɛt Nhialic gam kepuɔ̈th ëbën. 14 Ku cïkkë ben aa luui wël kɔc Itharel, wël cït anyïkööl, lööŋ kɔc cï kuec ë wɛt yic. 15 Tënë kɔc ɣer puɔ̈th ëbën aa cïn yiic ajuɛɛc, ku tënë kɔc col puɔ̈th käŋ ëbën aa la yiic ajuɛɛc rin aacï wel nhïïm ku piäthken aacï yith kuc. 16 Ku ayekë lueel lɔn ŋic kek Nhialic, ku aye käk yekë ke looi nyooth lɔn cïï kek ye ŋic. Acïn kë ye kek piath thïn, aa cïn gup athɛɛk ku acïn këpɛth yekë looi.