थरपेड़ा चेला की जुम्मेवारी
9
1 म आजाद कोन्अ कांई? म थरपेड़ो चेलो कोन्अ कांई? कांई मन्अ परबु ईसु मसी का दर्सण कोन होया? अर थे परबु मं म्हारा काम की बजेसुं कोन्अ कांई? 2 अर दूसरा मनख मन्अ थरपेड़ो चेलो कोन मान्अ पण थे तो मानो छो। क्युं क थे परबु मं ई बात को सबूत छो क मं थरपेड़ो चेलो छु।3 अर वे मनख ज्यो म्हारी जांच पड़ताळ करबो छाव्अ छ वां बेई म्हारो जुवाब छ 4 मान्अ यो अधिकार कोन्अ कांई क मै थां कन्अ सुं खरचो लेवां? 5 ज्यो म्हे बियाऊ कर्या होता तो मान्अ यो अधिकार कोन्अ कांई क म्हे म्हाकी बस्वासी लुगाया न्अ लारां लेर फरां जस्यान दूसरा थरपेड़ा चेला, अर परबु का भाई अर पतरस करअ छ? 6 अर मन्अ अर बरनबास न्अ अधिकार कोन कांई क, जीबा बेई काम करबो छोड़ देवा? 7 थे बतावो अस्यानको कुण छ ज्यो सेना मं खुदका खरचा प एक सपाई की जस्यान काम करअ। अर अस्यानको कुण छ ज्यो अंगूरा को बाग उगार उंका अंगूर कोन खाव्अ? कोई अस्यानको बी छ कांई ज्यो रेवड़ की रुखाळी करअ अर वांको चन्योक बी दूध कोन्अ पिव्अ?
8 ये बाता मं मनखा की रीत सुंई बोलु छु कांई? या बाता का बारा मं सास्तर बी अस्यान'ई कोन खेव्अ कांई? 9 aअर मूसा का निमा मं मांडेड़ो छ, क “गाउठा की बगत बळद को मूंडो मत बांधो।” या बात परमेसर खाली बळदा बेई खियो छ कांई? 10 वो अस्यान आपण्अ बेई बी कोन खेव्अ कांई? यो आपण्अ बेई ई माण्ढ्यो छ। क्युं क बिजणी करबाळो अर उन्अ काटबाळो कोई-कांई मलबा की आस मं ई अपणो-अपणो काम कर छ। 11 bअर अस्यान'ई मे बी थाम्अ आत्मिक बीज बाया छा तो मे थासुं कोई-कांई की मदद चावां तो वा कोई बड़ी बात छ कांई? 12 जद्या दूसरा मनखा न्अ वे चीजा लेबाको अधिकार छ तो म्हान्अ वासुं ज्यादा अधिकार कोन्अ कांई?
पण म्हे थाप्अ अधिकार कोन जताया। पण मे सब कुछ सैन कर्या छा जिसुं मसी का चोखा समचार न्अ कोई रुकावट कोन आव्अ। 13 थे या कोन जाण्या कांई? ज्यो मनख मन्दर मं काम करअ छ वे मन्दर मं सुंई रोटी खाव्अ छ अर ज्यो मन्दर का यज्ञ कुण्ड की सेवा करअ छ वे उंका चढ़ावा मंसुं कोन खाव्अ कांई? 14 cअस्यान'ई परबु आपान्अ बी सास्तर मं माण्ढर दियो छ क चोखा समचार सुणाबाळा मनख को घर बी उसुं'ई चालणो चायजे।
15 पण म अस्यान का कस्या बी अधिकार न्अ काम मं कोन लियो। अर म असी कोई बात मांड्यो बी कोन्अ जिसुं थे म्हारअ बेई कोई-कांई करो। जि बात को मन्अ गरव छ उन्अ कोई खोस ले इसुं पेली म मरबो पसंद करूलो। 16 ई बजेसुं म चोखो समचार सुणाऊं छु तो इम्अ मन्अ घमण्ड करबा की जुरत कोन्अ क्युं क यो तो म्हारो फरज छ। अर ज्यो म चोखो समचार कोन सुणाऊं तो या बात म्हारअ बेई घणीबरी। 17 अर ज्यो यो काम मं म्हारी मरजी सुं करू तो म ईको फळ पाबा जस्यो छु। पण ई काम न्अ मं फरज मानर करू छु क्युं क परमेसर मन्अ ई काम बेई मुनीम बणायो छ। 18 तो मन्अ कसी बात को फळ मल्अलो? अर बना मोल अर चोखा समचार न्अ सुणाबा क बदला मं बना म्हारा अधिकार को दावो कर्या चोखा समचार न्अ सुणाबो एक सोभाग छ।
19 म कोई मनख का बंधण मं कोन्अ पण फेरबी मं खुदन्अ सबळा को दास बणालियो। जिसुं म मसी मं घणा मनखा न्अ खींच सकूं। 20 म यहूदी मनखा बेई यहूदी मनख की जस्यान बण्यो जिसुं क वान्अ मसी मं ल्या सकूं। अर मन्अ मूसा का निमा न्अ मानबा की जुरत कोन्अ छी पण वान्अ मान्यो जिसुं क म वान्अ मसी मं ल्या सकूं। 21 अर अस्यान'ई म गेर यहूदी मनखा न्अ मसी मं ल्याबा बेई मं गेर यहूदी मनख की जस्यान जीयो, यहूद्या का निमा का बिरोध मं। पण ईको मतलब यो कोन्अ क म परमेसर का निम न्अ कोन मानु पण म मसी का नियम क तळ्अ जिऊ छु। 22 अर ज्यो दूबळा छ वां बेई मं कमजोर बणग्यो जिसुं म वान्अ मसी मं ल्या सकूं अर म सबळा मनखा बेई कांई न्अ कांई बण्यो छु, ज्योबी हो सक्अ छो वो म कर्यो क म वाम्अ सुं थोड़ाघणा न्अ बचा सकुं। 23 अर म यो सब चोखा समचार बेई करू छु क म दूसरा मनखा की लार इम्अ वांको साथी बण सकूं।
24 थे या कोन जाणो कांई क दोड़ मं तो घणा भाग्अ, पण ईनाम तो एक न्अ ही मल्अ छ? अर थे बी अस्यान'ई भागो क जीत सको। 25 अर खेल मं खेलबाळा सबळा खिलाड़ी सबळी बाता मं खुद प काबु राखणी पड़्अ छ। अर वे तो नास होबाळा मुकुट न्अ पाबा बेई अस्यान करअ छ, पण आपा उं मुकुट बेई कर्या छा ज्यो कद्या बी नास कोन होबाळो। 26 ई बजेसुं म उं मनख की जस्यान भागू छु जिक्अ साम्अ एक मुकाम होव्अ छ म बाळ मं तलवार कोन चलाऊ। 27 पण म तो म्हारी काया न्अ म्हारा खिया म रांखू छु, क्युं क कढी अस्यान कोन होव्अ क म दूसरा न्अ तो परचार करू पण खुद निकम्मो खुवाऊ।