Joon 4

Jethu ku tiŋ pan Thamaria

1 Nawën ke ŋic Jethu lɔn cï kɔc akut Parathï ye piŋ, lɔn nadë ke kɔc aa bɛn tënë ye bï ke bɛn muɔɔc nhïïm, ku lɔn cï yen la kɔc juëc ye buɔɔth wär kɔc Joon buɔɔth. 2 (Ku acie yen ye kɔc muɔɔc nhïïm, aa kɔcken ye buɔɔth.) 3 Nawën piŋ wɛt ye lueel, go jäl pan Judia ku dhuk Galilia. 4 Ku ë bï dhiɛl ɣet pan Thamaria rin yen ë dhël tëëk yen thïn.

5 Go ɣet pan Thamaria cɔl Thikar thiääk ke piny wäär cï Jakop gäm wënde Jothep. 6 Ku yinh cï Jakop cɔl awec ë tɔ̈ thïn. Nawën cï Jethu dak ë cäth, go nyuc yith lɔ̈ɔ̈m. Ku ë ye akɔ̈l ciɛl yic.

7 Go tiŋ pan Thamaria bɛn yiith bï bɛn gem pïu, go Jethu lɛk ye, <<Muɔc ɣɛn pïu ba dek.>> 8 (Ku kɔcken ye buɔɔth aake cï la geeu bïk la ɣɔɔc miëth.)

9 Go tiŋ pan Thamaria lɛk ye, <<Këdë wën? Yïn ë raan Itharel ku thiëc ɣa, ɣɛn raan Thamaria ba yï muɔɔc ë pïu?>> (Kɔc Itharel aake cie dek kek kɔc Thamaria.)

10 Go Jethu bɛɛr, <<Na yï ŋic miɔ̈c Nhialic ku raan thiëc yï pïu ŋuɔ̈t aca thiëëc, ku ŋuɔ̈t acï muɔɔc pïu pïr.>>

11 Go tik lueel, <<Bɛny, yïn acïn kë gem yïn pïu, ku yith amec yic, ba pïu pïr yök tɛnɛn? 12 Ye yïn dït tënë wädït Jakop raan cï ɣo gäm yinh kënë, ku dëk thïn yen ye nhom kek miɛthke ku ɣäkke?>>

13 Go Jethu bɛɛr, <<Kuat raan dek pïukä abï rou bɛn nɔ̈k, 14 ku raan bï dek pïu ba yiëk ye acïï rou bï bɛn nɔ̈k, ku pïu bï yiëk ye aabï ya dhiama yeyic ye pïu pïr kuër thïn, ku yïk ye pïr alanden.>>

15 Go tik lɛk ye, <<Bɛny, yiëk ɣɛn pïukä bï rou ɣa cïï ben nɔ̈k, ba cïï ben bɛn tɛn ba bɛn gem pïu.>> 16 Go Jethu lɛk ye, <<Lɔɔr cɔl muɔnydu bäk bɛn tɛn.>>

17 Go tik lueel, <<Ɣɛn acïn moc.>> Go Jethu bɛɛr, <<Këdu ë yic, lɔn cïn yïn moc. 18 Yïn acï kaŋ rëër kek röör kadhiëc, ku mony rɛɛr kek yï ëmën acie muɔnydu. Yïn acï yic lueel.>>

19 Go tik lueel, <<Bɛny aca ŋic, yïn ë raan käk Nhialic tïŋ. 20 Wärkuan thɛɛr pan Thamaria aake ye Nhialic door ë gɔn kënë nhom, ku ayakë lueel wek kɔc Itharel lɔn dhil ɣok Nhialic la door Jeruthalem.>>

21 Go Jethu lueel, <<Gam wɛtdiɛ, yïn tiŋë tɛ bï wek Wä door acï thiɔ̈k, ku acie gɔn kënë nhom ku acie Jeruthalem. 22 Wek kɔc Thamaria wek kuc raan yakë door, ku ɣok kɔc Itharel ɣok aa ŋic raan yeku door rin pïr abɔ̈ tënë Itharel. 23 Ku akɔ̈l ajɔl bɛn, ku acï guɔ bɛn ëmën guɔ̈p, tɛ bï riɛl Wëi Nhialic kɔc cɔl aa dor Wä cïmënde, kek aa kɔc wïc Wä bïk ye door. 24 Nhialic ë Wëi, ku rin riɛl Wɛike yen alëu ye bï door cïmënde.>>

25 Go tik bɛn lɛk ye, <<Aŋiɛc lɔn bï Raan cï lɔc ku dɔc bɛn. Na le bɛn ka bï ɣo nyuɔ̈th këriëëc ëbën.>>

26 Go Jethu bɛɛr, <<Yen ë ɣɛn, raan jam kek yï.>>

27 Ku kaamthiin wën jiɛɛm kek, ke kɔcken ye buɔɔth bɔ̈ ku gɛikë apɛi rin jiɛɛm yen kek tik. Ku acïn raan tök kamken cï tik thiëëc, <<Yeŋö wïc, ku yeŋö jiɛɛm yen kek ye?>>

28 Go tik tönyden pïu nyääŋ piny, ku kɛt ke dhuk geeu ku lëk kɔc.

29 <<Bäk tiɛŋkë mony cä lɛk këriëëc ëbën ca looi. Nadë ke ye Raan cï lɔc ku dɔc?>> 30 Gokë bɛn bei geeu bïk la tënë Jethu.

31 Ku kaamthiin wën, ke lëk kɔcken ye buɔɔth ye, <<Raan piööc, jɔl mïth.>>

32 Go bɛɛr, <<Ɣɛn ala miëth, cïn kë ŋiɛckë thïn.>>

33 Go kɔcken ye buɔɔth röt jal aa thiëëc kamken, <<Tɛdë le raan cï miëth bɛɛi tënë ye?>>

34 Go Jethu lɛk ke, <<Miëthdiɛ ee lɔn ba wɛt raan toc ɣɛn looi, ku thääp luɔi cï gäm ɣa. 35 Cäk kääŋ ye lueel dhie ëlä, <Pɛi kaŋuan aŋoot ku rap abï tem.> Ku alɛk we, jatkë wenyïn bäk dum tïŋ, yemën rap aacï luɔk ku apath bï ke tem! 36 Raan rap tem aye riɔp ku ë kɔ̈th pïr tem alanden, këya raan cumcum ku raan tëmtëm aabï puɔ̈th miɛt kedhie. 37 Kääŋ acï ya yic. <Raan tök ë com ku tëm raan dɛt.> 38 Wek tuɔɔc bäk rap la tem dom yic ku ë dom këc wek luui thïn. Kɔc kɔ̈k aacï luui thïn ku wek aa röt kony luɔiden.>>

39 Go kɔc juëc Thamaria ë gen wën yic wɛt Jethu gam, rin cï tik wɛt lueel ëlä, <<Këriëëc ëbën ca looi acï lɛk ɣa.>> 40 Nawën bɔ̈ kɔc Thamaria tënë ye ke läŋkë bï rëër ke ke. Go Jethu nïn karou nɔ̈k thïn tɛɛn.

41 Go kɔc kɔ̈k juëc wɛtde jäl gam rin wël ye lɛk ke, 42 ku lëkkë tik, <<Ëmën, ɣok aacï wɛt jäl gam, ku akëcku gam rin wëlkun ca lueel, ku ë rin cï ɣok wɛtde piŋ ku ŋicku lɔn ë yen Aluäŋ kɔc pinynhom ëbën alanden.>>

Jethu acï manh bɛny kony

43 Nawën cï nïn karou nɔ̈k thïn tɛɛn, ke Jethu jɔl jäl ku ler lɔŋ Galilia. 44 Rin yen Jethu guɔ̈p ëcï lueel lɔn, <<Raan käk Nhialic tïŋ acie theek wuɔ̈nden.>> 45 Nawën ɣeet Galilia ke lor apɛi, rin wäär cï kek käk cï Jethu looi yai yic tïŋ, wäär cï kek la Yan Ayum cïn yic luɔu yic Jeruthalem.

46 Go Jethu bɛn dhuk gen Kana tɔ̈ Galilia, tɛwäär cï yen pïu waar thïn bï ya muɔ̈n abiëc. Ku raandït kam kɔc mac baai cï manhde tuaany Kapernaum ë tɔ̈ thïn. 47 Nawën piŋ lɔn cï Jethu jäl Judia ku ben dhuk Galilia, ke la tënë ye ku lɛŋ bï la Kapernaum bï manhden cï thiɔ̈k ke thou kony bï pial. 48 Go Jethu lɛk ye, <<Acïn raan bï ye gam kamkun tɛ këc wek kït ku kädït jäŋ gɔ̈i tïŋ.>>

49 Go raandït awën bɛɛr ku lueel, <<Bɛny, bäär lokku ba manhdiɛ dööt.>> 50 Go Jethu lɛk ye, <<Lɔɔr, manhdu abï pïr.>> Go mony wën wɛt Jethu gam ku jiël. 51 Wën ciɛth yen dhël yic, ke räm kek kɔcken luɔi ku luelkë, <<Manhdu acï ɣɔ̈r.>>

52 Go ke thiëëc akɔ̈l alɔŋ jɔl manhde ŋuɛɛn. Gokë lueel, <<Wäraköl tääŋ akɔ̈l yen ë jiël juäi yeguɔ̈p.>> 53 Go wun ŋic lɔn ë yen akɔ̈l alɔŋ wäär cï Jethu ye lɛk ye ëlä, <<Manhdu abï pïr.>> Ku jɔl wɛt Jethu gam kek kacke ëbën.

54 Kënë, yen aye kädït jäŋ gɔ̈i cï Jethu looi rou, wäär le yen dhuk Judia ku ler Galilia.