दूसरा बस्वास्या बेई दान
16
1 aम्हारा भायाओ थे बुज्या छा क यहूद्या म रेबाळा पवितर मनखा न्अ देबा बेई ज्यो दान थे भेळा कर्या छो वांको कांई करणी छ? म थान्अ एक'ई बात खेऊ छु वोई करो ज्यो म गलातिया मं बस्वास्या की टोळी न्अ खियो छो। 2 अर जद्या बी सप्ताह को पेलो दन, दितवार आव्अ, थे थांकी कमाई मंसुं थोड़ोघणु न्यारो टाळता रिज्यो जिसुं म जद्या बी आंउ थान्अ दान भेळो कोन करणी पड़्अ। 3 अर जद्या म थां कन्अ आंउ तो वा मनखा न्अ ज्यांन्अ थे छावो छो, म वान्अ कागद देर थांका दान न्अ वाक्अ हाथा यरूसलेम खन्दा द्युलो। 4 अर ज्यो म्हारो जाबो होयो तो वे म्हारी लारई चल जाव्अला।पौलुस की योजना
5 bम मकिदुनिया होता होया थां कन्अ आंउलो, क्युं क पेली म्हारो मकिदुनिया जाबो जरूरी छ। 6 अर हो सक्अ तो म थां कन्अ रूक जाउलो अर स्याळ्अ स्याळ्अ थां कन्अ'ई रेऊलो, उंक्अ पाछ्अ जण्ढ्अ बी म्हारो जाबो होव्अलो उण्डअ जाबा बेई जुरत की चीजा की लारा विदा कर दिज्यो। 7 क्युं क म या कोन चाऊ क चालतो चालतोई थासुं मलु; पण मन्अ आस छ अर ज्यो परबु चायो तो म थोड़ाघणा दना थां कन्अ रेऊलो। 8 cपण पिन्तेकुस्त का तुंवार ताणी तो म इफिसुस मं ई रेऊलो, 9 क्युं क उण्डअ परबु को काम करबा बेई यो चोखो मोको छ। अर उण्डअ म्हारो बिरोध करबाळा बी घणा।
10 dअर ज्यो थार कन्अ तीमुथियुस आजाव्अ तो थे उंकी खुब खातरदारी करज्यो क्युं क वो बी म्हारी जस्यान परबु को काम करअ छ। 11 ई बजेसुं कोई बी उन्अ छोटो कोन जाण्अ। अर जद्या वो थांक्अ कन्अ सुं जाव्अ तो सफर म जुरतहाळी चीजा की लार बिदा करज्यो। क्युं क म दूसरा बस्वासी भाया की लार उंकी बाठनाळर्यो छु।
12 अब म थान्अ अपुल्लोस का बारा मं बताऊ छु जस्यान थे म सुं उंका बारा म बुज्या छो। म उन्अ सई ढंग सुं समझायो छु क वो दूसरा बस्वासी भाया की लार थां कन्अ पाछो चलजाव्अ। पण वो हालताणी जाबा बेई राजी कोन्अ पण आग्अ कोई मोका प थां कन्अ आजाव्अलो।
कागद की आखरी बाता
13 सावचेत रिज्यो अर मजबुती सुं बस्वास मं बण्या रिज्यो। थे हिम्मत राखबाळा अर तगड़ा बणो। 14 अर थे ज्योबी करो उन्अ परेम सुं करो।
15 eथे स्तिफनुस का परवार का बारा म तो जाणोई छो, क वे अखाया नगर मं मसी प सबसु पेली बस्वास करबाळा मनख छ। वे परमेसर का मनखा की सायता करबा की पूरी जुम्मेवारी उठा मेल्या छ। ई बजेसुं औ भायाओ म थासुं अरदास करू छु, 16 क थे खुदन्अ अस्यान का मनखा अर वाकी जस्यान मेनत सुं परबु को काम करबाळा दूसरा मनखा न्अ सुंपद्यो।
17 स्तिफनुस, फूरतूनातुस अर अखइकुस क आबासुं म घणो राजी छु। ज्यो थे म्हारअ बेई कोन कर सक्या वो वे कर दखाया। क्युं क थे म्हारी लार कोन छा। 18 वे म्हारी अर थांकी आत्मा न्अ राजी कर्या छ। ई बजेसुं अस्यान का मनखा की इज्जत करो।
19 fअर एसिया का बस्वास्या की टोळी की ओड़ी सुं थान्अ नमस्कार। अर अक्विला अर प्रिसकिल्ला! अर वाक्अ घर मं भेळी होबाळी बस्वास्या की टोळी की ओड़ी सुं थान्अ नमस्कार।
20 अर सबळा बस्वासी भाया की ओड़ी सुं बी थान्अ नमस्कार एक-दूसरा सुं गळ्अ मलर एक-दूसरा को सत्कार करो। 21 अर म पौलुस खुदका हाथा सुं थान्अ नमस्कार माण्ढु छु। 22 अर ज्यो कोई परबु सुं परेम कोन करअ उंप्अ सराप पड़अ छ। म्हारा परबु बेगासाक आओ!