परमेसर न्अ राजी करबो
13
1 भाईचारा का परेम मं बण्यारेवो। 2 अण्जाण मनखा की आवभगत करबो मत भूलो। क्युं क अस्यान करता होयां नरा मनख अण्जाण्या मं सरगदूता की आवभगत कर्या छ। 3 ज्यो जैळ मं छ बांकी असी सुधी रांखो क थे बी बांकी लार जैळ मं छो। अर ज्यांकी लार बरो बरताव कर्यो गियो छ, बाकी या जाणर सुधी रांखो क थे बी पीड़ा मं छो।4 बियाव को सब आदरमान करो। अर लोग-लुगाई आमा-सामा ईमानदार रेव्अ। क्युं क परमेसर नाजायज रिस्तो रांखबाळा अर व्यभिचार करबाळा को न्याय करअलो।
5 थांकी जन्दगी न्अ धन का लोभ सुं बचार राखो। अर ज्यो थां कन्अ छ बीम्अ'ई सबर रांखो। क्युं क परमेसर खुद खियो छ क, “म तन्अ कद्या बी कोन छोड़ुलो अर कद्या बी कोन त्यागूलो।” 6 जिसुं आपा बेधड़क खेवां छा,
“परमेसर म्हारी सायता करबाळो छ,
म कोन डरपूंलो।
मनख म्हारो कांई बगाड़ सक्अ छ?”
7 थांका मुखिया ज्यो थान्अ परमेसर को बचन सुणाया छा, वान्अ याद रांखो अर ध्यान सुं बांका चाल चलन का बारा मं सोचो अर बांका बस्वास की नकल करो। 8 ईसु मसी काल, आज अर जुगजुग एक जस्यो छ। 9 केई तरा की अण्जाण सक्ष्या सुं भरमाबा मं आर सांचा गेला सुं मत भटकज्यो। क्युं क थांका मन क ताणी यो चोखो छ क खाबा-पीबा का निमा की बजाय दीया सुं मजबूत होव्अ। क्युं क खाबा-पीबा का निम मानबाळा न्अ बासुं कोई फायदो कोन्अ होयो।
10 आपणो एक अस्यो यज्ञ कुण्ड छ जिका चढ़ावा मंसुं खाबा को अधिकार बा लोगबागा न्अ कोन्अ ज्यो तम्बू की सेवा करअ छ। 11 महायाजक पापबली चढाबा बेई ज्यानबरा को लोई पवितर ठोर मं तो लेर जाव्अ छ। पण बांकी काया न्अ गांव बारअ बाळ्यो जाव्अ छ। 12 ई बजेसुं ईसु बी खुदका लोई सुं मनखा न्अ पवितर करबा बेई नगर क बारअ दुख उठायो छो। 13 ई बजे आवो बीकी बेजती न्अ खुदक्अ माळ्अ लेर गांव क बारअ बीकन्अ चाला। 14 क्युं क अण्डअ आपण्अ बेई सदा बण्यो रेबाळो नगर कोन्अ जिसुं आपा एक आबाळा नगर की बाठ नाळर्या छा। 15 ई बजेसुं आपा ईसु मसी क जरिये परमेसर की बढ़ाई एक बलिदान की जस्यान करां। ज्यो बढ़ाई होठां सुं बीको नांऊ लेता होया लगातार करां छा। 16 भलाई करबो अर आमा-सामा सायता करबो मत भूलो। क्युं क परमेसर अस्यान का बलिदाना सुं राजी होव्अ छ।
17 थांका धार्मिक मुखिया प भरोसो रांखो अर बांका बसम्अ रेवो। वे परमेसर क साम्अ थांको लेखो देबाळा की जस्यान वे जागता होया थांका जीव की रुखाळी करअ छ। अर ज्यो थे वस्यान ई रेवो तो वे यो काम राजी सुं करअला, पण थे वस्यान कोन रेवो तो वे यो काम दुख सुं करअला। अर इसुं थान्अ कोई नफो कोन्अ होव्अलो।
18 म्हाक्अ ताणी परातना करता रेवो। क्युं क म्हान्अ भरोसो छ क म्हाकी अन्तरात्मा साफ छ अर म्हे सबळी बाता मं चोखा काम करबो चावां छा। 19 अर म थासुं घणी अरदास करू छु क म थां कन्अ पाछो आ सकूं ईक्अ ताणी परातना करो।
आखरी परातना
20 ज्यो लळ्डया का उं महान गुवाळ आपणा परबु ईसु न्अ जुगजुग का करार करबाळा लोई सुं मरया मंसुं जीवतो कर दियो, वो सान्ति देबाळो परमेसर 21 थान्अ हरेक चोखी बात मं भरयापुरा करअ। जिसुं थे बीकी मनसा न्अ पूरी कर सको। अर ईसु मसी क जरिये वो आपण्अ मायन्अ हरेक वा बाता न्अ पैदा करअ ज्यो बीन्अ भाव्अ छ। बीकी बढ़ाई जुगजुग ताणी होती रेव्अ। अस्यान'ई होव्अ।
आखरी बात
22 हे भायाओ, थासुं म्हारी अरदास छ क थे या हिम्मत बन्दाबाळा बचना प्अ चालो, क्युं क म घणी छोटी बात लिख्यो छु। 23 थे या जाणल्यो क आपणो भाई तीमुथियुस छूटग्यो। अर वो बेगोई आजाव्अलो तो म बीकी लार आर थासुं मलुंलो।
24 थांका सबळा मुखिया अर परमेसर का लोगां न्अ जै मसी की खिज्यो। ईटलीयाळा थान्अ जै मसी की खेव्अ छ।
25 थां सबळा की लार परमेसर की दिया होती रेवे।