Jethu acï mony cï cin ruai kony
(Mt 12:9-14; Lk 6:6-11)
3
1 Naɣɔn aköl dɛt, aköl cïï kɔc Itharel ye luui, ke Jethu la tɛn amat kɔc Itharel, ku mony cï cin ruai ë tɔ̈ thïn. 2 Ku kɔc kɔ̈k aake tɔ̈ thïn, ku ë wïckë bïk tïŋ lɔn bï Jethu mony kënë kony bïk la luɔm, rin cï yen ye kony aköl cïï kɔc ye luui. 3 Wën ŋic Jethu kë tɔ̈ kepuɔ̈th, ke lëk mony awën cï cin ruai, <<Jɔt rot ku bäär tueŋ tɛn kɔc nhïïm.>> 4 Ku lëk Jethu Parathï ëlä, <<Wek kɔc ŋoot nhïïm lööŋ thɛɛr yic, ye kënɛn yic lëu bï looi aköl cïï kɔc ye luui, ye këpath aye kërac, bï raan kony bï pïr, kua pɛl wei bï thou?>>Gokë biɛt ëbën. 5 Go Jethu ke döt ke cï puɔ̈u riääk apɛi, rin ŋic kek yic ku cïk luel. Ku lëk mony awën cï cin ruai, <<Nyoth yïcin.>> Go yecin nyooth. Go ciɛɛnde piath. 6 Go Parathï, kɔc wïc ye bï Jethu nɔ̈k jäl tɛn amat ku lek tënë kɔc Ɣërot. Ku lek mat ke ke tɛ bï kek Jethu näk thïn.
Jethu ee jakrɛc cuɔp wei kɔc gup
7 Go Jethu jäl kek kɔcken ye buɔɔth ku lek wär Galilia kɔ̈u. Go kɔc juëc pan Galilia ke buɔɔth. 8 Wën piŋ kek käjuëc ye Jethu looi, ke kɔc juëc apɛi bɔ̈ tënë ye pan Judia, ku gen Jeruthalem ku Idumiɛ, ku jɔl aa bɛɛi tɔ̈ wär Jordan kɔ̈u, ayï gen Tire ku Thidon. 9 Go Jethu lɛk kɔcken ye buɔɔth bïk riäi guiir tënë ye bï yen la thïn, bïk cïï bɛr piny, 10 rin Jethu ëcï kɔc juëc tuany kony. Go kɔc juëc kɔ̈k tuany wïc bïk la tënë ye bïk la gɔɔt. 11 Na tïŋ kɔc la gup jakrɛc ë ke cuɛt röt piny yenhom ku dhiɛɛukë, <<Yïn ee Manh Nhialic.>>
12 Go Jethu jakrɛc yɔ̈ɔ̈k bïk cïï nyooth.
Jethu acä atuuc kathiäär ku rou kuany
(Mt 10:1-4; Lk 6:12-16)
13 Go Jethu kɔcken wïc cɔɔl ku jiël ke ke, ku lek gat nhïïm tɛ cïï ceŋ. Wën cï kek ɣet tɛn awën, 14 ke kuëny raan thiäär ku rou bei kɔc yiic. Ku ciëk ke ke cɔl atuuc ku lëk ke, <<Wek aca kuany bäk rëër ke ɣa. Ku wek aba ya tuɔɔc aɣeer bäk wɛtdiɛ aa la piɔ̈ɔ̈c. 15 Ku wek aabï la riɛl bäk jakrɛc aa cuɔp wei kɔc gup.>>
16 Kɔc ke cï Jethu kuany bïk ya atuɔ̈ɔ̈cke aayï, Thaimon (cï Jethu bɛn cäk ke cɔl Pïtɛr.) 17 Jemith Dhubedï kek wämënh koor cɔl Joon (kek aacï Jethu cäk ke cɔl Boanergeth, ku wɛtde yic kɔc ë mär deŋ.)a 18 Ku Andria, Pilipo, Bartholomeo, Matheo, (cɔl Lebï) Thomath, Jemith wën Alpawuth, Thadawuth, Thaimon, 19 ku jɔl a Judath Ithkariöt, raan wäär cï Jethu bɛn luɔm bï dɔm.
Jethu aye yɔ̈ɔ̈k lɔn le yen guɔ̈p jɔŋrac
(Mt 12:22-32; Lk 11:14-23; 12:10)
20 Nawën ke Jethu dhuk Kapernaum. Go kɔc juëc apɛi bɛn buɔɔth abï ciɛn tɛ cɔk yen nhom lääu kek kacke bïk mïth. 21 Nawën piŋ kɔc ruääi kek Jethu lɔn ye kɔc rɛɛr kek ye ye lueel, lɔn cïï yen nhom path, gokë la nyaai.
22 Ku ëcï kɔc kɔ̈k piööc lööŋ Itharel bɔ̈ Jeruthalem lueel, <<Ala guɔ̈p riɛl Beldhebul. Ee yen bɛny jakrɛc, yen ye yiëk riɛl bï ke aa cuɔp wei.>>
23 Go Jethu ke yɔ̈ɔ̈k, ku thööŋ wɛt ëlä, <<Ye jɔŋrac jɔŋ rɛɛc dɛt cuɔp wei këdë. 24 Na tek kɔc paan tök keyiic ku thɛrkë kamken, ke pan kënë abï riääk. 25 Na tuum dhiënh tök yenhom aya ku thɛrkë kamken ë röt, ke dhiënh kënë abï wɛɛr aya. 26 Këya, na tek jakrɛc keyiic ku thɛrkë kamken, ka thök.
27 <<Acïn raan lëu ye bï ɣön raan ril dhoŋ ku nyɛɛi käkke, akɔŋ raan ril kënë dɔm ku der, ku jɔl käk tɔ̈ baai nyaai.
28 <<Wek aa lɛk yic lɔn nadë adumuɔ̈ɔ̈m, ku kärɛc yekë ke looi, ku käk yekë lueel, aa lëu bï ke päl piny ëbën tënë kɔc. 29 Ku na ye raan Wëi Nhialic yɔ̈ɔ̈k lɔn ye yen jɔŋrac, ka adumuɔ̈ɔ̈mke aacïï kɔŋ päl piny akölriëëc ëbën.>> 30 Ee lueel Jethu këlä ë rin cï kɔc kɔ̈k ye lueel, <<Ka la guɔ̈p jakrɛc.>>
Man Jethu ku wämäthakën aacï Jethu nyaai
(Mt 12:46-50; Lk 8:9-21)
31 Go man Jethu kek wämäthakën ë Jethu bɛn ku kɛɛckë aɣeer ku tockë raan bï Jethu la cɔɔl. 32 Go kɔc ke rɛɛr, ke cï ye gööm lɛk ye, <<Moor ku wämäthakui aatɔ̈ aɣeer, ku aa wïc yï.>>