Pauro na Bharinabha mumugi gwa Ikonio
14
Hanú Pauro na Bharinabha bhaaringa mumugi gwa Ikonio, bhakasoha mwisinagogi rya Abhayahudi, kya ego bhaaringa bhanariri. Bhakeehigirya abhantu muyo eguru ya Yeesu, okuhikira Abhayahudi abhaaru hamwi na abhantu bhanú bhataringi Abhayahudi, bhakeekirirya. 2 Nawe, Abhayahudi abhandi, bhateekirirya, bhakaamba okusiigirirya abhandi bhanú bhataringi Abhayahudi, naho bhabhajimire abheekirirya bhayo. 3 Pauro na Bharinabha bhakagendererya okwikara Ikonio hayo, eginsiku eginjaru. Bheehigiryanga abhantu kwa ekituunyo eguru ya eriruguto rya Omukuru Yeesu. Omukuru wonse, yaakomererya amangʼana ga eriruguto ryaye, kwa okubhahaana obhuturo bhwa okukora ebhimanyiiriryo na ebhiruguuryo ebhyaru. 4 Nawe, abhantu bha mumugi guyo, bhaahukana emiganda ebhiri. Abhandi bhakabha orubhaara rwa Abhayahudi abhahakaani, na abhandi bhakabha orubhaara rwa abhatumwa.5 Kubhuteero, gati ya Abhayahudi na bhanú bhataringi Abhayahudi, bhakagwatana na abhatungi bhaabho, bhakakora ekiina kya okubhakorera Pauro na Bharinabha amabhiibhi na okubhatema na amagina. 6 Nawe, abhatumwa hanú bhaamanya ekiina kiyo, bhakakenyera mukyaro kya Rikaonia, mumigi gya Rustira na Deribhe, na mumigi egindi gya embarika wa ekyaro kiyo. 7 Eyo, bhaagendererya okwihigirya abhantu Amangʼana Amajomu.
Pauro na Bharinabha mumugi gwa Rustira
8 Mumugi gwa Rustira muyo, yaaringa-mo omuntu umwi. Omuntu uyo, yaaringa omubheeru okurwa okwibhurwa kwaye, na ataaturanga okugenda. 9 Pauro hanú yeehigiryanga, omuntu uyo wonse, yaaringa yeekeeri hayo, aramwitegeerera. Pauro akamumaahirira akamurora yaana eimani ya okuhwenibhwa. 10 Kimwi, Pauro akamukeerya kwa eriisi erinene ega, “Imirira kwa amaguru gaaho!” Rumwigo, omuntu uyo, akeemirira bhwangu, akaamba okugenda omwene.
11 Omuganda gwa abhantu, hanú bhaarora kya ego Pauro amuhwenerye omuntu uyo, bhakagamba kwa eriisi mukigambo kyabho kya Ekirikaonia ega, “Emisambwa gitwituumiiri kya entuubho ya abhantu!” 12 Bhakamutoga Bharinabha ega, Jeu, eriina rya omusambwa gwabho omukuru. Na Pauro bhakamutoga ega, Herime, eriina rya omusambwa gwabho ogundi, kwa okubha ngʼo yaahairanga bhukongʼu.a 13 Kibhara wa omugi guyo, ryaringa-ho erisyengerero rya Jeu. Mbe, omusyengeri wa Jeu, akareeta egigeeni gya egingʼombe na amauwa ga okugoodera, kukiita kya omugi. Weeki hamwi na omuganda gwa abhantu bharya, bheendanga okubhagoogera Pauro na Bharinabha egigeeni gya egingʼombe gibhe ekimwenso.
14 Nawe, Bharinabha na Pauro hanú bheegwa amangʼana gayo, bhakataamura emyenda gyabho, okoorokya kya ego bhajimiri. Kimwi bhakakenyerera omuganda gwa abhantu bharya, enu bharajiirira ega, 15 “Bhamure! Kwaki murakora amangʼana ganu? Mutige okukora ego! Bheetu bhonse m-bantu, kya bheenyu! Tuujiri hanu, okubharaarikira Amangʼana Amajomu ega, mwihunjure mutige okusyengera ebhisusano bhinú bhitaana obhwera. Mubhe abhantu bha Waryubha omuhoru! Waryubha uyo, ngʼo yaabhumba orwire na ekyaro na enyanja na bhyonsego bhinú bhirimo. 16 Akare hayo, Waryubha yaatiga abhantu bhanú bhataringi Abhayahudi bheekare kya ego bheendanga. 17 Nawe, ataatiga okubhoorokya bheenyu ega, ariho. Yaabha arabhakorera amajomu, kwa okubhareetera embura okurwa murwire, naho munyoore erigesa rya ebhyakurya, mwigute. Kora emitima gyenyu yaabha aragiijurya obhujomerwa.” 18 Kwa okugamba amangʼana gayo, Pauro na Bharinabha bhaatura okubharibhira abhantu bhayo kwa enyanko, bhatige okubharuusirya ekimwenso.
19 Mbe, bhakaaja Abhayahudi abhandi okurwa mumigi gya Antiokia na Ikonio. Bhakangʼeenererya abhantu bhayo, bhonse bhakeekirirya. Ego, bhonsego bhakaamba okumutema Pauro na amagina. Bhakamanya ega, akwiri, bhakamungʼuura okuhikira kibhara wa omugi. 20 Nawe, hanú abheekirirya abhandi bheekumanʼya na okumwinaara, akeemuka akahunjuka mumugi muyo Rustira. Ejo wendeko, weeki na Bharinabha bhakeemuka okugya mumugi gwa Deribhe.
Pauro na Bharinabha bharahunjuka//mumugi gwa Antiokia ya Siria
21 Pauro na Bharinabha bhaaraarika Amangʼana Amajomu, mumugi gwa Deribhe, na okunyoora abheekirirya abhaaru. Kimwi bhakahunjuka mumugi gwa Antiokia ya Pisidia, kwa okuhitira mumigi gya Rustira na Ikonio. 22 Bhaaringa bhareemya abheekirirya bha mumigi giyo, na okubhateremya bhagume kuimani. Bhaabhakeeryanga ega, “Bheetu bhonsego tureenderwa tuhitire munyanko enene, naho tusohe mubhukama bhwa Waryubha.”b
23 Na hanú bhaamara okubhasorera abhakangati bha kira erikanisa, kwa okusabha na okwiyima ebhyakurya, bhakabhatuura mumabhoko ga Omukuru Yeesu unú bhaamwikiriryanga. 24 Kimwi Pauro na Bharinabha bhakahitira mukyaro kya Pisidia, bhakasoha mukyaro kya Pamufiria, 25 bhakahika mumugi gwa Perige. Eyo, bhakaraarika eringʼana rya Waryubha. Hanú bhaamara, bhakahiringitira mumugi gwa Ataria. 26 Okurwa Ataria eyo, bhakahitira munyanja kwa obhwato, bhakahunjuka mumugi gwa Antiokia mukyaro kya Siria. Eyo, ngʼyo abheekirirya bhaaringa bhabhasabhiiri eriruguto rya Waryubha kumirimu ginú bhaaringa bhamariri. 27 Hanú bhaahika Antiokia, bhakakumanʼya hamwi abheekirirya. Bhakabhakeerya gonsego ganú Waryubha yaakora okuhitira kubheene, na kya ego yaahaana bhanú bhataringi Abhayahudi, omweya gwa okumwikirirya Yeesu. 28 Kimwi, bhakabha bhareekara na abheekirirya Antiokia hayo, kwa eribhaga eritambi.