Pauro kwiginga rya Merita
28
Hanú twarwa munyanja muyo bhwaheene, nho tukamanya ega, turingi kwiginga rinú rirabhirikirwa Merita. 2 Abhamenyi bha hayo, bhakatugenihya bhujomu bhukongʼu. Bhaatukoomera omururo, kwa okubha ryaringa eribhaga rya embeho, na embura yaaringa eratwa, bhakatugenihya bhonsego toote omururo guyo. 3 Pauro akateenya eginkwi nkego. Hanú yaaringa aragituura mumururo, enjoka ekarwa munkwi muyo, kurusumo rwa eribhiriira rya omururo, ekeeringisirirya kukubhoko kwaye ekamuruma.4 Abhamenyi bha kwiginga riyo, hanú bhaarora enjoka iyo, iturungejerye kukubhoko kwa Pauro, bhakajamirirana ega, “Omuntu unu m-mwiti. Onyoora ahoneri okusika munyanja munu, omukuru weetu unú arabhirikirwa ‘Omuheene’, ataamutige agendererye okubha omuhoru.” 5 Nawe, Pauro akaikungʼuntira mumururo, ataanyahaarika kora hake. 6 Abhantu bhayo, bhakamanya ega, araabhimbe kasi araagwe hansi, rumwigo akwe. Nawe hanú bhaaganya kwa eribhaga eritambi na okurora ega, atabheeri ekintu, bhakakyukya obhugambi bhwabho, na okwamba okugamba ega, weeki ngʼ-umwi wa abhakuru bhaabho.
Pauro aramuhwenʼya esewaabho omukuru wa Merita
7 Mbe, hayo twambukira, haaringa haangʼi na emigunda gya omukuru wa eriginga riyo. Omukuru uyo, yaabhirikirwanga ega, Pubhurio. Pubhurio uyo, akatugenihya bhujomu iika owaaye, tukamara-ho eginsiku esatu. 8 Kwibhaga riyo, esewaabho yaaringa areeri kubhuriri, m-murweri, yaana ehooma na yaaringa arasaaha amanyinga. Pauro akasoha munyumba okumurora. Hanú yaamara okumusabhira ku Waryubha, akamutuurira amabhoko eguru waaye, akamuhwenʼya. 9 Eringʼana riyo hanú ryeebhuka, abharweri abhandi bhonsego kwiginga riyo, bhakabha bharamuujira Pauro, wonse akabha arabhahwenʼya. 10 Abhantu bha hayo, bhakabha bharatusuuka bhukongʼu. Na hanú tweenda okwimuka, bhakaturiinirya mubhwato ebhintu bhyonsego bhinú tweendanga.
Pauro arahika mumugi gwa Ruumi
11 Hanú twamara emyeri esatu kwiginga riyo, tukaamba orugendo kwa obhwato bhunú bhwaringa bhurekeeri enanga, bhuraganyirira eribhaga rya embeho riyo rihwe. Obhwato bhuyo, bhwaringa bhwa mumugi gwa Arekisandiria, na bhwaringa bhungʼoorerwe ebhisusano bhya Abhakuru Ebhisare. 12 Tukahika mumugi gwa Sirakusa, tukeekara hayo eginsiku esatu. 13 Hanú twarwa hayo, tukeenaara embarika wa enyanja, tukahika mumugi gwa Regio. Ejo wendeko, omuyaga gukatiimuka okurwa orubhaara rwa taragweta, gukakora orusiku rwa kabhiri tuhike mumugi gwa Puteori. 14 Eyo, tukasikana na abhahiiri bheetu ku Kiristu, bhakatukomererya ega, tubhe nabho eginsiku muhungati. Hanú gyahwa, tukagwata enjira okugya mumugi gwa Ruumi. 15 Abheekirirya abharikyetu bha Ruumi eyo, hanú bheegwa ega turingi kunjira turagya owaabho, bhakaaja ku Mudiira gwa Apio, na ahasi hanú haabhirikirwanga ega, “Emikahawa Esatu” okututuruungʼana. Pauro hanú yaabharora, akamukumya Waryubha na akasambaaruka bhukongʼu.
Pauro areehigirya abhantu bha Ruumi
16 Hanú twahika mumugi gwa Ruumi, Pauro akeekiriribhwa okwikara munyumba yaaye omwene, hamwi na omusirikare wa okumwangararira.
17 Eginsiku esatu hanú gyahwa, akabhirikira hamwi, abhakuru bha Abhayahudi bha hayo. Hanú bheekumanʼya, akabhakeerya ega, “Abhahiiri bhaani, onyoora ntaakora eringʼana eribhiibhi kubhantu bheetu, kasi kumigiro gya bhajaaji weetu, nawe naagwatwa mumugi gwa Yerusaremu, nkagwatibhwa ku Bharuumi. 18 Abharuumi bhayo, hanú bhaamara okunyikomya, bhakeenda okunhaatira, kwa okubha bhataannyoora na obhusarya bhobhonse bhunú bhukaakoreri niitwe. 19 Nawe, Abhayahudi bhakaanga ega, ntahaatirwa. Kwa ego, nkasabha ega, ekiina kyani kyamurwe na Kaisari, Ruumi enu. Etaringi ega, naaringa ndeenda okubhajongera abhantu bha ekyaro kyani. 20 Mbe, gayo ngo gakoreri mbabhirikiiri, naho mbarore tuhaire hamwi. Oni hanu mboherwe kwa okubha ndamwikirirya Kiristu Omutuurya, uyo ngʼo obhwisige bhwa Abhaisiraeri bhonsego.”
21 Hayo, abhakuru bha Abhayahudi bhayo, bhakamukyukya ega, “Bheetu tutaranyoora enyarubha yoyonse okurwa mukyaro kya Yudea, inú eragamba eguru yaaho. Na omuntu wowonse ataakaajiri hanu, okugamba amangʼana amabhiibhi eguru yaaho. 22 Nawe bheetu, tureenda okwigwa kya ego uuwe oreeganirirya, kwa okubha edini inú oragwata, tumanyiri ega, eragambwa obhubhiibhi kira ahasi.”
23 Ego, bhakeekiriranʼya na Pauro, orusiku runú bhariikumanʼya. Orusiku ruyo hanú rwahika, bhakaaja abhantu abhaaru, munyumba inú yeekaranga. Pauro akabhatondera na okubhoonjoorera eguru ya obhukama bhwa Waryubha,a okwambira nyenkyo okuhikira kumugoroobha, yeendanga ega, bhonse bhamwikirirye Yeesu. Ekakora abheehigirye amangʼana eguru ya Yeesu kwa okutumira amaragiriryo ga Musa, na ebhitabho bhya abharooti.
24 Abhandi bhakeekirirya amangʼana ganú yaagamba, nawe abhandi bhataageekirirya. 25 Kwa ego, abheene kwa abheene bhateekiriranʼya. Mbe, hanú bhaaringa bharagya, Pauro akabhakeerya eringʼana rimwi ega, “Omutima Omurabhu, yaagamba amangʼana ga obhuheene, arakeerya bhajaaji weetu okuhitira kumurooti Isaaya ega,
26 ‘Ogende kubhantu bhanu, obhakeerye ega,
Okwigwa muriigwa, nawe, mutarimanya ensonga yaago.
Okurora murirora, nawe, mutarimanya.
27 Eribha ego, kwa okubha emitima gya abhantu bhanu, gibheeri emikongʼu,
amatwi gaabho, gatakwigwa bhujomu,
na ameeso gaabho, gahindiriirye.
Bhatakaaja okurora kwa ameeso gaabho,
bheegwe kwa amatwi gaabho,
bhamanye kwa emitima gyabho,
bhataaja bhanyihunjurire, naho mbatuurye.’b”
28 Pauro akagendererya okugamba ega, “Mbe, bhoono mumanye ega, amangʼana ga Waryubha eguru ya obhutuurya bhunu, gahirirwe kubhantu bhanú bhataringi Abhayahudi. Bheeki bharigagwata!”