इब्रानियों 4

1 ई बजेसुं उंका बसराम मं उळबा की सोगन्द अबार ताणी छ, तो आपान्अ साउचेत रेणो चायजे; क कढ्अ थाम्अ सुं कोई न्अ परमेसर को बसराम मलबा सुं कोन चूक जाव्अ। 2 क्युं क वांकी जस्यान आपान्अ बी चोखो समचार सुणायो गियो छ। पण चोखो समचार सुणबा सुं वान्अ कोई फायदो कोन्अ होयो। क्युं क जद्‍या वे उन्अ सुण्या तो वे उन्अ बस्वास सुं कोन्अ मान्या। 3 अर आपा बस्वास करबाळा उं बसराम न्अ पावां छा, जिको वादो परमेसर कर्यो छो। संसार न्अ बणाबा की बगत'ई बीका काम पूरा होग्या छा। जस्यान वो खेव्अ छ,

“जद म रोषा मं आर सोगन्द खायो क,

‘वे कद्‍या बी उण्डअ कोन पूछ्अला जण्ढ्अ म वान्अ बसराम देऊलो!’”

4 अर सास्तर मं सातवा दन का बारा मं कोई ठोर पं या मण्ढरी छ क, “परमेसर खुदका सबळा कामा न्अ पूरो करर सातवा दन मं बसराम कर्यो।” 5 अर ठोर मं फेर मण्ढर्यो छ क, “वे कद्‍या बी उण्डअ कोन पूछ्अला जण्ढ्अ म वान्अ बसराम देऊलो।” 6 ज्यांन्अ पेलपेल चोखो समचार सुंणाया छा वान्अ बसराम कोन्अ मल्यो क्युं क वे खियो कोन मान्या ई बजेसुं चन्याक मनखा बेई बसराम को बाण्णो हालताणी बी खुल मेल्यो छ। 7 परमेसर एक ओर दन न्अ ठेरार बीन्अ आजको दन खेव्अ छ। घणादना पाछ्अ दाऊद सुं खुवायो, जस्यान पेली खीयो छो क,

“थे परमेसर की आवाज न्अ आज सुणो तो,

थांका मन न्अ कळ्डो मत करज्यो।”

8 अर यहोसू वान्अ बसराम मं पूंचा देतो, तो परमेसर कोई ओर दन न्अ फेर आजको दन कोन्अ खेतो। 9 तो या जाणल्यो क परमेसर का लोगबागा क ताणी सातवा दन को बसराम बाठनाळर्यो छ। 10 क्युं क ज्योबी परमेसर का बसराम मं आयो छ वो खुदका कामा सुं बसराम पायो छ वे बीन्अ वस्यानई पाया छ जस्यान परमेसर खुदका कामा सुं बसराम कर्यो छ। 11 ई बजेसुं आपा बी बसराम न्अ पाबा की पूरी जोरी करां। जस्यान वे आज्ञा कोन मानबा सुं चूकग्या, बियान् आपाम्अ सुं कोई कोन चूक्अ।

12 क्युं क परमेसर को बचन जीवतो अर काम करबाळो, अर कोई बी दोधारी तलवार सुं साउटो धारदार छ। अर वो जीव, आत्मा, जोड़ अर गूदा न्अ न्यारा-न्यारा करर, आर-पार छेद्अ छ; अर मन की मन्सा अर बच्यारा न्अ परख्अ छ। 13 अर असी कोई चीज कोन्अ ज्यो परमेसर सुं लुखेड़ी होव्अ; अर सबळी रचना बीकी आंख्या क साम्अ खुली अर उगाड़ी छ।

ईसु महायाजक छ

14 ई बजेसुं जद आपण्अ कन्अ अस्यो बड़ो महायाजक छ, ज्यो सरग सुं होर गियो छ, मतलब परमेसर को छोरो ईसु; तो आवो आपा आपणा अंगीकार न्अ गाडो पकड़या रेवा। 15 क्युं क आपणो महायाजक अस्यो कोन्अ ज्यो आपणी लार आपणी कमजोरी न्अ मेसुस कोन कर सक्अ; क्युं क वो आपणी जस्यानई सबळी बाता मं परख्यो तो गियो, पण वो बना पाप को नखळ्यो। 16 तो आवो आपा भरोसा की लार परमेसर की दीया का सिंहासन कन्अ चाला, क आपण्अ माळ्अ तरस होव्अ, अर आपा दीया पावां क जूरत की बगत बा काम आ सक्अ।