Abharuumi 9

Pauro areeyigwa obhururu kurusumo rwa abhantu bha Isiraeri

Kiristu amanyiri ega, ndagamba obhuheene ntakubheeha. Kora ameetegeerero gaani ganú garoorokereribhwa na Omutima Omurabhu garanyimiririra ega, ntakubheeha. 2 Maheene, oni nsurumbeeri bhukongʼu na okunyahaarika kunú kutakuhwa mumutima gwani, 3 kwa ekisigo kya abhantu bha ekyaro kyani. Nyoore ekaaturikeeni, nkeekiriirye okwihiimwa oni omwene na okwahurwa na Kiristu, nyoore kwa okukora ego, kukaabhabheereri abhahiiri bhaani bhayo, bhamwikirirye Kiristu. 4 Abhahiiri bhaani bhayo, m-Baisiraeri, abhantu bhanú Waryubha yaasora bhabhe abhaana bhaaye, yaabhoorokya obhukuru bhwaye, na yaakora amaragano nabho. Kweki yaabhahaana amaragiriryo gaaye, hamwi na egindago gyaye, na yaabhoorokererya kya ego ereenderwa bhamusyengere. 5 Abhaisiraeri bhayo, mbo bhaasimuka okurwa kubhajaaji waabho, bha Abhurahamu, Esaaka na Yakobho. Kiristu yaaringa Omwisiraeri okurekana na obhusimuka bhwaye bhwa okubha omuntu. Kiristu unú ngʼ-Waryubha, Omukuru wa bhyonsego, agungibhwe koko! Amina.

6 Ntakugamba ega, Waryubha yaatamwa okukunaanʼya endago yaaye ku Bhaisiraeri. Tiigo-ha kora ahake! Kwa okubha etaringi ega, Abhaisiraeri bhonsego, m-Baisiraeri eritinya. 7 Etaringi ega, abheebhurwa bhonsego bha Abhurahamu mbo abhaana bhaaye bha heene. Nawe, Waryubha yaamuraga Abhurahamu ega, “Abhaana bha ehamati yaaho bharirwa murwibhuro rwa Esaaka.” 8 Ensonga ya amangʼana gayo niiga, etaringi ega, abhaana bha okwibhurwa kwa omubhiri bha Abhurahamu, mbo abhaana bha Waryubha. Nawe, m-banú bheebhurwa okurekana na endago ya Waryubha, bhayo mbo abhaana bha heene bha Waryubha. 9 Endago ya Waryubha iyo, yaaringa ega, “Omwaka guyo guraaja kwibhaga kya rinu, ndihunjuka, na Saara aribha akwibhuriiri omwana wa ekisaaja.”

10 Kweki ritaringi riyo eryenego, kora Rebheka wonse, yeebhurira jaaji weetu Esaaka, abhaana ebhisare. 11-12 Hanú ebhisare bhiyo, bhyaringa bhitareebhurwa, na hanú bhyaringa bhitarakora kyokyonse ekijomu kasi ekibhiibhi, Waryubha akamukeerya Rebheka ega, “Omukuru aribhanga aramukorera emirimu omuke.” Eringʼana riyo, riroorokya ega, Waryubha arasora omuntu okurekana na obhwendi bhwaye, etaringi okurekana na amakorwa ga omuntu. 13 N-kya ego Amangʼoore Amarabhu garagamba ega, “Yakobho mmwikiriirye, nawe, Esau mmwangiri.”

Waryubha arakora kya ego areenda

14 Bhoono tugambe-ki? Tugambe ega, Waryubha ataringi omuheene? Tiigo-ha kora ahake! 15 Kwa okubha yaamukeerya Musa ega, “Oni ndamumaahira ekyabhira, omuntu unú ndeenda okumumaahira ekyabhira, na ndabha omunyoohu kumuntu unú ndeenda okubha omunyoohu kumwene.” 16 Kwa ego, Waryubha ngʼo araamura okukora gayo, okurekana na ekyabhira kyaye ekyenego, etaringi okurekana na ekituunyo kasi obhwendi bhwa omuntu. 17 Maaha, mu Mangʼoore Amarabhu, Waryubha yaamukeerya Farao ega, “Naakuhaana obhukama, naho noorokye abhantu obhuturo bhwani, okuhitira kuuwe, kweki eriina ryani ribhenga riraraarikwa mukyaro kyonsego.” 18 Kwa ego, mbe, Waryubha aramumaahira ekyabhira omuntu unú areenda, na unú areenda abhe na omutwe omukongʼu, aramukora okubha na omutwe omukongʼu.

19 Bhoono, hamwi omuntu aratura okubhuurya ega, “Nyoore niigo eringi, kwaki Waryubha arakora amasoro kumuntu wowonse? Niwi unú aratura okuribhira kinú Waryubha areenda?” 20 Nawe, uuwe omuntu, uuwe niwi kora ohakaananʼye na Waryubha? Mbe, ekintu kinú kyabhumbwa kwa obhutoto kiratura okuhakaananʼya na unú yaakibhumba na kimubhuurye ega, “Kwaki waambumba ego?” 21 Omubhumbi wa ebhibhiga ataana obhwamuri bhwa okutumira obhutoto kya ego areenda? Aratura okubhumba ebhibhiga ebhibhiri okurwa kubhutoto bhuyobhuyo, ekibhiga ekimwi, kibhe ekya abhageni, na ekindi kibhe ekya okukorera emirimu kira orusiku.

22 Niigo eringi ku Waryubha. Yeendanga okoorokya abhantu enkoro yaaye na obhuturo bhwaye, nawe, yaabheegumirirya bhukongʼu abhantu bhanú bheenderwanga okusikibhwa. 23 Yaakora ego, naho ature okoorokya obhukuru bhwaye kurusumo rwa abhantu bhanú yaaseemya ega, aribhamaahira ekyabhira. Yaaseemya okurwa akare ega, aribhahaana obhukuru bhwaye. 24 Gati ya abhantu bhanú yaabhirikira, na bheetu turimo. Ataabhirikira Abhayahudi abheenego, nawe, abhirikiiri kora bhanú bhataringi Abhayahudi. 25 Kiyo nkyo Waryubha yaagamba mukitabho kya omurooti Hosia ega,

“Abhantu bhanú bhataringi abhantu bhaani,

ndibhabhirikira ‘Abhantu bhaani.’

Abhantu bhanú ntabhahanjiri,

ndibhabhirikira ‘Abhahanje bhaani.’”

26 Kweki yaagamba ega,

“Hanú bhaakeeribhwa ega, ‘Bheenyu mutaringi abhantu bhaani,’

hayo nho, bharibhirikirwa ‘Abhaana bha Waryubha omuhoru.’”

27 Kweki, omurooti Isaaya yaagamba eguru ya Abhaisiraeri ega,

“Kora onyoora Abhaisiraeri m-baaru kya omusenyi gwa kumurambo gwa enyanja,

nawe, bhanú bharituuribhwa, m-bake.

28 Omukuru Waryubha aribhahaana abhantu bha ekyaro kyonsego obhujibhu bhunú bhukuneeni bira okutigita,

kya ego yaagamba.”

29 N-kya ego omurooti Isaaya yaagamba akare ega,

“Nyoore Omukuru Waryubha wa obhuturo bhonsego atakaatamirye abheebhurwa abhake bha Abhaisiraeri,

tukaabheeri tusikiri bhonsego kya abhantu bha Sodoma na Gomora.”

Abhaisiraeri abhaaru bhataringi abhaheene//embere ya Waryubha

30 Tugambe-ki bhoono, eguru ya amangʼana gayo? Abhantu bhanú bhataringi Abhaisiraeri bhataakora ekituunyo okubha abhaheene embere ya Waryubha, nawe, Waryubha yaabhabhara okubha abhaheene kwa enjira ya okumwikirirya Kiristu. 31 Abhaisiraeri bhaaringa bharakora ekituunyo okugwata amaragiriryo ga Musa, naho bhabharwe okubha abhaheene embere ya Waryubha, nawe, bhataatura. 32 Kwaki bhataabharwa okubha abhaheene embere ya Waryubha? N-kwa okubha bheesigira amakorwa gaabho, na bhataamwikirirya Kiristu. Kiristu ngʼo erigina rirya bheekuujura-ko, 33 kya ego Waryubha yaagamba mu Mangʼoore Amarabhu ega,

“Maaha, ndatuura erigina Sayuni.

Erigina riyo, ndyo abhantu bhariikuujura-ko,

na ririkora abhantu bhabhenga bharagwa.

Nawe, omuntu wowonse nyoore aramwikirirya unú ni-rigina riyo,

atarisuuka kora orusiku rumwi!”