Waryubha aratuurya kwa eriruguto ryaye
2
Bheenyu mwaringa mukwiri, kwa ekisigo kya ebhikorwa bhyenyu ebhibhiibhi na obhusarya bhwenyu. 2 Eribhaga riyo, mwaringa murakora amangʼana amabhiibhi ga mukyaro kinu. Na mwaringa murariigwa Erisambwa,a omukama wa ebhihwi bhya obhuturo bhwa orwire, unú bhoono arakora emirimu kubhanú bhatakumwigwa Waryubha. 3 Bheetu bhonsego, twaringa kya bheeki, tweekaranga okuringʼaana na orunamba rwetu rwa ekyaro, na okukora amangʼana ganú gaajomeranga emibhiri gyetu na obhungʼeeni bhwetu ageenego. Tweebhurwa na obhusimuka bhwa obhusarya kya abhandi, kwa ego Waryubha yaaringa atujimiiri na tweenderwanga okujibhibhwa. 4 Nawe, Waryubha kwa okubha ngʼ-wa ekyabhira ekyaru, atuhanjiri kwa obhuhanje bhwaye bhunú bhutaana obhuteero. 5 Bheetu twaringa tukwiri kurusumo rwa obhusarya bhwetu, nawe, Waryubha kwa eriruguto ryaye, yaatutuurya akatukora okubha abhahoru kya ego yaamuhyukya Kiristu.b 6 Kwa okugwatana kwetu na Kiristu, Waryubha yaatuhyukya okurwa mubhaku, hamwi na Kiristu Yeesu, akatwikarya hamwi nawe murwire, naho tutunge hamwi nawe. 7 Yaakora ego, naho yoorokye kwibhaga rinú riraaja, obhuserenʼya bhwaye kubheetu okuhitira ku Kiristu Yeesu, na obhwaru bhwa eriruguto ryaye rinú ritaana obhuteero. 8 Waryubha yaabhatuurya kwa eriruguto ryaye, kwa okubha mwamwikirirya Yeesu Kiristu. Obhutuurya bhuyo, bhutakurekana na ekituunyo kyenyu abheene, m-mutuho gwenyu okurwa ku Waryubha. 9 Ataabhatuurya kwa okurekana na amakorwa geenyu, kwa ego, omuntu wowonse atariija okwigungya. 10 Waryubha yaatubhumba kya ego turingi. Yaatubhumba bhuhya kwa okugwatana kwetu na Kiristu Yeesu, naho tukorenga amakorwa amajomu ganú yaatuseemerya tukore.Okubha na obhumwi ku Kiristu
11 Mbe, muhiituke kya ego mwaringa akare. Obhusimuka bhwenyu m-bantu bha ebhyaro ebhindi, mutaringi abhantu bha Waryubha. Abhayahudi bharabhabhirikira ega, “abhantu bhanú mutakusaarwa,” nawe, bheeki bhareebhirikira ega, bhanú bharasaarwa, ensaaro inú erakoreka kumibhiri gyabho kwa amabhoko. 12 Muhiituke ega, eribhaga rirya, mutaaringa mumanyiri eguru ya Kiristu. Mwaringa mwahukeeni na abhantu bha Isiraeri, bhanú mutaaringa munyooreri eriraganoc ryoryonse okurwa kumaragano gaabho. Mutaaringa na obhwisige kya abhantu bhanú bhatamanyiri Waryubha mukyaro. 13 Nawe bhoono, kwa okugwatana kwenyu na Kiristu Yeesu, bheenyu bhanú akare hayo, mwaringa hare, muteerwe haangʼi kwa enjira ya okwitika kwa amanyinga ga Kiristu. 14 Na kwa okubha Kiristu omwene yaareeteri omurembe gati yeetu, Abhayahudi na abhantu bhanú bhataringi Abhayahudi, yaatukora bheetu bhanú twaringa twahukeeni okubha abhamwi. Yaaruusya-ho obhusigu bhunú bhwatwahukanʼyanga kya endigi. 15 Hanú yaaruusya omubhiri gwaye, yaaruusya-ho amaragiriryo ga Musad hamwi na emigiro gyago, naho okurekana na abhantu bha emiganda ebhiri giyo, akore omuganda gumwi omuhya. Ego niigo yaareeta omurembe gati yeetu. 16 Kiristu yaaruusya-ho obhusigu, kwa enjira ya okukwa kwaye kumusarabha, yaagwatanʼya emiganda ebhiri ginu, okubha ogumwi na okubhagwatanʼya ku Waryubha. 17 Mbe, hanú Kiristu yaaja, akaraarika amangʼana amajomu eguru ya omurembe, kubheenyu bhanú mwaringa mutamumanyiri Waryubha, na ku Bhayahudi, bheeki bhaaringa bhamumanyiri Waryubha. 18 Kwa ego, okuhitira kumwene, bheetu bhonsego twanyooreri omweya gwa okumusuntarira Taata kwa enjira eimwi, yaani kwa okuhitira Omutima oumwi.
19 Mbe, okwambira bhoono, bheenyu mutaringi abhageni kora abhahiti, nawe, mwabheeri abhasimuka hamwi na abhantu bha Waryubha, abhantu abha omuganda gwa Waryubha. 20 Bheenyu mubheeri kya enyumba inú ehagaajirwe kubhurusa, na obhurusa bhuyo, m-batumwa na abharooti,e na Kiristu Yeesu omwene n-kya erigina erikuru rya obhurusa bhuyo. 21 Weeki ngʼo aragwatanʼya erikindaasi ryonsego riragwatana bhujomu, na okurikora ribhe erinene kya erisyengerero erirabhu kurusumo rwa Omukuru. 22 Kwa okugwatana nawe, bheenyu bhonse muragwatanibhwa hamwi na abhandi bhonsego, okubha emenyo ya Waryubha kwa enjira ya Omutima waaye.