Jethu acï la Jeruthalem ke ciëm yai
(Mk 11:1-11; Lk 19:28-40; Jn 12:12-19)
21
1 Tɛwën cï kek thiɔ̈k kek Jeruthalem, ke bɔ̈ Bethpeec tɛthiääk kek gɔn Olip, ke Jethu ëcï kɔcken ye buɔɔth karou tuɔɔc tueŋ, 2 ku lëk ke, <<Lak bɛɛi tɔ̈ tueŋ yiic, ku wek aabä akaja yök ke mac ku manhde yelɔ̈ɔ̈m. Luɔnykë ke ku bɛɛikë ke tënë ɣa. 3 Na le raan thiëc we ke luɛlkë, keek aa wïc Bɛny ku aabï dhuk ëmën.>> 4 Kënë acï rot looi këya rin bï wɛt cï lueel ëlä thɛɛr raan käk Nhialic tïŋ yenhom tiɛɛŋ,5 <<Lëk kɔc Itharel,
ëmën bɛnyŋaknhom dun abɔ̈ tënë week!
Alir puɔ̈u ee cath akaja, manh akaja.>>
6 Go kɔc Jethu buɔɔth la ku loikë cïmën cï Jethu ye lɛk ke, 7 ku bïïkë akaja ke manhde ku kumkë kekɔ̈th aläthken, ku nyuc Jethu manh akaja kɔ̈u. 8 Kɔc juëc aacä aläthken thiɛth dhël yic, ku kɔc kɔ̈k aacä ayɔ̈r tiim dhoŋ ku thiethkë ke dhël yic aya.
9 Go kɔc ke tɔ̈ tueŋ yenhom ku kɔc ke buɔth ye, yai looi ku yekë wak ëlä,
<<Lecku wën Debit!
Bɛny dɔc raan bɔ̈ riɛnku lecku Nhialic Madhɔl!>>
10 Nawën ɣeet geeu Jeruthalem, ke kɔc gɛi apɛi ku yekë thiëc ëlä, <<Yeŋa kënë?>>
11 Ke bëër kɔc ŋic ye ku luelkë, <<Yen ë raan käk Nhialic tïŋ cɔl Jethu pan Nadharet, wun Galilia.>>
Jethu acï la luaŋ Nhialic
(Mk 11:15-19; Lk 19:45-48; Jn 2:13-22)
12 Nawën lek ɣet Jeruthalem ke Jethu la luaŋ Nhialic, ku cop kɔc käŋ ɣaac ku kɔc ɣööc aɣeer kal luaŋ Nhialic yic. Ku wel agen kɔc wëëu waar yiic piny, ku thöc kɔc ɣɔɔc wei ë kuɔ̈r. 13 Ku lëk ke,
<<Acï gɔ̈t ëlä athör thɛɛr wël Nhialic yiic,
<Kal luaŋdiɛ acï looi bï ya tɛn ye kɔc wuɔ̈t ëbën röök thïn,>
ku yen acäk wel bï ya tɛn cuɛr.>>
14 Kɔc cï cɔr ku kɔc cï duany aake cï bɛn tënë ye kal yic luaŋ Nhialic, goke kony. 15 Kɔc dït käk Nhialic ku kɔc gɛt lööŋ aake cï puɔ̈th dak tɛwën tïŋ kek käpuɔth cï Jethu looi, ku wën ye mïth ket kal yic luaŋ Nhialic ëlä, <<Lecku Wën Debit.>>
16 Ku luelkë tënë Jethu, <<Ye kë lueel ë mïthkä piŋ?>> Go bɛɛr, <<Aya piŋ. Ku kɛckë kënë kaŋ kueen,
<Yïn acï mïth agut mïth thii kor piɔ̈ɔ̈c bïk lɛc la cök aa lueel.> >>
17 Kaam wën cï Jethu wëlkä lueel, ke jiël geeu ku ler Bethanï tɛ cï yen bën anin thïn.
Jethu acï tim wak bï riau
(Mk 11:12-14, 20-24)
18 Naɣɔn nhiäk, tɛwën dhuk kek geeu, Jethu ë nɛk cɔk. 19 Nawën tïŋ tim cït ŋaap dhël yɔu, go la cɔl bï yök ke cï luɔk, go yök ke ayɔ̈r kepɛc. Go Jethu lueel, <<Yïn acïï mïth kɔŋ bɛn tïŋ athɛɛr!>> Ku nyin yic tɛwën ke tim riau.
20 Tɛwën tïŋ kɔcken ye buɔɔth ë kënë, ke gɛi apɛi, ku thiëckë röt, <<Yeŋö cï tim kënë guɔ riau?>>
21 Go Jethu bɛɛr, <<Na gamkë ke cïn diu, ka cie kë ca looi tënë ë tim kënë yen luɔikë ë rot, na cɔk a gɔn kënë yen yɔ̈ɔ̈kkë ëlä, <Jɔt rot ku cuat rot wïïr,> ka loi rot. 22 Ku na lak gam, ke këriëëc ëbën yakë ke thiëëc tɛ röök wek, aa yɔ̈kkë.>>
Bäny Itharel aa riɛl Jethu yɔ̈ɔ̈ŋ yic
(Mk 11:27-33; Lk 20:1-8)
23 Go Jethu bɛn dhuk kal yic luaŋ Nhialic, ku tɛwën piööc yen, ke bänydït käk Nhialic ku kɔc baai bɔ̈ tënë ye ku thiëckë ëlä, <<Ee yïn, ye riɛl ŋö tɔ̈ yïguɔ̈p ye yïn luui këlä? Ku yeŋa yïk yï ë riɛl kënë?>>
24 Go Jethu bɛɛr, <<Wek aba thiëëc wɛt tök aya, na bɛɛrkë apath, ke wek aba lɛk raan cä gäm riɛl ye ɣɛn käkkä looi. 25 Lɛkkë ɣa, Joon yök riɛl yen kɔc gäm lɔ̈kwëi tɛnɛn, ye tënë Nhialic aye riɛlde ë rot?>>
Gokë guëëk yic kamken ku luelkë, <<Na luelku, ke yök tënë Nhialic, ka thiëc, <Aye ŋö këc wek wɛtde gam?> 26 Ku na luelku, <Ke riɛlde ë rot,> ke ɣok aa jɔ̈ny ke rin cï raan ëbën ye gam.>> 27 Gokë dhuɔ̈k Jethu, <<Akucku.>>
Go Jethu lɛk ke, <<Na ye këya, ke wek aacä lëk riɛl ye ɣɛn käkkä looi.>>
Kääŋ cï Jethu lueel rin mïth karou
28 Ku ben Jethu ke thiëëc, <<Yeŋö yakë tak wɛt kënë yic? Monytui ë la dhäk karou. Go la tënë wëndït ku lëk ye, <Manhdiɛ lɔr lui dom yic ya aköl.> 29 Go bɛɛr, <Ɣɛn acïï la,> nawën ke ben yenhom waar ku ler. 30 Go bɛn la tënë wënden koor ku lëk wɛt awën cï kaŋ lɛk wëndït. Go gam ku cïï la. 31 Yeŋa kamken karou cï kë wïc wun looi?>>
Gokë bɛɛr, <<Ee wëndït.>>
Go Jethu lɛk ke, <<Kɔc ajuër kut ku adëjök ë tɔ̈c kek kuat moc ë path, aa kek aabï röt kaŋ mat ë bääny Nhialic yic tënë we. 32 Rin Joon raan wäär kɔc muɔɔc nhïïm ëcï bɛn tënë we bï we nyuɔ̈th dhël ë yic, ku wek aa këc wɛtde gam. Nawën ke ye kɔc ajuër kut ku adëjök kek gam ye. Ku na cɔk awën cï wek käkkä tïŋ ke loi röt, ke wek aa këc wepuɔ̈th waar ku pälkë luɔi kärɛc ku gamkë wɛtde.>>
Jethu acï jam ë waal bï rɛɛc bäny nyuɔɔth
(Mk 12:1-12; Lk 20:9-19)
33 Ku ben Jethu jam waal ku lueel tënë kɔc man ye ëlä, <<Monytui ëcï dom looi ku cum yic tiim luɔk ku rɔk. Ku wec tɛ ye mïth tiim guɔ̈r thïn bïk ya miök, ku looi kät. Ku jɔl dom riɔ̈p yic kɔc kɔ̈k, ku le keny wun dɛt. 34 Nawën le tɛ cï tiim luɔk thɔ̈ɔ̈ŋ, ke tooc aluɔɔnyke tënë ke bïk la gäm abäkke. 35 Go kɔc awën cï riɔ̈p dom yic aloony dɔm, ku thatkë aluɔny tök, ku näkkë alony dɛt ku biöökkë alony ye kek diäk aleel. 36 Go aloony juëc tënë aloony tueŋ bɛn tooc, ku ŋot ke looikë ke tɛwäär. 37 Nawën ciëën ke wun dom jɔl wënde tooc, ku tɛk lɔn bï kek ye theek. 38 Go kɔc awën cï riɔ̈p dom yic lueel kamken wën tïŋ kek ye, <Kënë ee manh raan la dom, bï käŋ lɔ̈k thɔn aköldä. Bäk näkku ku käkke aabï dɔ̈ŋ ke ɣo.> 39 Gokë dɔm ku thelkë aɣeer dom yic ku näkkë.>>
40 Ku jɔl Jethu ke thiëëc, <<Na bɔ̈ raan la dom ke loi ŋö tënë ke?>>
41 Gokë bɛɛr, <<Abï kɔckä nɔ̈k, ku riɔp dom yic wei tënë kɔc bï ye ayiëk abäkke tɛ cï käŋ luɔk.>>
42 Ku lëk Jethu ke, <<Kɛckë wɛt cï gɔ̈t athör thɛɛr wël Nhialic yic ëlä, kaŋ kueen?
<Mën wäär yen cï atëët kuec yen acï bɛn a mën ril apɛi,
kënë ë ye luɔi Bɛny,
ayeku tïŋ ke path ku dhëëŋ ɣonyïn!> >>
43 Ku la Jethu tueŋ ku lueel, <<Këya alɛk we, bääny Nhialic abï nyaai tënë we ku gɛm kɔc wuɔ̈t kɔ̈k bï wɛtdiɛ piŋ ku loikë. 44 Ku raan bï löny alel kënë nhom, ka duɔɔny bï ruɔ̈th, ku raan bï alel kënë lööny yenhom ka niɔɔn yic.>> 45 Nawën piŋ kɔcdït käk Nhialic ku kɔc gɛt lööŋ ë jam kënë, ke ŋickë lɔn jiɛɛm Jethu riɛnken, 46 ku na cɔk alɔn wïc kek ye bïk dɔm, ka ke cï riɔ̈ɔ̈c kɔc juëc tɔ̈ thïn ë Jethu tïŋ ke ye raan käk Nhialic tïŋ.