थरपेड़ा का काम 21

पौलुस को यरूसलेम जाबो

1 फेर बासुं बद्‍या होर मे जाज सुं सीधा कोस जा पुच्या अर दूसरअ दन रोदुस। फेर उण्डअ सुं मे पतरा चलग्या। 2 उण्डअ मे एक जाज पकड़या ज्यो फिनीके जार्यो छो। मे बीम्अ चढ़र चाल पड़या। 3 जद्‍या साइप्रस दिखबा लागग्यो तो मे लंकाढ़ी की बाजु सुं होर सीरिया की ओड़ी मुड़र सूर जा पुच्या। उण्डअ माल उतारणी छी तो मे बी उण्डअ'ई उतरग्या। 4 उण्डअ म्हान्अ बस्वासी मल्या ज्यांकी लार मे सात दन ताणी रुक्या। वे आत्मा सुं प्रेरित होर पौलुस न्अ यरूसलेम जाबा सुं रोकबो छाया।

5 फेर उण्डअ रुकबा को म्हाको बगत पूरो कर मे बद्‍या होया अर आग्अ की यात्रा प नखळग्या। खुदका छोरा-छोरी अर बेरबान्या समेत वे सबळा नगर क बाण्अ ताणी म्हाकी लार आया। फेर उण्डअ सागर की तीर प मे घढोळ्या होर परातना कर्या। 6 अर एक-दूसरा सुं बद्‍या होर मे जाज मं चढ़ग्या। अर वे अपणा-अपणा घरा मं पाछा चलग्या।

7 सूर सुं पाणी का गेला सुं यात्रा करता होया मे पतुलिमयिम मं उतर्या। उण्डअ बस्वासी म्हाको सुवागत सतकार कर्या अर मे बाकी लार एक दन ताणी रुक्या। 8 दूसरअ दन बान्अ छोड़र मे कैसरिया आग्या। अर चोखा समचार को परचार करबाळा फिलिप्पुस कन्अ ज्यो थरपेड़ा खास सात सेवा करबाळा मंसुं एक छो क घरा जार उंकी लार रुक्या। 9 बीक्अ च्यार कुंवारी छोर्या छी ज्यो परमेसर की ओड़ी सुं बोल्अ छी। 10 उण्डअ म्हाक्अ एकात दन रुक्या पाछ्अ यहूद्‍या सुं अगबुस नांऊ को एक परमेसर की ओड़ी सुं बोलबाळो आयो। 11 म्हाक्अ सांकड्अ आता होया वो पौलुस का कमर बान्धबा का न्अ उठा'र बीसुं खुदका हाथ-पग बान्ध लियो अर खियो, “यो छ ज्यो पवितर-आत्मा खेर्यो छ, मतलब यरूसलेम मं यहूदी मनख जिको यो कमर बान्धबा को छ, बीन्अ अस्यान'ई बान्धर दूसरी जात्या का हाथा मं सुंप देव्अला।” 12 मे जद्‍या या सुण्या तो मे अर उण्डअ का मनख बीसुं यरूसलेम कोन्अ जाबा की अरदास कर्या। 13 तो पौलुस खियो, “अस्यान रोरोर म्हारो हीयो तोड़ता होया थें यो कांई करर्या छो? म तो यरूसलेम मं बन्धबा बेई नई पण परबु ईसु मसी का नांऊ सुं मरबा बेई बी तियार छु।” 14 मे बीन्अ कोन्अ मना सक्या पण या खेर बीन्अ छोड़ दिया क, “जसी परबु की मन्सा।” 15 ईक्अ पाछ्अ मे तियारी कर यरूसलेम ओड़ी चाल पड़या। 16 कैसरिया सुं एकात चेला बी म्हाकी लारा होग्या छा। वे म्हान्अ साइप्रस का एक मनख मनासोन क उण्डअ लेग्या ज्यो सरूवात की बस्वास्या की टोळी का चेला मंसुं एक चेलो छो। मान्अ उंकी'ई लारा रुकणी छी।

पौलुस को याकूब सुं मलबो

17 यरूसलेम पुच्या सुं बस्वासी घणा जोस सुं म्हाको सुवागत-सत्कार कर्या। 18 दूसरअ दन पौलुस म्हाकी लार याकूब सुं मलबा गियो। उण्डअ सबळा बढ़ा-बुढ़ा मेजुद छा। 19 पौलुस बान्अ परणाम कर्यो अर बा सबळा कामा का बारा मं ज्यो परमेसर दूसरी जात्या का बीच मं बीसुं करवायो छो एक-एक कर सब खे सुणायो। 20 जद्‍या वे या सुण्या तो परमेसर की महमा करता होया बीन्अ खिया, “भाई तु तो देख'ईर्यो छ क अण्डअ कतराई हजार यहूदी अस्या छ ज्यो बस्वास कर लिया। पण वे सबळा बेवस्था का बारा मं साउटा'ई समर्पित छ।” 21 थारा बारा मं बान्अ खिया छ क दूसरी जात्या का बीच मं रेबाळा सबळा यहूद्‍या न्अ मूसा की सक्ष्या न्अ छोड़बा की सक्ष्या देव्अ छ अर बान्अ खेव्अ छ क वे न्अ तो खुदका छोरा को खतनो कराव्अ अर न्अ ई म्हाका रीत रुवाजा प चाल्अ। 22 तो कांई कर्यो जाव्अ? वे या तो सुण'ई लेवला क तु आयो छ। 23 जिसुं तु बोई कर ज्यो मे थन्अ खेर्या छा। म्हाकी लार च्यार अस्यान का मनख छ ज्यो कोई मन्‍नत मांग्या छ। 24 तु यां मनखा न्अ लेजा अर यांकी लार सुद्धीकरण समारोह म भेळ्अ होजा अर बाको खरचो देद्अ क वे खुदका माथा मुंडवा ले। इसुं सबळा मनख जाण जाव्अला क वे ज्यो थारा बारा मं सुण्या छ उम्अ कोई सांच कोन्अ पण तु तो खुद'ई बेवस्था की जस्यान जन्दगी जीव्अ छ। 25 जण्ढ्अ ताणी बस्वास करबाळा दूसरी जात्या का मनखा को सुवाल छ, म्हे बान्अ एक कागद मं माण्ढर खन्दाया छा। क; थें मूरत्या प चढ़ायो प्रसाद मत खाज्यो। न्याड मरोड़र मार्या ज्यानबर न्अ अर लोई न्अ मत खाज्यो। अर वेभिचार सुं बच्या रेवो।

26 अस्यान पौलुस बा मनखा न्अ खुदकी लार लियो अर बा मनखा की लार खुदा-खुद न्अ बी दूसरअ दन सुद्ध करलियो। फेर वो मन्दर मं गियो जण्ढ्अ वो सुचना दियो क सुद्धीकरण का दन कद्‍या पुरा होव्अला अर आपा मंसुं हरेक बेई चढ़ावो कद्‍या चढ़ायो जावलो।

पौलुस को बन्दी होबो

27 जद्‍या वे सात दन पुरा होबाळाई छा क एकात यहूदी बीन्अ मन्दर मं देख लिया। वे भीड़ का सबळा मनखा न्अ उकसाया अर पौलुस न्अ पकड़ लिया। 28 फेर वे बळार खिया, “इजरायल का मनखवो सायता करो। यो बोई मनख छ ज्यो हर कढ्अ आपणी जनता का, आपणी बेवस्था का अर आपणी ई ठोर का बिरोध मं मनखा न्अ सखातो फरअ छ अर अब तो यो दूसरी जात्या का मनखा न्अ मन्दर मं लेर आयो छ। अस्यान यो ई पवितर ठोर न्अ बी भ्रष्ट कर दियो।” 29  बे अस्यान जिसुं खिया छा क्युं क त्रुफिमुस नांऊ को एक इफिसी मनख न्अ नगर मं उंकी लार देखर वे अस्यान समझ्या छा की पौलुस बीन्अ मन्दर म लेर गियो छ। 30 तो सबळो नगर बिरोध मं उबो होग्यो। लोगबाग भाग-भागर बीकाड़ी आया अर बीन्अ पकड़ लिया। फेर वे बीन्अ घिसता होया मन्दर क बारे लेग्या अर झटदाणी कुवाड़ बन्द कर दिया 31 वे बीन्अ मारबा की जुगत कर'ईर्या छा क रोमी टोळी का सेनापति कन्अ सुचना पूंची क सबळा यरूसलेम मं खलबली माचरी छ। 32 वो झटदाणी एकात सपाया न्अ अर सैना का अधिकारयां न्अ खुदकी लारा लेर पौलुस प हमलो करबाळा यहूद्‍या की ओड़ी गियो। जद्‍या यहूदी बी सेनापति अर सपाया न्अ देख्या तो वे पौलुस न्अ कुटबो बंद कर दिया। 33 जद्‍या सेनापति पौलुस कन्अ आयो अर बीन्अ बन्दी बणालियो। वो बीन्अ दो बेला मं बान्धबा की आज्ञा दियो। फेर वो बुज्यो क वो कुण छ अर कांई कर्यो छ? 34 भीड़ मंसुं एकात मनख एक बात खिया अर दूसरा दूसरी बात खिया। ई हुल्‍लड़ मं वो कोन्अ जाण सक्यो क सच्चाई कांई छ, जिसुं वो आज्ञा दियो क बीन्अ छाऊणी मं लेर चाल्यो जाव्अ। 35-36 पौलुस जद्‍या पकत्या कन्अ पुच्यो तो भीड़ मं फेल्या रोषा की बजेसुं सपाया न्अ बीन्अ खुदकी रुखाळी मं लेर जाणो पड़यो। क्युं क बीक्अ पाछ्अ घणीसारी भीड़ अस्यान बळाती चालरी छी क ईन्अ मारद्‍यो।

पौलुस को बचावो

37 जद्‍या पौलुस न्अ छाऊणी क माईन्अ लेर जाबाळा'ई छा क पौलुस सेनापति न्अ खियो, “कांई म कोई-कांई खे सकु छु?” सेनापति खियो, “कांई तु यूनानी बोल्अ छ? 38 तो तु वो मिसरी तो कोन्अ छ ज्यो थोड़ी बगत पेली बिद्रोह सरू करवायो छो अर ज्यो अण्डअ राड़ी मं च्यार हजार उगरवाद्‍या की अगुवाई करर्यो छो?” 39 पौलुस खियो, “म किलिकिया का तरसुस नगर को रेबाळो एक यहूदी मनख छु अर म थारसुं चाऊ छु क तु मन्अ अण्डअ यांक्अ गाब्अ बोलबा को मोको देव्अ।” 40 बीसुं आज्ञा पार पौलुस पकत्या प उबो होर लोगा की ओड़ी हाथ हलार असारो कर्यो अर जद्‍या सबळा छाना होग्या तो पौलुस इब्रानी मं लोगा न्अ खेबा लाग्यो।