थरपेड़ा का काम 24

पौलुस प दोष

1 पांच दन पाछ्अ महायाजक हनन्या एकात बुढ़ा यहूदी नेता अर तिरतुल्‍लुस नांऊ का वकील न्अ लांरा लेर कैसरिया आयो। वे राजपाल क साम्अ पौलुस प दोष साबित करबा आया छा। 2 फेलिक्स क साम्अ पौलुस की पेसी होबा प मुकदमा की कारवाई सरू करता होया तिरतुल्‍लुस खियो, “ह माराज, थारी बजेसुं मे घणी सांति सुं रेरया छा ओर थारी आग्अ की सोचबा की बजेसुं देस मं घणा जुरत का सुधार होया छ। 3 ह महान फेलिक्स, मे ईन्अ बड़ी कृतज्ञता सुं हर तरा सुं हर ठोर मं मान लेवां छा। 4 थांको ओर साऊटो बगत कोन्अ लेता होया, म्हारी या अरदास छ क थें म्हाकी छोटी बात सुणल्यो। 5 बात या छ क ई मनख न्अ मे एक उत्पाती की न्याय पाया छा। सबळी दुनिया का यहूद्‍या मं यो दंगा भड़कायो छ। यो नासरया का पंथ को नेतो छ। 6-7 यो मन्दर न्अ बी असुद्ध करबा की जोरी कर्यो छ। मे ईन्अ जिसुं ई पकड़या छा। मे ईप्अ ज्यो दोष लगार्या छा, 8 बा सबळा न्अ थें खुद इसुं बुज-थाज कर जाण सको छो।” 9 यो दोष लगाबा मं यहूदी बी मलग्या। वे गाढ़ा होर एकलार खेर्या छा क वे सबळी बाता सांची छ।

पौलुस को अपणा-आपन्अ बचाबो

10 राजपाल फेर जद्‍या पौलुस न्अ बोलबा को असारो कर्यो तो वो जुवाब देता होया खियो, “तु घणादना सुंई देस को न्याय करबाळो छ। या जाणता होया मं राजी सुं म्हारी बात पेस करर्यो छु। 11 तु खुद या जाण सक्अ छ क मन्अ आराधना बेई यरूसलेम मं गिया हालताणी बारा दन नखळ्या छ। 12 उण्डअ मन्दर मं मन्अ न्अ तो कोई की लारा बेस करता पाया अर न्अ परातना करबा का घरा मं अर नगर म दूसरी ठारां कोई न्अ दंगा करबा बेई उकसाता पाया। 13 अर अब थारअ साम्अ ज्यां दोष न्अ ये म्हारअ उपरअ लगारया छ बान्अ साबित कोन्अ कर सक्अ। 14 पण म थारअ साम्अ या मान लेऊ छु क म आपणा आग्लाबड़ा का परमेसर की आराधना जी रीत सुं करू छु बीन्अ ये गलत मानर्या छ। पण ज्यो बाता बेवस्था अर परमेसर की ओड़ी सुं बोलबाळा की पोथ्या म मण्ढरी छ बा सब मं म बी बस्वास करू छु। 15 अर म परमेसर माळ्अ वस्यानई आस रखाणु छु जस्यान ये मनख रखाण्अ छ क धर्मी अर पापी दोनी'ई मरया पाछ्अ फेरू जीवता होवला। 16 जिसुं म बी परमेसर अर मनखा क गाब्अ खुदकी अन्तरात्मा न्अ पवितर रखाण्बा की जोरी करतो रेऊ छु। 17 बरसा ताणी आंतरअ रिया पाछ्अ म म्हारा मनखा न्अ भेंट देबा अर खुद बेई चढ़ावो चढाबा आयो छो अर 18 जद्‍या म या कर'ईर्यो छो तो ये मन्अ मन्दर मं पाया जद्‍या म निमा की न्याय सुद्ध छो। जद्‍या न्अ उण्डअ कोई भीड़ छी अर न्अ कोई असांति छी। 19 एसिया सुं आया एकात यहूदी उण्डअ मेजुद छा। अर ज्यो म्हारा बिरोध मं बा कन्अ कोई बात होव्अ तो बान्अ थारअ साम्अ आर म्हारअ माळ्अ दोष लगाणी चायजे। 20 या फेर ये मनख ज्यो अण्डअ छ वे बताव्अ क जद्‍या म यहूदी महासभा क साम्अ उबो छो जद्‍या वे कांई खोट पाया।” 21 ई एक बात न्अ छोड़र ज्यो म वाक्अ गाब्अ उबो होर जोरसुं बळार खियो छो, “मरया मंसुं जीवतो होबा का बारा मं आज थासुं म्हारो न्याय कर्यो जार्यो छ।” 22 फेर राजपाल फेलिक्स ज्यो ई बस्वास की पूरी जाणकारी रखाण्अ छो मुकदमा की सुणाई न्अ टाळर खियो, “जद्‍या सेनापति लुसिआस आवलो, म जद्‍याई थांका ई मुकदमा को न्याय करूलो।” 23 फेर वो सुबेदार न्अ आज्ञा दियो क थोड़ी छूट देर पौलुस न्अ रुखाळी मं रखाण्यो जाव्अ अर बीका भायला न्अ उंकी जुरता पूरी करबा सुं कोन्अ रोक्यो जाव्अ।

पौलुस को राजपाल फेलिक्स अर उंकी बेरबानी सुं बतळाबो

24 थोड़ा दना पाछ्अ फेलिक्स खुदकी बेरबानी द्रुसिल्‍ला की लार उण्डअ आयो। बा एक यहूदी बेरबानी छी। फेलिक्स पौलुस न्अ बला खन्दायो अर मसी ईसु का बस्वास का बारा मं बीसुं सुणबा लागग्यो 25 पण जद्‍या पौलुस भलाई, आत्म-संयम अर आबाळा न्याय का बारा म बोलर्यो छो तो फेलिक्स ड़रपग्यो अर खियो, “अबार तो तु चलजा मोको पड़या सुं म फेरू थन्अ बलाऊलो।” 26 बी बगत बीन्अ या आस छी क पौलुस बीन्अ धन देव्अलो जिसुंई फेलिक्स पौलुस न्अ बतळाबा बेई छाव्अ जद्‍याई बला खन्दाव्अ छो। 27 दो बरस अस्यान बीत्या पाछ्अ फेलिक्स की ठोर पुरुखियुस फेस्तुस ले लियो। बी बगत फेलिक्स पौलुस न्अ बन्दी घर मं ई छोड़र चलग्यो क्युं क वो यहूद्‍या न्अ राजी रखाणबो छाव्अ छो।