Okuhiga obhusarya
5
Omuntu wowonse unú areekirirya ega, Yeesu ngʼo Kiristu Omutuurya, uyo ngʼo omwana wa Waryubha. Wowonse unú aramuhanja taata, arahanja na abhaana bhaaye bhonse. 2 Tumanyiri ega, turahanja abhaana bha Waryubha, kwa okumuhanja Waryubha, na okugwata amaragiriryo gaaye. 3 Okumuhanja Waryubha, nko okugwata amaragiriryo gaaye. Na okugwata amaragiriryo gaaye, kutaringi okukongʼu, 4 kwa okubha kira omwana wa Waryubha arahiga amangʼana ga ekyaro. Turahiga amangʼana ga ekyaro, kwa eimani yeetu. 5 Mbe bhoono, ngʼ-uuha unú arahiga amangʼana ga ekyaro? Ngʼ-unú areekirirya ega, Yeesu m-Mwana wa Waryubha.Obhuheene eguru ya Yeesu Kiristu
6 Mbe, Yeesu Kiristu ngʼo yaaja kwa amanji ga obhubhatiijo bhwaye na kwa amanyinga ga oruku rwaye. Ataabhatiijwa kwa amanji ageenego, nawe kweki, yeetira amanyinga gaaye kumusarabha. 7 Mbe, Omutima Omurabhu ngʼo areemiririra ega, gayo n-ga maheene, kwa okubha Omutima Omurabhu ngʼo obhuheene. 8 Kwa ego, bhariho abheemiririri abhasatu bhanú bhareemiririra amangʼana eguru ya Yeesu [murwire, na bhayo m-banu, Taata, Eringʼana, na Omutima Omurabhu. Na abhasatu bhayo, m-bamwi. 9 Kweki bhariho abhantu abhasatu bhanú bharamwimiririra mukyaro]a na bhiyo m-binu, Omutima, amanji, na amanyinga. Na ebhisatu bhiyo, obhwimiririri bhwabhyo m-bumwi. Nyoore tureekirirya obhwimiririri bhwa abhantu, mbe obhwimiririri bhwa Waryubha, m-bukuru okukira obhwa abhantu, kwa okubha bhuyo mbo obhwimiririri bhunú Waryubha yaaruusya eguru ya Omwana waaye.
10 Omuntu wowonse unú aramwikirirya Omwana wa Waryubha, yeekirirye ega, obhwimiririri bhwa Waryubha bhuyo, m-bwa maheene. Nawe, unú atakumwikirirya Waryubha, aramukora Waryubha okubha omubheehi, kwa okubha atakwikirirya obhwimiririri bhunú Waryubha yaaruusya eguru ya Omwana waaye. 11 Obhwimiririri bhuyo m-bunu, Waryubha atuheeri obhuhoru bhwa koko. Na obhuhoru bhuyo, twabhunyooreri kwa enjira ya okumwikirirya Omwana waaye. 12 Omuntu wowonse unú yaana obhumwi na Omwana wa Waryubha, yaana obhuhoru bhuyo. Nawe, unú ataana obhumwi nawe, ataana obhuhoru bhuyo.
Okumanya obhuhoru bhwa koko
13 Mbangʼooreeri amangʼana ganu gonsego, bheenyu bhanú mureekirirya eriina rya Omwana wa Waryubha, naho mumanye ega, muuna obhuhoru bhwa koko. 14 Bheetu m-bateremu bhukongʼu embere ya Waryubha, kwa okubha tumanyiri ega, nyoore turaamusabhe ekintu kyokyonse okuringʼaana na obhwendi bhwaye, aratwitegeerera. 15 Tumanyiri ega, aratwitegeerera hanú turamusabha kyokyonse, nkyo kirakora turamanya ega, turaanyoorenga amangʼana ganú turamusabha.
16 Bhuriho obhusarya bhunú bhutakwahura omuntu abhe ahare na Waryubha koko. Nyoore omuntu araarore omurikyaye arakora obhusarya kya bhuyo, amusabhire ku Waryubha, na Waryubha arimuhaana obhuhoru. Ebhe ego, kubhantu bhanú bharakora obhusarya kya bhuyo. Nawe, bhuriho obhusarya bhunú bhuramwahura omuntu abhe ahare na Waryubha koko. Oni ntakugamba ega, bheenyu mumusabhire ku Waryubha, omuntu unú arakora obhusarya kya bhuyo. 17 Okukora eringʼana ryoryonse rinú ritakwenderwa embere ya Waryubha nko okukora obhusarya. Nawe, hamwi na gayo, bhuriho obhusarya bhunú bhutakwahura omuntu abhe ahare na Waryubha koko.
18 Tumanyiri ega, kira omuntu unú abheeri omwana wa Waryubha, atakugendererya okukora obhusarya,b kwa okubha Yeesu Kiristu Omwana wa Waryubha aramwangararira, na omusarya urya Erisambwa, atakunagya okumukora kyokyonse. 19 Tumanyiri ega, bheetu m-baana bha Waryubha. Nawe, abhantu abhandi bhonsego bhanú bhatakumwigwa Waryubha, bharatungwa na omusarya urya. 20 Kweki tumanyiri ega, Omwana wa Waryubha amariri okuuja, weeki atuheeri obhungʼeeni, naho tumumanye Waryubha wa obhuheene. Bheetu tuuna obhumwi na Waryubha wa obhuheene, kwa okubha tuuna obhumwi na Omwana waaye Yeesu Kiristu. Uyo ngʼo Waryubha wa obhuheene na ngʼo aratuhaana obhuhoru bhwa koko.
21 Abhaana bhaani abhahanje kuimani, mwiyangararire mutasyengera ebhisusano.c