कुरिन्थ नगर का बस्वास्या की टोळी क नांऊ पौलुस को पहलो कागद
1
1 आपणा भाई सोस्थिनेस की लारां पौलुस की ओड़ी सुं जिन्अ परमेसर खुदकी मन्सा सुं परबु मसी ईसु को खास थरपेड़ो बणबा बेई थरप्यो छ।a 2 bयो कागद कुरिन्थ मं रेबाळा परमेसर का वां बस्वास्या की टोळी क नांऊ माण्ढ्यो गियो छ, ज्यो मसी ईसु म पवितर कर्या गिया छ, ज्यांन्अ परमेसर पवितर बणबा बेई उंकी लारा थरप्यो छ। ज्यो हरेक ठोर वांका अर आपणा परबु ईसु मसी को नांऊ लेता रेव्अ छ। 3 आपणा परमेसर बाप की ओड़ी सुं अर आपणा परबु ईसु मसी की ओड़ी सुं थां सबळा न्अ उंकी दीयाc अर सान्ति मल्अ।पौलुस को परमेसर न्अ धन्यवाद
4 थान्अ परबु मसी ईसु मं ज्यो दीया मली छ उं बेई म थांकी ओड़ी सुं सदाई परमेसर को धन्यवाद करतो रेऊ छु। 5 क उम्अ होर थान्अ हरेक बात मं मतलब सबळा बचन अर सबळा ज्ञान मं भागवान कर्यो गियो छ। 6 क मसी का बारा मं म्हाकी गुवाई थाम्अ पक्की नखळ्अ। 7 अर अण्डअ ताणी क थान्अ कोई बरदाना मं कमी कोन होव्अ अर थे आपणा परबु ईसु मसी का परगट होबा की बाठनाळता रेवो छो। 8 परबु ईसु मसी खुद थान्अ गाढ़ा करअलो जिसुं थे उंका पाछा आबा का दन मं एकधम बना कळंकहाळा अर खरा नखळो। 9 परमेसर बस्वासहाळो छ। वोई थान्अ आपणा परबु अर उंका छोरा ईसु मसी की सत संगती बेई थरप्यो छ।
कुरिन्थ का बस्वास्या की टोळी की परेसानी
10 ह भाईवो, आपणा परबु ईसु मसी का नांऊ मं म्हारी थासुं अरदास छ क थे सबळा एकलार, एक मन का अर एक बच्यार का होर मल्या रेवो। अर थाम्अ फूट कोन होणी चायजे। 11 क्युं क मन्अ खलोए का घराणा का मनखा सुं तोल पड़यो छ, म्हारा भायाओ थांक्अ गाब्अ रयाड़ होरी छ। 12 eम या खेर्यो छु क थाम्अ सुं कोई खेव्अ छ क “म पौलुस को छु” तो कोई खेव्अ छ क “म अपुल्लोस को छु।” अर कोई खेव्अ छ क “वो कैफाd को छ” तो कोई खेव्अ छ क “वो मसी को छ।” 13 मसी बटग्यो कांई? पौलुस तो थांक्अ बेई करूस प कोन लटक्यो छो। वो लटक्यो छो कांई? थान्अ पौलुस का नांऊ को बतिस्मो तो कोन दिया। बताओ दिया छा कांई? 14 fपरमेसर को धन्यवाद छ क म थां मंसुं क्रिसपुस अर गयुस क अलावा कोई न्अ बी बतिस्मो कोन दियो। 15 जिसुं कोई बी या कोन खे सक्अ क म वान्अ म्हारा नांऊ को बतिस्मो दियो छु। 16 gम स्तिफनुस अर उंका परवार न्अ बी बतिस्मो दियो छो पण जण्ढ्अ ताणी ओर मनखा की बात छ तो मन्अ याद कोन्अ क म कोई ओर न्अ बी बतिस्मो दियो छो। 17 क्युं क मसी मन्अ बतिस्मो देबा बेई नही पण बना कोई मनखा को ज्ञान मलाया चोखा समचार को परचार करबा बेई खन्दायो छ जिसुं क मसी को करूस चढ़बो फालतु कोन चलजाव्अ।
परमेसर की सक्ति अर ज्ञान को रुप मसी
18 ज्यो नास होरया छ, वां बेई तो करूस को संदेसो मुरखता छ। पण आपा ज्यो उद्धार पारया छ वां बेई वो परमेसर की सक्ती छ। 19 सास्तरा मं मण्ढरी छ;
“ज्ञान्या का ज्ञान न्अ म नास कर द्युलो।
अर चतर की सबळी चतराई न्अ म बेकार कर द्युलो।”
20 फेर कढ्अ रिया ज्ञानी? कढ्अ रिया विद्वान? अर कढ्अ रिया ई जमाना का सास्तरी? परमेसर संसार की बुद्धिमानी न्अ मूर्खता न्अ कोन बणायो कांई? 21 संसार खुदका ज्ञान सुं परमेसर का ज्ञान न्अ कोन जाण सक्यो तो परमेसर न्अ यो चोखो लाग्यो क जि करूस की कहाणी न्अ लोगबाग मुरखता मान्या उंका परचार मं बस्वास करबाळा उद्धार पाव्अ।
22 यहूदी मनख तो चमत्कारहाळा नसाण मांग्अ छ अर यूनानी तो ज्ञान की खोज मं छ। 23 पण आपा तो बस करूस प चढ़ाया गिया मसी का परचार करां छा। एक अस्यानको उपदेस ज्यो यहूद्या बेई बिरोध की बजे छ अर गेर यहूद्या बेई बस मूर्खता छ। 24 पण ज्यांन्अ परमेसर बेई बला लिया, फेर छाव्अ वे यहूदी हो या फेर गेर यहूदी, यो उपदेस मसी छ ज्यो परमेसर की सक्ती छ, अर परमेसर की समझ छ। 25 क्युं क परमेसर की मूर्खता मनखा का ज्ञान सुं साऊटी ज्ञानहाळी छ। अर परमेसर की कमजोरी मनखा की तागत सुं साऊटी तागतहाळी छ।
26 हे भायाओ, अब थोड़ासाक बच्यार करो क जद्या परमेसर थान्अ बलायो छो तो थाम्अ सुं घणासारा तो संसार की नजरा मं न्अ तो बुद्धिमान छा अर न्अ सक्तिसाली छा। थाम्अ सुं घणा को सामाजिक ओहदो बी ऊंचो कोन्अ छो। 27 ई संसार का ज्ञानहाळा सरमाव्अ जिबेई परमेसर जगत का वां मनखा न्अ चुण लियो ज्यांन्अ संसार मुरख मान्यो अर तागतहाळा न्अ सरमाबा बेई जगत का वां मनखा न्अ चुण लियो ज्यांन्अ संसार कमजोर समझ्या। 28 परमेसर संसार मं वान्अई थरप्यो छ ज्यो नीच छा, ज्यांसुं नफरत करी जाव्अ छी अर ज्यो कांई बी कोन्अ। परमेसर वान्अ जिसुं थरप्यो क ज्यां चीजान्अ संसार का लोगबाग सबकुछ समझ्अ छ उंको नास कर सक्अ। 29 जिसुं कोई बी मनख परमेसर क साम्अ घमण्ड कोन्अ कर सक्अ। 30 परमेसर थान्अ मसी ईसु की लार जोड़यो अर मसी न्अ थांकी बुद्धि बणायो, अर उंकी सायता सुं थे परमेसर क साम्अ सही छो, आपा परमेसर का पवितर मनख बणग्या अर आजाद कर्या गिया। 31 जस्यान सास्तर मं मण्ढरी छ, “अर ज्यो कोई न्अ कोई घमण्ड करणी छ तो परबु ज्यो कर्यो छ बी माळ्अ घमण्ड करअ।”