Enyarubha ya kasatu eya
Yoana
Okukeeranʼya
1
Oni omukangati wa erikanisa, ndakungʼoorera uuwe Gaayo omuhanje waani. Nkuhanjiri kwa obhuheene.2 Bhoono, omuhanje waani, ndakwendera amajomu kumangʼana gaaho gonsego na obhuhoru. Mmanyiri ega, oringi omuhoru kumangʼana ga Waryubha. 3 Naajomerwa bhukongʼu, hanú abheekirirya abharikyaho abhandi bhaaja na okunkeerya kya ego oragendererya okugwata obhuheene na okwikara kwa obhuheene. 4 Ritariho eringʼana rinú riranjomera bhukongʼu okukira okwigwa ega, abhaana bhaani kuimani bhareekara kwa obhuheene.
Obhuheene bhwa Gaayo
5 Omuhanje waani, uuwe orakora kya ego oranyoora oragiri kuganú orakorera abheekirirya abharikyetu, onyoora bheeki m-bageni kuuwe. 6 Abheekirirya bhayo bhaaruusya obhwimiririri embere ya abhantu bha erikanisa rya hanu, eguru ya obhuhanje bhwaho. Ndakukomererya ega, ogendererye okubhabheera, okuringʼaana na kya ego eramungʼarira Waryubha, naho bhagendererye na orugendo rwabho. 7 Bhoono, abhantu bhayo bhaamba orugendo rwabho rwa okumukorera emirimu Yeesu Kiristu, bira okubheerwa kyokyonse okurwa kubhantu bhanú bhataringi abheekirirya. 8 Mbe, bheetu tureenderwa okubhagenihya abhantu kya bhayo, naho tubhe tusangiri hamwi nabho, kumirimu gya okuraarika obhuheene.
Diotirife
9 Naangʼoorera erikanisa enyarubha ya amangʼana amakego, nawe, Diotirife unú ahanjiri okwikangatirirya okubha omukangati waabho, atakwenda okunyitegeerera. 10 Kwa ego, hanú ndiija eyo, nditubhura gonsego ganú arakora, kya ego araruusya amangʼana amabhiibhi ga ekikangi kubheetu. Kora gataringi gayo ageenego, kweki araanga okubhagenihya abheekirirya abharikyetu bhanú bharingi kurugendo. Na araribhira abhantu abhandi bhanú bhareenda okubhagenihya na arabhakenyia mwikanisa.
11 Bhoono uuwe Gaayo, omuhanje waani, oteehigira amangʼana amabhiibhi, nawe, wihigire amangʼana amajomu. Wowonse unú arakora amajomu, uyo m-mwana wa Waryubha. Nawe, unú arakora amabhiibhi, uyo atamumanyiri Waryubha.
Demetirio
12 Abhantu bhonsego bheemiririiri ega, Demetirio m-muntu unú arakora amangʼana amajomu, na obhuhoru bhwaye bhuraringʼaana na obhuheene. Kora na bheetu tureemiririra ego, na uuwe omanyiri ega, obhwimiririri bhwetu m-bwa obhuheene.
Okukeeranʼya kwa okuraga
13 Niina amangʼana amaaru ga okuhaira, nawe, ntakwenda okugangʼoora kwitarataasi na obhwino. 14 Ndeeganirirya okukutaarira bhwangu hanu na okuhaira hamwi na uuwe ameeso kwa ameeso.
15 Omurembe gubhe hamwi na uuwe. Abhasaani bhaaho bha hanu bharakukeeranʼya. Na uuwe, obhakeeranʼye abhasaani bheetu bha eyo, kira oumwi oumwi kwa eriina ryaye.