Eriihe erinene mumugi gwa Tesaronike
17
Pauro na Siira bhakahita mumigi gya Amufipori na Aporonia, bhakahika mumugi gwa Tesaronike. Tesaronike hayo, ryaringa-ho erisinagogia rya Abhayahudi. 2 Pauro akabha arasoha mwisinagogi muyo, kya ego yaaringa anariri. Kwa eribhaga rya Egisabhato gya obhutuuro esatu, akabha aratumira Amangʼoore Amarabhu kwa okubhakeerya na okubhoorokya abhantu ega, 3 Kiristu Omutuurya yeenderwanga anyankibhwe na okwitwa, na kweki, yeenderwanga ahyuke okurwa mubhaku. Pauro akagendererya okubhakeerya ega, “Kiristu unú ndabhakeerya eguru yaaye, ngʼo Yeesu.” 4 Amangʼana ganú Pauro yaagamba, Abhayahudi abhandi bhakageekirirya, hamwi na Abhayunani abhaaru bhanú bhaamwigwanga Waryubha. Kora abhakari abhaaru bhanú bhaasuukwanga mukyaro kiyo, bhonse bhakeekirirya. Bhayo bhonsego bhakagwatana na Pauro na Siira.5 Nawe, Abhayahudi bhanú bhateekirirya, bhakabha na orungʼeera. Kwa ego, bhakagya mumudiira bhakakodisya amatamagwe, kimwi gakaamba okureeta eriihe mumugi gonsego. Amatamagwe gayo, gakagya gakasoha kwa eginguru munyumba ya Yasooni, okubhatuna Pauro na Siira, naho bhabhahire embere ya omuganda gwa abhantu. 6 Na hanú bhaabhura, gakamugwata Yasooni na abheekirirya abhandi gakabhahira embere ya abhatungi bha omugi, enu garatema ekituri ega, “Abhantu bhanu, mbo bhaabha bharakora eriihe mubhyaro ebhyaru, bhahikiri hanu honse! 7 Yasooni unu, abhagenihirye iika owaaye. Bhonsego bharakyuka amaragiriryo ga Kaisari, na bharagamba ega, ariho omukama oundi unú arabhirikirwa Yeesu.” 8 Abhatungi bha omugi hamwi na omuganda gwa abhantu bhayo, hanú bheegwa amangʼana gayo, bhakeetakya na okujima bhukongʼu. 9 Yasooni akeetungurya weeki na abharikyaye kwa egimbirya, kimwi bhakabhahaatira.
Pauro na Siira mumugi gwa Bheroya
10 Hanú bhwera, abheekirirya bharya, bhakabhatuma Pauro na Siira mumugi gwa Bheroya. Bhonse, hanú bhaahika eyo, bhakasoha mwisinagogi rya Abhayahudi. 11 Abhayahudi bha Bheroya hayo, bhaaringa abheegwa okukira abha mumugi gwa Tesaronike. Ego, hanú Pauro yaabharaarikira amangʼana ga Waryubha, bhakagagwata kwa ekituunyo bhukongʼu. Bhakabha bhaareekomya mu Mangʼoore Amarabhu ga Waryubha kira orusiku, naho bharore, nyoore gayo Pauro aragamba, n-ga maheene. 12 Mbe, Abhayahudi abhaaru, bhakamwikirirya Yeesu, hamwi na Abhayunani, bhonsego abhasaaja na abhakari bhanú bhaasuukwanga.
13 Mbe, Abhayahudi bha Tesaronike bharya, hanú bhaamanya ega, Pauro areehigirya eringʼana rya Waryubha mumugi gwa Bheroya, bhakagya-yo. Hanú bhaahika, bhakasiigirirya omuganda gwa abhantu bhanú bhaaringa hayo, okuhikira eriihe rikeebhuka-ho. 14 Nho, abheekirirya bha Bheroya hayo, rumwigo bhakamuhira Pauro, okuhikira kumurambo. Nawe, Siira na Timoteo bheeki, bhakatigara Bheroya hayo. 15 Abheekirirya bhanú bhaamuheregesya Pauro, bhakamuhira okuhikira mumugi gwa Atene. Kweki bhakahunjuka Bheroya, bhaaringa bhatumirwe na Pauro ega, bhakeerye Siira na Timoteo ega, bhamuseete bhwangu.
Pauro areehigirya mumugi gwa Atene
16 Eribhaga Pauro yaaringa mumugi gwa Atene, akyabhaganyirira Siira na Timoteo, akarora omugi gonsego gwijwiri ebhisusano bhya abhakuru. Hanú yaarora ego, akanyahaarika bhukongʼu, mumutima gwaye. 17 Kwa ego, akabha aragya mumasinagogi okubhuuranʼya Abhayahudi hamwi na Abhayunani bhanú bhaaringa bharamwigwa Waryubha. Kweki, kira orusiku yeehigiranʼyanga na abhantu bhanú yaasikananga nabho mumudiira.
18 Mbe, Pauro akabha arasikana na abhasomi abhandi bha omuganda gwa Ekiepikurio,b na ogwa Ekistoiko,c kimwi bhakaamba okuhakaananʼya nawe. Abhandi bhakagamba ega “Omubhambuku unu, areenda okugamba-ki?” Abhandi bhakagamba ega, “Eramaahikana ega, araraarika eguru ya amasambwa amageni.” Bhaagamba ego, kwa okubha, yaaraarikanga eguru ya Yeesu na okuhyuka kwa abhaku. 19 Kwa ego, abhasomi bhayo, bhakamuhira Pauro mwibharaja erikuru rinú ryabhirikirwanga ega, Areopago. Hanú bhaahika mwibharaja riyo, bhakamubhuurya ega, “Ameehigiryo amahya ganú oreehigirya, m-meehigiryo-ki? Turatura okugamanya! 20 Uuwe oratureetera amangʼana amahya, kwa ego tukeenderi tumanye, amangʼana gayo, ensonga yaago niki.” 21 Bhaagamba ego, kwa okubha, abhantu bha Atene eyo, hamwi na abhageni okurwa mubhyaro ebhindi bhanú bhaaringa bhamenyeri muyo, bhaatumiranga eribhaga ryabho okwitegeerera na okugamba eguru ya amangʼana amahya ageenego.
22 Kimwi Pauro akeemirira gatigati ya eribharaja rya Areopago riyo, akagamba ega, “Bheenyu abhasaaja bha Atene! Ndarora ega, bheenyu m-bantu bhanú muhanjiri bhukongʼu amangʼana gonsego ga edini. 23 Hanú naaringa ndagendagenda mumugi munu, naaruuji eginjira gyenyu gya obhusyengeri. Naaruuji ahasi ha okusyengerera inú engʼoorerwe ega, ku waryubha unú atamanyikeeni. Mbe, Waryubha unú muramusyengera bira okumumanya, ngʼo oni ndabharaarikira.
24 “Waryubha m-Mukuru wa orwire na ekyaro, kwa bhurya ngʼo yaabhumba ekyaro na ebhintu bhyonsego bhinú bhirimo. Atakwikara muginyumba ginú girahagaajwa na abhantu. 25 Weeki ataana enyanko, okuhikira ega, abhantu bhamukorere emirimu. Omwene ngʼo arahaana abhantu bhonsego obhuhoru na omwika na ebhintu bhyonsego. 26 Weeki ngʼo yaabhumba amakabhira gonsego, okurwa kumuntu umwi, naho bheekare mukyaro kyonsego. Akabhatuurira na eribhaga rya okwikara rinú yaaringa abhaamuriri okurwa akare, akabhatuurira na egintunga gya ahasi hanú bhareekarenga. 27 Waryubha yaakora ego, naho abhantu bhamutune, onyoora n-kwa okubhabhaatabhabhaata, okuhikira bhamurore. Nawe, Waryubha ataringi hare na kira oumwi weetu, 28 kwa okubha ngʼo arakora bheetu turiho, turagenda na okubha na obhuhoru bhwetu. N-kya ego oumwi gati yeenyu, omungʼoori wa ameembo, yaagamba ega, ‘Bheetu bhonsego m-baana bhaaye.’
29 “Mbe, kwa okubha bheetu m-baana bha Waryubha, tutamanya ega, ahunkeeni na ebhisusano bhinú bhirakorwa kwa ebhigera bhya egijahaabhu, kasi kwa ebhya egimbirya, kasi kwa amagina. Bhiyo bhyonsego bhirakorwa kwa obhungʼeeni bhwa abhantu. 30 Akare hayo, eribhaga rinú abhantu bhaaringa bharakora gayo, kwa obhukangi, Waryubha yeekoryanga muna atakugarora. Nawe bhoono, arabhakeerya abhantu bhonsego bha kira ahasi, ega, bhamwihunjurire okurwa mubhusarya bhwabho. 31 Kwa ego, yaatuura-ho orusiku runú aribhuturira ekiina abhantu bhonsego bha mukyaro, kwa okoorokya obhuheene. Arikora ego kwa okuhitira omuntu umwi unú yaasora. Waryubha yaahaana abhantu bhonsego obhuheene bhwa eringʼana riyo, kwa okumuhyukya omuntu uyo, okurwa mubhaku!”
32 Mbe, hanú bhaamwigwa Pauro aragamba eguru ya eringʼana rya okuhyuka kwa abhaku, abhandi bhakabha bharajeera, nawe, abhandi bhakamukeerya ega, “Twakakwitegeerere kweki eguru ya eringʼana riyo.” 33 Kwa ego, Pauro akarwa mwibharaja rirya, akagya gyaye. 34 Nawe, abhantu abhandi, bhakeekirirya amangʼana gayo, kimwi bhakagwatana nawe. Abhantu abhandi bhanú bheekirirya yaaringa Dionisio, oumwi wa eribharaja rirya rya Areopago, na omukari umwi unú yaabhirikirwanga Damari, hamwi na abhantu abhandi.