Obhwikari bhunú bhurangʼarira Waryubha
4
Mbe, kwa okubha Kiristu yaanyankibhwa omubhiri gwaye, na bheenyu bhonse mwiseemye okunyankibhwa kya omwene. Ndagamba ego, kwa okubha omuntu unú amariri okunyanka kumubhiri gwaye, atigeeni na obhusarya. 2 Kwa enjira iyo, obhwikari bhwaye bhonsego, areekara okuringʼaana na kya ego Waryubha areenda, etaringi okuringʼaana na orunamba rwa abhantu. 3 Akare hayo, mwakoranga amangʼana ga abhantu bhanú bhatamanyiri Waryubha. Mweekaranga kwa orunamba orubhiibhi rwa okuhanja abhakari na abhasaaja abhaaru. Kweki mwaringa abhareebhi bha okuhitiranʼya na mwaringa muhanjiri eginyangi gya ekyaro. Mwasyengeranga ebhisusano, bhyeki bhyaangwa na Waryubha. Mwakora amangʼana gayo, kwa eribhaga eritambi bhukongʼu. 4 Bhoono, abhantu bhanú bhatamanyiri Waryubha, bhararuguura hanú bhararora ega, mutakyagya nabho obhumwi kweki okukora amabhiibhi, kwa ego bharabhatuka. 5 Nawe, abheene bharyenderwa okwibhagirira, embere ya Waryubha. Weeki, yeeseemerye okubhuturira ekiina abhantu bhonsego, abhahoru na abhaku. 6 Kiyo nkyo ekisigo, abhantu bhanú bhaakwa, bhaaraarikirwa Amangʼana Amajomu, naho kora nyoore bhaajibhibhwa omubhiri kya abhandi, bhabhe abhahoru kwa obhuturo bhwa Omutima Omurabhu, kya ego Waryubha m-muhoru.7 Obhuteero bhwa amangʼana gonsego, bhuringi haangʼi. Kwa ego, mubhenga mureeribhira na okwiyangararira kugonsego, naho muture okutengeeja murasabha. 8 Okutiga gayo gonsego, muhanjane bhukongʼu, kwa okubha obhuhanje bhurabhisa obhusarya obhwaru.a 9 Mubhe abhantu bha okugenihya abharikyenyu bira okwingʼeheerya.
10 Kira oumwi aheerwe obhuturo bhwaye okurwa ku Waryubha, naho abheere abharikyaye. Ereenderwa abhutumire bhujomu, kya omwimiririri owa heene wa eginonkwe amanga amaaru gya Waryubha. 11 Nyoore omuntu yaana amangʼana ga okugamba, agagambe muna gararwa ku Waryubha. Na nyoore omuntu arakorera abharikyaye emirimu, akore kwa obhuturo bhunú bhurarwa ku Waryubha. Kwa enjira inu, Waryubha aragungibhwa kumangʼana gonsego, kwa ekisigo kya Yeesu Kiristu. Omwene yaana obhukuru na eginguru, koko na koko. Amina.
Okunyanka kurusumo rwa Yeesu
12 Abhahanje bhaani, mutaruguura eguru ya enyanko enduru kya omururo, inú ereebhuka gati yeenyu okusakya eimani yeenyu. Mutarora ega, n-kintu ekigeni kinú kirabhanyoora. 13 Nawe, mujomerwe ega, muranyanka, kya ego Kiristu yaanyanka, naho muriija okubha na obhujomerwa deke, eribhaga rinú obhukuru bhwaye bhuryorokibhwa harabhu. 14 Nyoore muritukwanga kwa ekisigo kya eriina rya Kiristu, mumanye ega, murinonkwa. Eringʼana riyo, riroorokya ega, Omutima wa Waryubhab wa obhukuru aringi hamwi na bheenyu. 15 Mbe, enyanko yeenyu, etariija okurekana na obhwiti, obhwibhi, okukora amabhiibhi kasi okwisohya kumangʼana ga abhandi. 16 Hanú omuntu araanyankibhwe kwa okubha m-Mukirisitu, atarora eginsoni, nawe, amugungye Waryubha ega, arabhirikirwa kwa eriina riyo. 17 Mumanye ega, eribhaga rya okubhutura ekiina rihikiri, na Waryubha aryamba okubhutura ekiina kubhantu bhaaye. Bhoono nyoore okubhutura ekiina kuryambira kubheetu abhantu bhaaye, bhoono eribha egaki kubhanú bhatakwikirirya Amangʼana Amajomu ga Waryubha? 18 Amangʼoore Amarabhu garagamba ega,
“Nyoore m-bukongʼu kumuheene okutuuribhwa,
eribha egaki kumusarya unú atakumwigwa Waryubha?”c
19 Kwa ego, bhanú bharanyanka kwa okukora kya ego Waryubha areenda,d bhamanye ega, Waryubha m-Mubhumbi omuheene. Ego, bhagendereryenga okukora amajomu na okumwikirirya Waryubha.