Pïtɛr ku Joon aacï ɣäth luk yic
4
1 Tɛwën jiɛɛm Pïtɛr tënë kɔc ku Joon ke kääc yelɔ̈ɔ̈m, ke kɔc kɔ̈k käk Nhialic, ku bɛny apuruuk ɣön Nhialic tiit, ku jɔl aa kɔcdït kɔ̈k, kɔc akut Thaduthï bɔ̈. 2 Keek aake cïï puɔ̈th mit wɛt ye Pïtɛr ku Joon kɔc piɔ̈ɔ̈c lɔn nadë ke Jethu acï rot jɔt kam kɔc cï thou. Kënë aye nyuɔɔth lɔn nadë raan cï thou alëu bï bɛn pïr. 3 Gokë ke dɔm ku lek ke mac agut ɣɔn nhiäk, rin cï akɔ̈l cuɔl. 4 Ku kɔc juëc cï wɛt Pïtɛr piŋ aacï gam, ku juakkë röt bïk ciɛt tiim kadhiëc.5 Nawën aköl dɛɛtë ke bäny Itharel ku kɔcdït baai, ku jɔl aa kɔc piööc lööŋ, kuut kenhïïm Jeruthalem. 6 Keek aacä amat jäl looi kek raandït käk Nhialic cɔl Anath, ku jɔl aa Kaipa, ku Joon, ku Alekdhändɛr, ku kɔc kɔ̈k many Anath thok. 7 Keek aacï Pïtɛr ku Joon cɔl aabï kenhïïm, ku jɔlkë ke thiëëc, <<Ee luɔikë këdë ku bï raan aduany cath? Ye riɛl ŋö yen tɔ̈ kek we ku ye rin ŋa yen looi wek ye?>>
8 Go Pïtɛr ke cï guɔ̈p thiäŋ riɛl Wëi Nhialic, dhuɔ̈k ke, <<Wek bäny ku kɔcdït baai. 9 Na yakë ɣo thiëëc yaköl këpuɔɔth cï looi tënë raan aduany ku tɛ cï ye kuɔny thïn, 10 ka dhiɛlkë ŋic, ku adhil kɔc Itharel ŋic ëbën, lɔn raan kääc wenhïïm ke cï pial, ee riɛl Jethu raan Nadharet wäär cäk piäät tim cï rïïu kɔ̈u, ku jɔt Nhialic raŋ yic. 11 Jethu ë yen raan cï wɛtde gɔ̈t athör thɛɛr wël Nhialic yic ëlä, <Mën yen cï wek kuec wek atëët loi ɣöt, yen acï bɛn yök ke ye mën ril apɛidït.>
12 <<Ee yen Jethu yen abï kɔc cɔl apoth la pan mac, ee yen raan tööŋ yen cï Nhialic yiëk riɛl pinynhom ku bï ɣo kony.>>
13 Go bäny luk jäl gäi wën cï kek Pïtɛr ku Joon tïŋ tɛ cï kek puɔ̈th ril thïn, ku keek aake ye kɔc ë path këc piöc. Yeen acïk ŋic lɔn nadë ke keek aake ye cath kek Jethu. 14 Ku acïn kë cïk lueel, rin cï kek raan aduany wën cï kony tïŋ ke kääc kek Pïtɛr ku Joon. 15 Go bäny Pïtɛr ku Joon yɔ̈ɔ̈k bïk la aɣeer ɣööt ku lökkë jääm yic kepɛc. 16 Ku jɔlkë röt jäl thiëëc kamken, <<Ye kën ŋö buk luɔ̈i ë kɔckä? Raan ëbën Jeruthalem aŋic kë cï rot looi, këdït jäŋ gɔ̈i cït ë kën cïk looi, ku acïï lëu buk jai. 17 Ku rin buk cïï päl, bï kë cï rot looi thiëi baai yic, ke keek abuk yɔ̈ɔ̈k bïk cïï ben jam tënë raan dɛt rin Jethu.>>
18 Ku jɔlkë Pïtɛr ku Joon caal ɣöt ku lëkkë ke, cɔk alɔn ben ŋö yiëndë, ke duɔ̈kkë ben jam, duɔ̈kkë kɔc ben piɔ̈ɔ̈c rin Jethu. 19 Go Pïtɛr ku Joon dhuɔ̈k ke, <<Week nhïïm alɛukë bäk guɔ luk tɛ ye Nhialic tiɛŋ ye lɔn bï ya wɛtdun yen buk gam, ku lɔn ye yen wɛt Nhialic. 20 Ɣook acuk lëu buk kɔ̈ɔ̈c, buk cïï ben jam rin Jethu, rin cï ɣok käkken cï looi tïŋ, ku piŋku wël cï lueel.>> 21 Go bäny luk ke thɔ̈n apɛi bïk cïï ben jam rin Jethu, ku lonykë ke bïk jäl. Ee cï bäny luk tïŋ lɔn ril yen yic, bïk ke tɛm awuɔ̈c, rin kɔc aake tɔ̈ kelɔ̈m ku aake ye kiu, ku aake lec Nhialic wɛt këpuɔth cï rot looi.
22 Mony aduany yen cïk cɔl apuɔl ë ye raandït, ruɔ̈nke aake ye thiärŋuan ku tɛ kac.
Kɔc cï gam aacï röök bïk cïï riɔ̈c
23 Nyin yic tɛwën cï ke lony, ke Pïtɛr ku Joon dhuk tënë kɔc akuɔ̈tden, ku lëkkë ke kä cï kɔcdït käk Nhialic ku kɔcdït baai lɛk ke. 24 Nawën piŋkë ë wëlkä, ke röök Nhialic puɔ̈u ëbën ëlä, <<Bɛny, yïn Aciëŋ nhial ku piny ku wër ku käk pïr thïn ëbën! 25 Yïn acï Wɛiku tooc bï Wädan dït thɛɛr Debit, raan ye aluɔnydu wɛtdu lɛk kɔc, ku ëcï lueel ëlä,
<Yeŋö cï kɔc cie kɔc Itharel puɔ̈th riääk apɛi këlä,
yeŋö cï kɔc kekɔ̈ɔ̈th wel bïk kärɛc aa looi tënë Nhialic?
26 Bänydït ë pinynhom aake cï röt guiir, ku mat kɔc ke mɛc bɛi kenhïïm,
bïk kërac luɔ̈i Nhialic ku jɔl a Raan cï lɔc ku dɔc,
raan bï Nhialic tuɔ̈ɔ̈c piny.>
27 <<Ku yeen ë ye yic, Antipäth Ɣërot ku Pilato aake cï mat kedhie Jeruthalem ë tɛn kek kɔc cie kɔc Itharel, ku jɔl aa kɔc Itharel rin Jethu aluaŋdun cïn guɔ̈p acuɔl, ku yeen ë yen ca looi ke ye Raan cï lɔc ku dɔc. 28 Keek aake cï kenhïïm mat, ku bïk käkkun ke ca tak riɛldu thɛɛr, ka bï röt looi, bïk ke looi. 29 Ku yeen ëmën bɛny, tïŋ ke aacï ɣok cuɛk thook, kony ɣok, ɣok aluakku, ku buk wɛtdu aa lɛk kɔc ke cïn riɔ̈ɔ̈c. 30 Kony ɣo, tar yïcin riɛl kɔ̈ŋdu, buk kɔc aa kony ku yiëk ɣo riɛl buk kädït kɔc gɔ̈i aa looi rin aluaŋdun cïn guɔ̈p acuɔl Jethu.>>
31 Wën cï kek jäl thök röök, ke la kë yiɛɛk tɛn awën mɛt kek thïn. Keek aake cï Wëi Nhialic bɛn kegup, ku jɔlkë guɔ jɔɔk bïk wɛt Nhialic piɔ̈ɔ̈c tënë kɔc ke cïn riɔ̈ɔ̈c.
32 Akut kɔc cï gam ëcï mat ë tök. Ee cïn raan tööŋ ye luel kamken lɔn nadë käk tɔ̈ kek ye aa käkke yetök, ku aake käk rɛɛr ke ke rɔm. 33 Atuuc Jethu aake cï Nhialic yiëk riɛldït, ku bïk aa lueel ke cïï riɔ̈c lɔn cï Jethu Bänyda rot jɔt raŋ yic. Ku keek aya, aake cï Nhialic dɔɔc apɛidït. 34-35 Ë cïn raan töŋ ŋɔ̈ŋ akuɔ̈tden yic. Kɔc ke la dum kamken ku ɣööt aake cïk ɣaac, ku bïïkë wëëu cïk kek käŋ ɣaac, ku yekë ke gäm atuuc Jethu. Ku wëëu aake yekë tɛk röt cït këwïc raan tök kamken.
36-37 Ku këya, Jothep raan dhiënh Lebï, dhiëth pan Thaipruth, ku yeen ë ye atuuc Jethu cɔɔl, ke cɔl Barnaba (ku wɛtde yic <<Ee raan kɔc riɛɛl puɔ̈th>>) ecï duɔmde ɣaac wei aya, ku bïï wëëu ëbën ku gɛm ke atuuc Jethu.