Jethu acï kuec löŋ aköl lɔ̈ŋ kɔc Itharel
(Mk 2:23-28; Lk 6:1-5)
12
1 Naɣɔn akäl tök ë nïnkä, Jethu ë cath kek kɔcken ye buɔɔth, ke kuany dhël yic kam dum aköl lɔ̈ŋ. Ku kɔcken ye buɔɔth aake nɛk cɔk, gokë rap lek cam dhoŋ. 2 Nawën tïŋ kɔc akut Parathï, gokë Jethu thiëëc, <<Tïŋ, kɔckun yï buɔɔth aa loi kë cie looi aköl lɔ̈ŋ!>>3 Go bɛɛr ku lueel, <<Kɛckë kë cï Debit looi thɛɛr kaŋ kueen, wäär nɛk cɔk ye ke kɔcken cath kek ye? 4 Acï bɛn la luaŋ Nhialic, ku ciɛm ayum yath cï tɔ̈ɔ̈u tënë Nhialic, kek kacke. Ayum kënë ëcïï Debit lëu bï cam kek kacke, aa kɔc käk Nhialic looi kek aake ye cam ë röt. 5 Dɛt aya, kɛckë kueen löŋ Mothith yic lɔn aköl lɔ̈ŋ thok ëbën, kɔc käk Nhialic looi luaŋ Nhialic aa löŋ aköl lɔ̈ŋ dhoŋ kɔ̈u, ku aacïï ke ye nyieeny? 6 Ku Manh Raan jam kek we, adït tënë luaŋ Nhialic. 7 Na we cï wël cï gɔ̈t thɛɛr deet yiic, lɔn kë wïc Nhialic ë nhiɛr ye kɔc röt nhiaar, aacie ɣɔ̈k ye näk ye, ŋuɔ̈t wek aa këc kɔc cïn awuɔ̈c cïk looi nyieeny, 8 rin Manh Raan adït tënë aköl lɔ̈ŋ.>>
Jethu acï mony cï cin ruai kony
(Mk 3:1-6; Lk 6:6-11)
9 Naɣɔn aköl dɛt ke Jethu jiël tënë awën ku ler tɛn amat kɔc Itharel, 10 ku mony cï cin ruai ë tɔ̈ thïn. Ku kɔc kɔ̈k ke wïc Jethu bïk gaany kë cï wuɔ̈ɔ̈c, aake tɔ̈ tɛn amat aya, gokë Jethu thiëëc. <<Ye lɔ̈ŋda pëën bï raan kony aköl lɔ̈ŋ?>>
11 Go Jethu bɛɛr, <<Na la raan tök kamkun ë tɛn amäl tök, ku lööny yiith aköl lɔ̈ŋ, ke cïï bïï bei yiith? 12 Raan adït apɛi tënë lɛi! Këya, lɔ̈ŋda acie ɣo ye pëën buk raan cïï kony aköl lɔ̈ŋ.>> 13 Ku lëk mony wën cï cin ruai, <<Nyoth yïcin.>> Go yecin nyooth, go cin piath abï ciɛt ciin këc ruai. 14 Go Parathï jäl tɛn amat, ku lek mat tɛ bï kek Jethu näk thïn.
Jethu alony cï Nhialic lɔc
15 Go Jethu kë loikë ŋic, ku jiël tɛn awën, go kɔc juëc buɔɔth. Ku kony kɔc tuany bïk pial, 16 ku thɔn ke apɛi bïk cïï la lɛk kɔc kɔ̈k, bï cïï ŋic. 17 Rin bï kë cï Ithaya lueel wäthɛɛr ëlä ë riɛnke yenhom tiɛɛŋ,
18 <<Yen akïn yen alonydiɛn ca lɔc,
raan töŋ yen nhiaar, mit
ɣɛn puɔ̈u tënë yeen.
Ɣɛn abï Wɛikiɛ cɔl alööny yeguɔ̈p,
ku abï gam ë yic lɛk thäi ëbën.
19 Acïï bï ya gɔ̈th ku rɛɛm kɔc nhïïm wël cie yith,
acïï bï ya piŋ röl ë dhɔ̈l yiic.
20 Acïn këthiin bï kaŋ tuɔ̈ɔ̈r nyin, cɔk
ayiny kɔc kor ka cïï dhäl.
Acïï bï kaŋ dhɔ̈r ɣet tɛ bï yiɛnyde ŋic,
21 ku abï wuɔ̈ɔ̈t ëbën ŋɔ̈ɔ̈th.>>
Jethu aye yɔ̈ɔ̈k lɔn le yen guɔ̈p jɔŋrac
(Mk 3:20-30; Lk 11:14-23)
22 Nawën ke kɔc kɔ̈k bïï mony cï cɔr tënë Jethu, ku ëcie jam aya rin tɔ̈ jɔŋrac yeguɔ̈p. Go Jethu kony, ɣet bï jam ku dɛɛi. 23 Go kɔc awën tɔ̈ thïn gäi ëbën ku thiëckë röt. <<Nadë ke bï ya Manh Debit?>> 24 Nawën piŋ Parathï ë wɛt kënë, ke luelkë, <<Yeen ë jakrɛc cuɔp wei kɔc gup, rin ye bɛny jakrɛc, cɔl Beldhebul ye yiëk riɛl.>>
25 Go Jethu kë takkë ŋic ku lueel, <<Pan yeyic tek ku thär kɔc ë kamken, ë lac riääk. Ku na tek gɛn tök yeyic, ayï dhiënh tök ku tuumkë kenhïïm ku thɛrkë, ka puɔ̈k. 26 Na ye jɔŋrac jɔŋrɛɛc dɛt cuɔp wei, ka cï keyiic tek. Këya, lëu panden bï kɔ̈ɔ̈c këdë! 27 Ku na ye riɛl Beldhebul yen ye ɣɛn jakrɛc cuɔp wei, ke ye riɛl ŋa yen ye kɔckun yakë buɔɔth ke cuɔp wei? Calkë ke aa lëk we yic. 28 Ku na ye riɛl Wëi Nhialic yen ye ɣɛn jakrɛc cuɔp wei, ke ŋiɛckë lɔn cï bääny Nhialic bɛn tënë we.
29 <<Acïn raan lëu ye bï ɣön raan ril dhoŋ ku nyɛɛi käkke, akɔŋ raan ril kënë dɔm ku der, ku jɔl käk tɔ̈ baai nyaai.
30 <<Raan këc rot mät ɣa acie raandiɛ, ku raan cïï ɣa kony bï kɔc lɛk wɛt Nhialic, ee kɔc thiɔ̈i. 31 Këya, wek aa lɛk yic lɔn nadë adumuɔ̈ɔ̈m ë kɔc, ku kärac yekë ke lueel, aa lëu bï ke päl piny. Ku kuat raan kärɛc luɛɛl Wëi Nhialic guɔ̈p, acïï bï päl piny tënë ye. 32 Ku na ye raan lueel wɛt rac Manh Raan guɔ̈p, ka pɛl piny. Ku raan ye lueel lɔn ye Wëi Nhialic jɔŋrac, ka cïï kɔŋ päl piny acïn ëmën agut akölriëëc ëbën.
33 <<Com tim tɛpath bï miɛthke piath. Tɛdë ke com tɛrac bï miɛthke rɛɛc. Këya, tim aye ŋic miɛthke. 34 Wek mïth käpiɛny, mïth kɔc cie yith ye gam, lɛukë bäk këpath lueel, ke we ye jakrɛc ëmëndun? Rin kë ye thok lueel ë bɛn bei raan puɔ̈u. 35 Raan path ë luui käpath, rin käpuɔth tɛ yepuɔ̈u. Ku raan rac ë luui kärac rin kärɛc tɔ̈ yepuɔ̈u.
36 <<Alɛk we, raan ëbën abï thiëëc aköl luŋdït ë wël rɛc cï lueel. 37 Rin wɛlku kek aabï ɣäth tɛpath, ku aa kek aabï cɔl atëm awuɔ̈c aköl luŋdït.>>
Jethu acï kuec bï kënë jäŋ gɔ̈i looi
(Mk 8:11-12; Lk 11:29-32)
38 Go kɔc kɔ̈k piööc lööŋ ku Parathï lueel tënë ye, <<Raan piööc awïcku ba kënë jäŋ gɔ̈i looi buk tïŋ.>> 39 Go Jethu bɛɛr, <<Aa kɔc la gup anyon ku gam koor kek aa thiëc käk tïŋkë! Acïn kën jäŋ gɔ̈i bï nyuɔ̈th we, ee këwäär cï rot looi tënë Jona, raan käk Nhialic tïŋ yen abï rot looi. 40 Cïmën wäär cï Jona rëër akööl kadiäk ku wër kadiäk rɛcdït apɛi yic, ke Manh Raan aya abï rëër nïn kadiäk ë raŋ yic. 41 Aköl luŋdït kɔc gen Ninibe, aabï we gɔ̈k rin cï kek kepuɔ̈th waar ku pälkë luɔi kärac wäär cï Jona ke lɛk. Ku alɛk we, ɣɛn jam kënë, ɣɛn adït tënë Jona! 42 Tiŋdït ë bɛny wäär jiël pan Athia bï la Jeruthalem, abï we gɔ̈k aköl luŋdït rin cï yen jäl tɛmec apɛi bï wël puɔth bɛnyŋaknhom Tholomon la piŋ, ku ɣɛn jam, ɣɛn adït tënë Tholomon!
43 <<Tɛ cï jɔŋrac jäl raan guɔ̈p, ee piny yɔ̈ɔ̈p tɛdɛt bï yen lɔ̈ŋ thïn. Na cïï yök, 44 ke lueel, <Ɣɛn abï dhuk tɛwäär jiël ɣɛn thïn.> Këya, ke dhuk ku yök tɛn bï yen rëër thïn ke cïn raan tɔ̈ thïn, ku acï guiir. 45 Ku dhuk, ku le bɛn kek jakrɛc apɛi kɔ̈k kadhorou wär ye, bïk bɛn ceŋ baai. Ku pïr ë raan kënë ë jäl rɛɛc apɛi tënë pïrden tueŋ. Yen ë tɛn ben rot luɔɔi thïn aya tënë kuat akölë.>>
Man Jethu ku wämäthakën aacï Jethu nyaai
(Mk 3:31-35; Lk 8:19-21)
46 Jethu ee ŋot jam kek kɔc tɛwën ɣëët man kek wämäthakën. Ku kɛɛckë aɣeer, ku thiëckë bïk jam kek ye. 47 Go raan tök kam kɔc awën lëk ye, <<Moor ku wämäthakui aa kääc aɣeer, ku awïckë bïk jam kek yï.>>