Abhayahudi bharamujongera Pauro
24
Eginsiku etaanu hanú gyahita, omusyengeri omukuru Anania, akahiringita mumugi gwa Kaisaria, aringi hamwi na abhakaruka abhandi bha Ekiyahudi, na omoonjoori umwi wa amaragiriryo ga ekyaro. Omoonjoori uyo, yaabhirikirwanga Terituro. Bhayo bhonsego, bhaamujongera Pauro kumwanangwa wa Ekiruumi Feriki. 2 Hanú Pauro yaareetwa, Terituro akaamba okumujongera ega, “Ee omusuukwa Feriki, nuuwe orakora turabha na omurembe kuginsiku ginu gyonsego. Obhutungi bhwaho bhwa egintungwa, bhurakora amangʼana amabhiibhi gareemibhwa mukyaro munu. 3 Tureekirirya obhutungi bhwaho kwa obhujomerwa koko, na turakukumya bhukongʼu kira ahasi, na kwa kira enjira. 4 Bhoono ntaaja nkurosye bhukongʼu, ndakusabha kwa okwenda kwaho, otwitegeerere hakego.5 “Turuuji ega, omuntu unu, m-mugwatanʼya bhukongʼu. Weeki arasiigirirya Abhayahudi mubhyaro bhyonsego na okwibhukya eriihe gati yaabho. Hamwi na gayo, ngʼo omukuru wa edini ya obhubheehi ya Abhanajareeti. 6 Hanú yeenda okukonʼya erisyengerero erikuru rya Waryubha, rumwigo tukamugwata. [Tukeenda okumubhuturira ekiina okuringʼaana na amaragiriryo geetu. 7 Nawe, Risia omukuru wa abhasirikare urya, akaaja akaturuusya kwa eginguru, 8 akagamba ega, bheetu bhanú turamujongera, tuuje tumujongere kuuwe.]a Kwa ego, uuwe omwene hanú oraamwikomye, oratura okumanya obhuheene eguru ya amangʼana gonsego ganú garakora bheetu turamujongera.” 9 Amangʼana ga Terituro gayo, Abhayahudi bhaageekirirya ega, n-ga maheene.
Pauro areebhagirira embere ya omwanangwa Feriki
10 Kimwi, omwanangwa akamusomosya Pauro kwa ekyara, naho wonse agambe. Mbe, wonse akaamba okugamba ega, “Oni mmanyiri ega, uuwe waabha omubhuturi wa ekiina wa ekyaro kinu kwa eribhaga rya emyaka emyaru. Kwa ego, ndeebhagirira bira obhoobha. 11 Uuwe omwene oratura okumanya ega, gitaraambuka eginsiku ekumi na ebhiri, okurwa kya ego naariina okugya mumugi gwa Yerusaremu, okumusyengera Waryubha. 12 Bhanú bharanjongera, bhataanyoora ndahakaananʼya, kasi ndasiigirirya omuntu wowonse murubhanja rwa erisyengerero erikuru rya Waryubha, kora mumasinagogi kasi ahasi ahandi hohonse mumugi guyo. 13 Kora amangʼana ganú bharanjongera bhoono, bhatakutura okoorokya ega, n-ga obhuheene.
14 “Nawe, ndeekirirya embere yaaho ega, ndamusyengera Waryubha wa bhajaaji weetu na ndagwata Enjira ya Omukuru Yeesu inú bheeki bharabhirikira ega, ni-dini ya obhubheehi. Hamwi na gayo, ndeekirirya amangʼana gonsego ganú garagambwa na amaragiriryo ga Musa, na ganú gaangʼoorwa mubhitabho bhya abharooti. 15 Oni nonse niina obhwisige ku Waryubha, kya ego abhantu bhanu bhonsego bhareekirirya ega, Waryubha arihyukya abhaku bhonsego, abhaheene na abhasarya. 16 Kwa ego, eginsiku gyonsego ndakora ekituunyo, okubha na ameetegeerero amajomu embere ya Waryubha na embere ya abhantu.
17 “Mbe, hanú naamara emyaka emyaru bira okuhika mumugi gwa Yerusaremu, nkahunjuka-yo, naho mbahirire ebhintu bhya okubhabheera abhantu bha ekyaro kyani bhanú bhatakwitura, na nduusye ebhimwenso ku Waryubha. 18 Hanú abhantu bhanu bhaannyoora mwisyengerero rya Waryubha ndakora amangʼana gayo, naaringa mmariri okuraamwa. Na ntaasohanga na omuganda gwa abhantu kora ntaakora eriihe ryoryonse muyo. Nawe, mwisyengerero muyo, bhaaringa-mo Abhayahudi abhandi, okurwa mukyaro kya Asia. 19 Abhayahudi bhayo, mbo bhakeemiriiri embere yaaho hanu okunjongera kuuwe, nyoore bhakaabheeri na eringʼana kuoni.
20 “Kasi abhantu bhanú bharingi hanu, bhagambe obhusarya bhunú bhaarora kuoni hanú neemirira mwibharaja erikuru. 21 Hamwi bhaarora obhubhiibhi, hanú naagamba eringʼana rimwi kwa eriisi, gatigati yaabho ega, ‘Njongeerwe embere yeenyu hanu reero, kwa okubha ndeekirirya ega, abhaku bharihyuka.’”
22 Mbe, Feriki yaaringa amanyiri obhuheene, eguru ya Enjira ya Omukuru Yeesu. Kwa ego, yaakubhya ekiina kirya kwa okugamba ega, “Ndyamura ekiina kyenyu, hanú omukuru wa abhasirikare urya Risia, ariija.” 23 Kimwi, Feriki akamukeerya omukuru wa abhasirikare unú yaaringa hayo ega, amwangararire Pauro. Nawe, abhenga aramutigira omweya gwa okukora amangʼana gaaye, atakaanʼya abhasaani bhaaye, okumuserenʼya.
Pauro embere ya omwanangwa Feriki//na omukari waaye Durusiira
24 Hanú gyahita eginsiku nkego, Feriki uyo, akaaja hamwi na omukari waaye Durusiira, omuhara wa Ekiyahudi. Mbe, akatuma ega, Pauro abhirikirwe. Hanú Pauro yaahika, omwanangwa Feriki akaamba okumwitegeerera, aragambanga eguru ya okumwikirirya Kiristu Yeesu. 25 Pauro akaamba okubhakeerya gonsego ganú gareenderwa embere ya Waryubha, na okwiribhira okukora amabhiibhi, na kya ego Waryubha aribhuturira ekiina abhantu. Hanú Feriki yeegwa ego, akoobhoha. Akamukeerya Pauro ega, “Kwa bhoonwego, oratura okugya. Nakakubhirikire kweki, hanú nakanyoore omweya.” 26 Hamwi na ego, Feriki yaakanyanga ega, Pauro akaamuheeri amasooya, kwa ego, yaamubhirikira bhirikiranga mara kaaru, arahairahaira nawe.
27 Hanú gyahita emyaka ebhiri, Porikio Fesito akabha omutungi, kumweya gwa Feriki. Na kwa okubha Feriki yaaringa areenda okwijomya ku Bhayahudi, akamutiga Pauro mwigereja.