Enyarubha ya kabhiri eya
Yoana
Okukeeranʼya
1
Oni omukangati wa erikanisa, ndakungʼoorera uuwe maayi omusorwa, hamwi na abhaana bhaaho,a bhanú nhanjiri kwa obhuheene. Ntaringi oni omwene unú mbahanjiri, nawe, na abhandi bhonsego bhanú bhamanyiri obhuheene, bhonse bhabhahanjiri. 2 Mbahanjiri kwa okubha bheetu na bheenyu tumanyiri obhuheene, kweki turagendererya okubhumanya koko.3 Mbe, eriruguto, ekyabhira na omurembe, bhinú bhirarwa ku Taata Waryubha na Omwana waaye Yeesu Kiristu, bhiribha hamwi na bheetu bhanú turagwata obhuheene na obhuhanje.
Okwikara kwa obhuheene na obhuhanje
4 Naajomerwa bhukongʼu, okurora abhaana bhaaho abhandi, bharagwata obhuheene, kya ego Taata Waryubha yaaturagirirya. 5 Bhoono maayi, ndakusabha ega, ogwate eriragiriryo rya okuhanjana. Eriragiriryo riyo, ritaringi erihya, nawe, n-dirya twaringa naryo okurwa hanú twaamba okumwikirirya Kiristu.b 6 Okuhanjana nko okugwata amaragiriryo ga Waryubha. Rinu ndyo eriragiriryo rirya mweegwa okurwa kubhwambiro ega, mwikare kwa obhuhanje.
Mutabhagenihya abhangʼeenererya
7 Ndagamba ego, kwa okubha abhangʼeenererya abhaaru bheebhukiri mukyaro. Bheeki bhatakwikirirya ega, Yeesu Kiristu yaaja mukyaro akabha na omubhiri kya omuntu.c Omuntu wowonse wa ekabhira iyo, ngʼo omungʼeenererya na omwangi wa Kiristu. 8 Mbe, mwiyangararire bheenyu abheene, eguru ya abhantu bhayo, naho emirimu gyenyu ku Waryubha gitariija okubha gya bhusa. Nawe, muriija okunyoora omutuho gunú gukunaaniri okurwa ku Waryubha. 9 Omuntu wowonse unú atakugendererya okugwata ameehigiryo eguru ya Kiristu, kweki aragakyukya, uyo ataana obhumwi na Waryubha. Nawe, unú aragendererya okugagwata, uyo yaana obhumwi na Taata Waryubha na Omwana waaye. 10 Nyoore omuntu unú atakwihigirya obhuheene eguru ya Kiristu araaje kubheenyu, mutamugenihya mumigi gyenyu, kora mutamukeeranʼya kwa enkeeranʼya ya Ekikiristu. 11 Omuntu wowonse unú araamukeeranʼye kwa enkeeranʼya iyo, arabha agwateeni nawe, kumirimu gyaye emibhiibhi ginú arakora.
Okukeeranʼya kwa okuraga
12 Niina amangʼana amaaru ga okuhaira na bheenyu, nawe, ntakwenda okugangʼoora kwitarataasi na obhwino. Ndeeganirirya okuuja kubheenyu eyo, nhaire na bheenyu ameeso kwa ameeso, naho obhujomerwa bhwetu bhukunaane.
13 Abhaana bha omuhara weenyu omusorwa, bharakukeeranʼya.